Mâu hơnăm achê kố, tơmối ing achê, hơngế troh pơlê kong kơdrâm Plei Ku vâ tăng ‘nâi túa lĕm tro, kế kâ dêi kuăn pơlê a kố rế tâk. Hơnăm 2019, đảng viên Rơ Mah Hiu ối a pơlê Tiêng 1, cheăm Tân Sơn, pơlê kong kơdrâm Plei Ku hiăng khên po môi tíu tê mơdró tơmeăm kế mơngế Jarai tung kơdrum hngêi dêi rơpŏng hgêi. Tíu tê mơdró mê cho hngêi trá tiô khôi hmâ nah dêi mơngế Jarai, châ rơnuâ rơneăm pro mâu chêng, hơkâ, lơ um ki vâ ‘măn a tơnâp kiâ... xuân to mâu tơmeăm ki hmâ xúa tung rêh ối pêi cheăng kâ ƀă túa lê̆m tro dêi mơngế Jarai.

Mâu kơchâi kế kâ cho ing kơchâi kong, reăng plâi rơhung, kơchâi mŏn ki pêi ing hlá pôm loăng  pế ƀă măm khăng, kơxêng í, ká têa krông, châ kuăn pơlê Jarai tung pơlê păn, pêt, lăm rơnăng. La tơmeăm ƀă túa pế pơchên tơ’lêi tê, la gá xú kơhiâm krê, pro ăm tơmối achê hơngê tăng troh vâ kâ rế ton rế hên.

Tung pơla pro tíu tê mơdró, thế kơ-êng chi ƀô̆ pơlê Tiêng 1, đảng viên Rơ Mah Hiu châ ‘nâi mâu troăng rơhlâ ƀă mơnhông ôm hyô ƀă pơtối rak túa lĕm tro. Pakĭng mê, ngoh xuân veăng tŭm mâu lâm hriâm ‘na pro tơniăn krúa kế kâ ƀă tơdroăng vâ tơkŭm po ôm hyô tung kuăn pơlê. Prôk tro troăng, tíu tê mơdró rế xông tơƀrê, ngoh Hiu châ xo kơxô̆ liăn hên ƀă hlối kum kuăn pơlê tung pơlê ai tơ’nôm kơxô̆ liăn pêi lo.

“Rơpŏng hngêi ai tơmiât po tíu tê vâ tăng xo tơ’mot liăn ăm rơpŏng hngêi ƀă kum ăm kuăn pơlê pê ai cheăng pêi lo liăn. Tơmối vâ ngăn vâi kơ’râu xuăng ƀă tŏn chêng dêi mơngế Jarai. Pin tăng khu tŏng chêng dêi pơlê troh tŏn mơđah ăm vâi ngăn. Pin mơhá mâu ki tŏn  liăn, vâ vâi pơtối vâ rak vế túa lĕm tro ton nah, malối kum cheăng kâ, má péa pơtối rak túa lĕm tro ton nah’’.

Tân Sơn cho cheăm kơpong kĭng pơlê kong kơdrâm Plei Ku. Akố ai 5 pơlê, thôn. Tung mê ai 2 pơlê Tiêng 1 ƀă Tiêng 2 ki hên cho mâu rơpŏng Jarai. Sap hơnăm 2016 troh nôkố, kơnôm tơbleăng pêi tơdroăng pơkâ 06, mâu pơlê hdroâng kuăn ngo acheăm châ tơmâng khât ƀă pro nếo, ‘mâi rơnêu troăng prôk ƀă mâu hngêi kuăn pơlê tơkŭm hôp. Kuăn pơlê châ hriâm ‘na pro ôm hyô tung kuăn pơlê, pơtối rak túa lĕm tro tŏn chêng, teăn hmôu ếo pơtâk kuăn ngo...

Tung pêi cheăng kâ, kuăn pơlê ối châ khu râ kăn  hnê ‘mâi pêt kơphế, pro tro prôk troh a klâng ƀă mơjiâng pro kơpong pêi cheăng pê lo tơmeăm tiô pơkâ tê ăm kong têa ê.  Malối, 63 hdroh rơpŏng kơtiê, vâ chê kơtiê châ kơjo kum 1,3 rơtal liăn vâ pôi tá ai hngêi xi kơchoh, kum hdrê pêt, hdrê păn liăn dêi mâu khu veăng kum. Nôkố, tung 350 rơpŏng kuăn pơlê Jarai tung cheăm Tân Sơn, nôkố bú ối 3 rơpŏng kơtiê, pê lo liăn riân rêm ngế mơ’nui hơnăm 2023 ai 43 rơtuh liăn.

Tơdrêng amê, mâu pơlê xuân ai khu tŏn chêng, kâu lăk ƀô̆ teăn, hlối cho tíu kum kuăn pơlê trâm mâ, hnê mâu túa lĕm tro ton nah dêi mơngế Jarai. Pôa Rơ Châm Joi, đảng viên pơlê Tiêng 2, cheăm Tân Sơn, pơlê kong kơdrâm Plei Ku ăm ‘nâi:

“Nôkố, hngêi ki lâi xuân ai kơphế, ai tơnêi pêt báu. Kuăn pơlê hâk  phiu ro. Nôkố kơnôm tơnêi têa ‘no liăn pro troăng; mâu lêng ƀă kuăn pơlê hnê ‘na rôe ƀaoh hiêm khăm pơlât xuân hlo tơƀrê hên châ 95%”.

Pôa Phan Văn Hiếu - Kăn hnê ngăn Đảng ủy cheăm Tân Sơn, pơlê kong  kơdrâm Plei Ku ăm ‘nâi, ki xiâm dêi Pơkâ 06 khu kăn Đảng ủy Plei Ku cho tơkŭm mơhnhôk tăng, pơtối rak vế pêi tơbrê mâu tơdroăng ‘no liăn mơnhông cheăng kâ - rêh ối kơpong hdroâng kuăn ngo. Xua mê, mâu hơnăm hdrối, Đảng ủy cheăm ƀă mâu chi ƀộ pơlê, thôn hiăng hnê pơlê, hnê ăm tâi tâng khu cheăng kal kí tơbleăng pêi tơdroăng, tơdroăng cheăng kâ ƀă luât pơkâ tơtro ƀă mâu pơlê kuăn ngo.

Tung mê, đảng ƀô̆ ƀă mâu kăn rơtế ƀă kuăn pơlê tung tơdroăng pơ’lêh hdrê loăng pêt, mơnăn păn; xúa ki rơkê khoa hok kih thuât tung pêi chiâk, ing mê mơdêk pê lo liăn, xăm kơtiê krá tơniăn:

“Sap ai tơdroăng ƀă pơkâ dêi Khu pơkuâ hnê ngăn Đảng kong pơlê, khu kăn Đảng tung tơdroăng rêh ối châ kuăn pơlê ‘mâi hơ’lêh nhên, kơxô̆ rơpŏng kơtiê chu kơdroh rêm hơnăm. Hên rơpŏng kơtiê châ tơnêi têa, măt trâ̆n, tơnêi têa, khu mâu ai tuăn hơ-ui, mê châ mơnhông, tơniăn tơdroăng rêh ối’’.

Mâu tơdroăng hiăng pêi pro hiăng pêi châ tơƀrê a cheăm Tân Sơn, pơlê kong kơdrâm Plei Ku, Gia Lai ăm hlo, tơdroăng djâ Pơkâ dêi Đảng pêi pro tung rêh ối, hiăng pêi châ tơƀrê khât, pro pơ’lêh tâi tâng tung tơdroăng rêh ối, mơdêk châ tơƀrê tung rêh ối dêi kuăn pơlê.