Drêng idrâp chêng koăng a Hngêi túa lĕm tro thôn M6, cheăm Vĩnh Hoà, tơring Vĩnh Thạnh, kong pơlê Bình Định hiăng chuât dri drih, xuân cho roh vâi krâ-nhŏng o tung pơlê tơkuăm kơdrâm kơdrĕng. Khu tŏn chêng tôu koăng thôn M6 ai tŭm, tá mâu vâi krâ troh a vâi hdrtêng, cho hdroâng kuăn ngo Bơhnéa. Dế nôkố, thôn M6, cheăm Vĩnh Hoà dế pêi pro Tơdroăng pơkâ kơxô̆ 6 ‘na Rak vế, pơtối mơdêk ki kơnía git túa lĕm tro dêi mâu hdroâng kuăn ngo ki iâ mơngế, hnối  tơdjêp tá tơdroăng mơnhông ôm hyô, ối tung kơvâ Hnoăng cheăng xiâm tơnêi têa tung mơnhông pêi cheăng kâ - rêh ối pơlê pơla mâu hdroâng kuăn ngo ƀă kong ngo.

Thôn M6 tơkŭm kring vế, rak ngăn ƀă mơnhông ki kơnía git túa lĕm tro dêi hdroâng kuăn ngo tơná, ki xiâm dêi tơdroăng kố cho mơnhông ‘na rak vế, tŏn chêng koăng hnối ai tá tơdroăng kơhnhon xuăng tiô khôi hmâ dêi hdroâng Bơhnéa. Rêm khế, klêi kơ’nâi hôp, mâu ngế ki châ kuăn pơlê loi tơngah a thôn M6 vêh tơkŭm nê khu droh rơtăm tung thôn vâ hnê tối ‘na tôu chêng tôu koăng.

Pôa Y Khoa, 69 hơnăm, hdroâng kuăn ngo Bơhnéa a thôn M6, cheăm Vĩnh Hoà, tơring Vĩnh Thạnh cho đảng viên ki châ ai hên tơdroăng ki kuăn pơlê loi tơngah. Tiô pôa Y Khoa, ƀă kuăn pơlê a pơlê M6, idrâp chêng koăng pơtối pu hung pu hung, cho vâ tơbleăng mơhno tơdroăng ki hơniâp ro, kơpong ki vâ trâm khu xeăng ƀă kuăn pơlê.

“Ngin đi đo rak vế ƀă pơtối mơdêk khôi túa, vêa vong dêi hdroâng kuăn ngo, maluâ cho rak vế, hriâm, tŏn mơđah chêng koăng, cho tơmeăm khoăng dêi hdroâng kuăn ngo. Vâ pơtối mơdêk khoi túa, vêa vong tiô túa vâi krâ nah, mê krâ pơlê, mâu vâi krâ ki châ kuăn pơlê loi nhoăm athế ai hnoăng hnê tối, mơhnhôk tơdjâ khu rơxông hơnăm ối nếo. A mâu hâi leh, hâi mơdĭng ngin đi đo tơkuăm po tơdroăng tôu chêng koăng. Mâu ngế ki ‘nâi athế hnê tối ăm mâu ki tá hâi ‘nâi, ing mê, kô pêi pro lĕm tro vâ mơnhông khôi túa, vêa vong dêi hdroâng kuăn ngo pin”.

Thôn M6, cheăm Vĩnh Hoà, tơring Vĩnh Thạnh ai dâng 60% cho hdroâng kuăn ngo Bơhnéa, tơdroăng rêh kâ ối dêi vâi krâ-nhŏng o ki xiâm cho tơdroăng pêi chiâk pêi deăng, păn mơnăn mơnôa. Pêi pro tiô hnăng cheăng xiâm tơnêi têa ‘na mơnhông pêi cheăng kâ-rêh ối pơlê pơla hdroâng kuăn ngo ki iâ mơngế ƀă kong ngo, pơla hdrối mê hía nah, tơring Vĩnh Thạnh hiăng tŏng gum tăng cheăng kâ ăm rơpŏng hngêi, veăng gum rơxế pơchoh klâng chiâk, pêi cheăng ƀă kơmăi  kơmok. Pôa Đinh Văn Hảo, Kăn thôn M6, cheăm Vĩnh Hoà, tơring Vĩnh Thạnh tối tiah kố, vâ khôi túa, vêa vong dêi mơngế Bơhnéa châ pơtối rak vế, mê rêm ngế đảng viên athế djâ troăng ahdrối tung hnê tối, mơhnhôk khĕn vâi krâ-nhŏng o pơtối rak vế khôi túa lĕm tro dêi hdroâng kuăn ngo tơná. Rêm khế, klêi kơ’nâi rêm roh hôp khu lêng ƀă kuăn pơlê a hngêi túa lĕm tro dêi thôn M6, khu tôu chêng tôu koăng kô hnê tối ăm kuăn pơlê ‘nâi rak vế, rơkê tôu chêng koăng. Pôa Hảo tối ăm ‘nâi tơ’nôm, đảng viên, mơngế ki châ kuăn pơlê loi tơngah djâ troăng adrối tung hnê tối ăm khu vâi đoân viên, droh rơtăm, hnê khu rơxông nếo hriâm ƀối ki rơkê, ki lĕm tro dêi vâi krâ ki djâ troăng ahdrối:

