Pôa Nguyễn Chu Hồi, Khu kăn Kuô̆k hô̆i kong pơlê Hải Phòng tối tiah kố pơkâ tâi tâng tơdroăng cheăng dêi tơnêi têa ai hên tíu ki nếo, tơdrêng ƀă pơkâ mơjiâng tơmeăm khoăng troăng prôk, tung mê kal thế tơkâ luâ xơpá tơdroăng ki ôh tá tơdjêp ‘na troăng prôk ki mơgăn dêi mâu kong pơlê kĭng têa kơxĭ peăng Kơnhŏng ƀă Tơdế tơnêi têa. Xuân tiô mâu kăn, pơkâ mê hiăng séa ngăn troh mâu tơmeăm khoăng ki ê vâ tơtro ƀă tơdroăng cheăng kâ kơxô̆  ƀă kring vế hyôh kong prâi ƀă mâu kơpong ki u ối dêi kong kế, hên túa sinh hok vâ mơdêk ivá kâi hbrâ ví ƀă hyôh kong prâi hơ’lêh:

“Tơmeăm khoăng troăng prôk tơdjêp ƀă kơpong nôkố ôh tá xê to ô tô, tơƀai kơneăng mê ối tơdjêp ing măng. Tơmeăm khoăng ki má pái cho thế hmâ ƀă hyôh kong prâi hơ’lêh, nôkố thế ai tơmeăm khoăng ki lĕm, thế pêt kong, kong têa xăng po lân a kĭng têa kơxĭ vâ kơdroh ki tơdjâk ‘mêi troh hyôh kong prâi, hyôh kong prâi hơ’lêh.

Tơdroăng mê mơhno tiah kố pơkâ tâi tâng dêi tơnêi têa hiăng pêi teăm tơdroăng púi vâ dêi rơxông ƀă hiăng pơxiâm riân troh tơdroăng tơmâng khât, xúa ki rơkê pêi cheăng châ tơƀrê’’.

‘Na pôa Bùi Hoài Sơn, Khu kăn Kuô̆k hô̆i pơlê kong kân Hà Nội, Pơkâ tâi tâng dêi tơnêi têa hiăng châ tơmâng tơdjêp krá ƀă mâu tơdroăng pơkâ mơhno túa lĕm tro; tơmâng tơleăng mơnhên tro tơdroăng tơrŭm pơla mơnhông mơdêk ƀă pơtối rak vế mâu tơdroăng ki kơnía mơhno túa lĕm tro, tơdroăng ton nah. Rak rơniăn, pơtối rak mâu tơdroăng ki pơxúa dêi vêa vong lĕm tro mâu hdroâng kuăn ngo; mơnhông mơdêk cheăng ƀă kơmăi kơmok túa lĕm tro pêi lo tơmeăm, tơmeăm ki lĕm ai inâi, ki hên vâi ô eăng troh kơpong ƀă lâp plâi tơnêi, tiô tơdroăng Pơkâ hneăng hôp má 13 dêi Đảng:

“Pơkâ tâi tâng dêi tơnêi têa hiăng ai mâu tơdroăng tơmâng khât ƀă tơdroăng mơhno túa lĕm tro ƀă malối pin hiăng tơmâng hên troh mâu luât pơkâ ‘na mơhno ki lĕm tro. Tâng pin ai mâu tơdroăng hriăn pêi pro túa lĕm tro rơdêi môi tiah tíu mơđah tơbleăng tơmeăm khoăng, hngêi hơdruê xuâng, hngêi ‘măn rak mâu hlá mơ-éa, mơđah tơbleăng… mê cho xiâm vâ pin tơkŭm po mâu tơdroăng leh kân tơxâng vâ mơnhông mơdêk tơnêi têa.

Laga xuân kal ai tơ’nôm mâu tơdroăng tơtrŏng ki ê ƀă pin ai hên kơpong mơhno ki lĕm tro pơrá phá ai mâu tơmeăm ki kơnía ƀă mâu tơmeăm kơnía krê xêh. Môi pơkâ tâi tâng dêi tơnêi têa bú chiâng vâ pêi hlối tơtro ƀă tơdroăng dêi tơnêi têa drêng gá pêi pro tiô ki pơxúa, mâu tơdroăng ki pá xêh dêi tơdroăng ki lĕm tro’’.

Tơmiât Pơkâ tâi tâng dêi tơnêi têa pơla hơnăm 2021-2030, hvái ngăn vâ pêi troh hơnăm 2050 cho môi tung mâu tơdroăng thế pêi tơdrêng xua gá tơdjâk tơdrêng troh pơkâ dêi mâu kơpong, kong pơlê, pôa Lê Hữu Trí, Khu kăn Kuô̆k hô̆i kong pơlê Khánh Hòa tối nhên:

“Ngăn a luât pơkâ hdró, ki tro gá Pơkâ tâi tâng dêi tơnêi têa thế châ pơkâ rĕng tâ vâ pro xiâm vâ mâu kong pơlê tơbleăng pơkâ ăm râ kong pơlê, pa xôp kong pơlê. La ki kal cho pơkâ mê tung pơla kô hrá tâ la ki kal tâ cho pêi lĕm, tuăn tơmiât ƀă mâ ngăn pêi ton hơnăm dêi tơnêi têa mơnhông mơdêk rĕng la thế krá tơniăn kâk tơdroăng cheăng dêi Kuô̆k hô̆i xuân môi tiah pêi mâu tơdroăng krá kâk dêi pơlê pơla pin, tung pơla kố ƀă hvái ngăn vâ pêi troh hơnăm 2050’’.

A rôh hôp ôh tá xê tiah hmâ rôh má 2 dêi Kuô̆k hô̆i hneăng 15, pêi pro tiô tơdroăng hnê thế dêi Ngế pro xiâm hnê ngăn Chin phuh Ngế xiâm pơkuâ ngăn Pơkâ ƀă ‘no liăn cheăng Chí Dũng tối tơbleăng tung hlá mơ-éa chêh Pơkâ hdró tâi tâng dêi tơnêi têa tung pơla hơnăm 2021-2030, hvái ngăn vâ pêi troh hơnăm 2050. Ing mê, Pơkâ tâi tâng dêi tơnêi têa pơla hơnăm 2021-2030, hvái ngăn vâ pêi troh hơnăm 2050, pơkâ tơdroăng cheăng vâ pêi troh hơnăm 2030 Việt Nam cho tơnêi têa dế mơnhông ai kơmăi kơmok pêi cheăng tiô túa nếo, kơxô̆ liăn pêi lo hên, ki tâk cheăng kâ ngăn a tơdroăng cheăng xúa khoa hok tiô túa nếo, pơ’lêh nếo, hriăn plĕng ki nếo ƀă pơ’lêh kơxô̆; túa tơkŭm mơnhông tơnêi têa tơƀrê, môi tuăn, krá tơniăn, chiâng kơpong xiâm cheăng kâ, kơphô̆ ki mơnhông, ai tơmeăm khoăng pro tơdâng tơ‘mô, tiô túa nếo; rak tơniăn tơdâng kân, mơdêk ki kâi trâng dêi tơdroăng cheăng kâ; hyôh kong prâi nhâ loăng kuăn kiâ châ kring vế, hmâ ƀă hyôh kong prâi; tơdroăng rếh ối tơmeăm khoăng, tuăn ngôa dêi kuăn pơlê châ mơdêk; tơdroăng cheăng lêng, kring vế tơniăn châ rak tơniăn.