“Rêm hdroh hôp kuăn pơlê, la lâi xuân hnê mơhno tối, mơhnhôk vâi krâ-nhŏng o kuăn pơlê athế pơtối mơdêk khôi túa, vêa vong dêi hdroâng kuăn ngo dêi tơná. Ƀă dêi hnoăng cheăng đảng viên mê tơná á xuân môi tiah mâu ngế tung pơê athế tơrŭm ƀă tơdroăng ki lăm troh a tơrêm rơpŏng hngêi hnê tối, mơhnhôk thế kuăn pơlê, mâu tơdroăng ki lâi ki vâi krâ-nhŏng o tá hâi hlê plĕng mê ngin athế hnê tối ăm vâi krâ-nhŏng o ‘nâi nhên ‘na tơdoăng kố, malối, mơdât tơdroăng ki xo on veăng tá hâi teăm tro hơnăm, xo on veăng ối tung môi hdrông hdrê”.

Tơring kong ngo Vĩnh Thạnh, kong pơlê Bình Định cho tíu ki pêi pro lĕm tro mâu tơdroăng tơkêa pêi ối tung Hnoăng cheăng xiâm tơnêi têa tung mơnhông pêi cheăng kâ-rêh ối pơlê pơla tung kơpong hdroâng kuăn ngo ki ia amơngế ƀă kong ngo. Ing tơdroăng kố, ‘na rêh kâ ối, pêi cheăng kâ, tuăn mơno dêi kuăn pơlê mâu hdroâng kuăn ngo pơtối châ ‘mâi mơnhông, kơxô̆ rơpŏng kơtiê hiăng chu kơdroh; mâu hngêi trăng, troăng klông, ‘na kơdrum chiâk deăng, túa pêi cheăng kâ, kơvâ hnê hriâm xuân hiăng ai hên tơdroăng ki pơhlêh ai pơxúa khât, ‘na cheăng khăm pơlât ivá châ chăn kuăn pơlê xuân châ pêi pro krâu khât tâ ƀă hên mâu tơdroăng  ki ê. Pôa Đinh Tiêu, Kăn ƀơrô ngăn ‘na hdroâng kuăn ngo dêi tơring kong ngo Vĩnh Thạnh tối ăm ‘nâi, tung lâp tơring kố ai 31 ngế ki châ kuăn pơlê loi tơngah. Mâu vâi krâ ki châ kuăn pơlê loi tơngah mê hiăng veăng ‘no dêi hnoăng cheăng kân tung hnê mơhnhôk vâi krâ-nhŏng o rak vế, pêi pro tiô troăng pơkâ, troăng hơlâ dêi Đảng, túa pơkâ cheăng, luât xiâm dêi Tơnêi têa. Kố châ ngăn cho “pâng kŏng ki xŏn” tung tơdroăng tơleăng, pro pơlĕm, mơnhên mâu tơdroăng ki tơhôu tơhêng, tơbriât tơxup tơnêi tíu pơla mâu kuăn pơlê. Tiô pôa Đinh Tiêu tối, mâu ngế ki châ kuăn pơlê loi tơngah kố hiăng rơtế  ƀă khu kăn pơkuâ hnê mơhnhôk vâi krâ-nhŏng o pleăng dêi tơnêi vâ mơjiâng troăng prôk.

“Drêng pêi pro tơdroăng cheăng tŏng gum ăm pơlê cheăm kơpong kong ngo, tâi tâng khu râ kăn pơkuâ rơtế pêi pro. Mâu ngế ki châ kuăn pơlê loi tơngah, đảng viên djâ troăng ahdrối tung hnoăng hnê tối, mơhnhôk khĕn, xuân môi tiah mâu tơdroăng ki mơdât vâi droh rơtăm tá hâi tro hơnăm rĕng xo on veăng, ƀă hnối mơdât khu ngế ki môi jâ pôa, hdrông hdrê xo dêi pó, hnê mơhnhôk kuăn pơlê pơtối rak vế khôi túa, vêa vong dêi hdroâng kuăn ngo, hnê djâ vâi krâ-nhŏng o pêi chiâk pêi deăng, pêi cheăng kâ. Mâu ngế ki châ kuăn pơlê loi tơngah, Kăn pơkuâ hnê ngăn Chi ƀô̆, kăn thôn hiăng hbru gum râ cheăm, Khu hnê mơhno râ tơring hiăng pơkâ pêi pro lĕm tro mâu tơdroăng cheăng, tơtro ƀă pơlê cheăm, pơkâ pêi pro tro mâu tơdroăng tơkêa bro tung mơnhông pêi cheăng kâ a mâu  pơlê cheăm hdroâng kuăn ngo ki ia amơngế”.

 Tơring Hoài An ai 3 to cheăm ối kơpong kong ngo Dak Mang, Bok Tới, Ân Sơn cho tíu ki rêh ối dêi hên mâu hdroâng kuăn ngo ki iâ mơngế cho Bơhéa, Hre. Pơla sap ing hơnăm 2021-2025, tơring Hoài Ân pêi pro tiô tơdroăng Tơkêa bro, vê hdró, ‘mâi rơnêu, xing xoăng vâ ăm kuăn pơlê châ mơjiâng pro hngêi ối tơniăn tung cheăm kong ngo kố. Ing kơxô̆ liăn mơ’no dêi Hnoăng cheăng xiâm tơnêi têa tung mơnhông pêi cheăng kâ - rêh ối pơlê pơla kơpong hdroâng kuăn ngo ki iâ mơngế ƀă kong ngo, tơring Hoài Ân hiăng mơjiâng pơlê T6, cho pơlê nếo Đăk Ƀok, cheăm Đăk Mang. Pơlê ki kố ối tung Tơdroăng tơkêa bro kơxô̆ 2: Vê hdró, ‘mâi xing xoăng, mơhno tối, rak vế tơniăn ăm kuăn pơlê lăm châ rêh ối a pơlê cheăm ki tơtro, ối tung Hnoăng cheăng xiâm tơnêi têa tng mơnhông pêi cheăng kâ - rêh ối pơlê pơla kơpong hdroâng kuăn ngo ki iâ mơngế bă kong ngo. Tơdroăng tơkêa bro kố châ pơxiâm pro sap ing hơnăm 2022 troh nôkố, hiăng pêi pro klêi ƀă hbrâ vâ pơcháu ăm Vi ƀan hnê ngăn cheăm Đak Mang vêh hdró, xing xoăng tơnêi pro hngêi ối ăm kuăn pơlê. Pôa Nguyễn Xuân Phong, Kăn phŏ hnê ngăn Vi ƀan tơring Hoài Ân vêh mơnhên tối, tơdroăng ki mơjiâng kơpong kuăn pơlê rêh ối a pơlê Đăk Ƀok, Đăk Mang hiăng veăng gum tơnêi tơniăn ăm kuăn pơlê châ pro hngêi, rĕng châ tơniăn tung rêh kâ ối:

“Ki păng ‘nâng tơdroăng ki tŏng gum dêi mâu ngế ki châ kuăn pơlê loi tơngah tung pơlê pơla hdroâng kuăn ngo cho vâ hnê mơhno tối nhên tơdroăng ki pơkâ pêi pro tiô tơdroăng mơnhông rêh kâ ối, pơlê pơla ƀă tung mâu tơdroăng ki kơdroh kơtiê tung kơpong hdroâng kuăn ngo ki iâ mơngế. Mê cho ki xiâm vâ tơdjêp, vâ Đảng, Tơnêi têa ƀă khu kăn pơkuâ ngăn cheăm, tơring pơtối hnê tối, tŏng gum ăm kuăn pơlê. Kơnôm ai mâu ngế ki châ kuăn pơlê loi tơngah kố, mâu tơdroăng ki pá puât dêi pơlê cheăm hiăng châ khu ki kố lêi tah lôi, xuân kơnôm ai khu kăn pơkuâ hnê ngăn mê tơdroăng cheăng thăm rế tơniăn”.

Rêm hơnăm, Khu hnê mơhno hdroâng kuăn ngo Bình Định hiăng po lâm hnê tối, mơhnhôk khĕn ‘na tơdroăng luât ăm mâu ngế ki châ kuăn pơlê loi tơngah. Pôa Đinh Văn Lung, Kăn pơkuâ hnê mhno khu kuăn ngo dêi kong pơlê Bình Định tối ăm ‘nâi: VI ƀan mâu tơring xuân hiăng hbrâ tối tơbleăng, hnê mohno luât ăm mâu ngế ki châ kuăn pơlê loi tơngah, ki rơkê plĕng tung hoăng cheăng hnê mơhno ăm vâi krâ-nkhŏng o ki châ kuăn pơlê loi tơngah.

“Dế nôkố, kong pơlê Bình Định hiăng ai 21 to cheăm châ tŏng gum Hnoăng cheăng xiâm dêi tơnêi têa tung mơnhông pêi cheăng kâ - rêh ối pơlê pơla tung kơpong hdroâng kuăn ngo ƀă kong ngo. Ƀă hnoăng cheăng dêi mơngế ki châ kuăn pơlê loi nhuô̆m tung hdroâng kuăn ngo ki veăng hnê tối, mơhnhôk tung kuăn pơlê hdroâng kuăn ngo tiô tơdroăng Pơkâ 1719 kố mê hnoăng cheăng dêi vâi krâ pêi pro kơhnâ, krâu khât. Drêng khu hnê mơhno Hdroâng kuăn ngo kong pơlê Bình Định ƀă mâu khu râ, kơvâ cheăng lo lăm hnê tối a mâu pơlê cheăm hdroâng kuăn ngo, mê mâu vâ krâ pơrá ai mâ, tí tăng ‘nâi, hlê plĕng, châ achê ƀă tơdroăng cheăng, maluâ ai 10 tơdroăng tơkêa pêi pro ki tro tiô pơcháu”.