A hâi leh mâu kăn ƀă kuăn pơlê thôn Đăk Tiêng Kơ Tu, cheăm Đăk La, tơring Đăk Hà, kong pơlê Kon Tum hiăng rơtế tơbâ tơdroăng mơjiâng ki lĕm dêi Măt trâ̆n tơnêi têa Việt Nam luâ 92 hơnăm mơjiâng ƀă mơnhông mơdêk. Pêi pro tơdroăng mơhnhôk “Tâi tâng kuăn pơlê rŭm môi tuăn mơjiâng thôn pơlê nếo, kơphô̆ rơkê plĕng’’ ƀă tơdroăng mơhnhôk “Pro pơ’lêh tơdroăng rêh ối túa pêi cheăng dêi hdroâng kuăn ngo, pro ăm hdroâng kuăn ngo mơ-eăm pêi cheăng vâ hluăn kơtiê krá tơniăn”.

Hơnăm nah, 147 rơpŏng kuăn pơlê ƀă vâ chê 1 rơpâu pơ’leăng mâ mơngế ki hên to vâi krâ nhŏng o hdroâng kuăn ngo  Bơhnéa thôn Đăk Tiêng Kơ Tu hiăng ‘nâi kơdôu mơ-eăm kơhnâ pêi cheăng kâ, tơrŭm môi tuăn dêi rơpó kum dêi rơpó rơtế mơnhông cheăng kâ pơ’lêh tơdroăng rêh ối. Nôkố thôn bú ối 3 rơpŏng kuăn pơlê kơtiê ƀă 9 rơpŏng vâ chê kơtiê; 136 rơpŏng kuăn pơlê mơnhên tối rơpŏng rêh ối lĕm tro.

Teăng mâ Kăn xiâm Đảng, Tơnêi têa, Vi ƀan Tíu xiâm Măt trâ̆n tơnêi têa Việt Nam Đăi tươ̆ng Phan Văn Giang, Ngế cheăng tung khu xiâm kal kí, Kăn xiâm phŏ hnê ngăn Đảng lêng Tíu xiâm, Ngế xiâm pơkuâ ngăn lêng rơkâu, khĕn kơdeăn mâu hnoăng ki kuăn pơlê thôn Đăk Tiêng Kơ Tu hiăng châ pêi pro. Đăi tươ̆ng tối nhên: Tơrŭm môi tuăn cho troăng rơhlâ, luât pơkâ ki kân dêi Đảng ƀă Pôa Hồ vâ pơtối rak vế ivá rơdêi môi tuăn hdroâng kuăn ngo.

Hiăng chiâng túa rêh ối lĕm, ing hên hơnăm kố tơdroăng tơkŭm po Hâi leh Tơrŭm môi tuăn kuăn pơlê a mâu tíu kuăn pơlê ối drêng troh leh tơbâ Hâi mơjiâng Măt trâ̆n Kuăn ngo rŭm môi tuăn Việt Nam hiăng chiâng tơdroăng ki lĕm tiah hmâ, djâ tơdroăng cheăng Măt trâ̆n troh ƀă kuăn pơlê, troh tơrêm rơpŏng hngêi ki rêm ngế kuăn pơlê. Hâi leh Rŭm môi tuăn tâi tâng hdroâng kuăn ngo hơnăm kố thăm rế ai pơxúa tâ klêi kơ’nâi 2 hơnăm tro tơdjâk troh xua pơreăng COVID-19, la ing hnoăng pơkuâ dêi Đảng, Tơnêi têa, veăng tơmâng dêi khu cheăng kal kí ƀă rơtế ‘no ivá tơdjuôm, môi tuăn dêi tâi tâng kuăn pơlê, tơnêi têa hiăng châ pêi hên tơdroăng cheăng ki kân tung tâi tâng mâu tơdroăng cheăng.

Ƀă hnoăng cheăng pêi tung la ngiâ Đăi tươ̆ng Phan Văn Giang, Ngế xiâm pơkuâ ngăn lêng pơkâ thế kong pơlê Kon Tum, tơring Đăk Hà ƀă kuăn pơlê thôn Đăk Tiêng Kơ Tu pơtối răk vế ki môi tuăn dêi rơpó pêi rơhéa mâu pơkâ mơnhông mơdêk ki Đảng, Tơnêi têa hiăng pơkâ:

 “Hbrâ hơ’lêh ƀă tơbleăng pêi ai pơxúa rơƀrê tơdroăng Pơkâ 19 ‘na pêi chiâk deăng, kuăn pơlê pêi chiâk ƀă thôn pơlê troh hơnăm 2030 ƀă hvái ngăn troh hơnăm 2045. Tơdroăng pơkâ 23 dêi Khu xiâm Kal kí ‘na mơnhông mơdêk cheăng kâ rêh ối tơniăn cheăng lêng kring tơniăn tung kơpong Tây Nguyên  tơdroăng vâ pêi troh hơnăm 2045.

Tơkŭm pêi tro mâu tơdroăng mơhnhôk tơ’noăng pâ nhoăm tơnêi têa dêi Kuăn pơlê. Khĕn kơdeăn, mơhnhôk mâu ngế pêi cheăng kơhnâ, mâu khu pú hên, mâu ngế ki kơhnâ rơkê  vâ pro xiâm djâ tơ’noăng. Kơhnâ veăng mơjiâng Đảng, mơjiâng khu kăn, mơjiâng mâu khu tơrŭm cheăng kal kí, pơlê pơla pêi cheăng lĕm tro, rơdêi. Tơbleăng pêi pro tro tơdroăng mơhnhôk tâi tâng kuăn pơlê môi tuăn dêi rơpó mơjiâng thôn pơlê rêh ối cheăng kâ tiô túa nếo kơphô̆ rơkê plĕng’’.

Rôh veăng leh Hâi Rŭm môi tuăn tâi tâng hdroâng kuăn ngo ƀă kuăn pơlê thôn Đăk Tiêng Kơ Tu, teăng mâ Kăn xiâm Đảng, Tơnêi têa Vi ƀan Tíu xiâm Măt trâ̆n Tơnêi têa Việt Nam, Đăi tươ̆ng Phan Văn Giang, Ngế cheăng tung Khu xiâm kal kí, Ngế xiâm pơkuâ ngăn lêng pro ăm 100 toăng hngêi rŭm môi tuăn ăm Kuăn pơlê mâu hdroâng kuăn ngo tung kong pơlê Kon Tum ƀă tâi tâng kơxô̆ liăn kơnâ 5 rơtal liăn, Đăi tươ̆ng rơtế ƀă Khu kăn, Vi ƀan Tíu xiâm Măt trâ̆n tơnêi têa Việt Nam ƀă kong pơlê Kon Tum xuân hiăng hbru tơmeăm ăm vâ chê 100 rơpŏng hngêi ai hnoăng, rơpŏng hngêi kơtiê dêi cheăm Đăk La.

Xuân tung rôh lăm pêi cheăng a kong pơlê Kon Tum drêng kố, Đăi tươ̆ng Phan Văn Giang, Ngế cheăng tung Khu xiâm kal kí, Ngế xiâm pơkuâ ngăn lêng lăm pôu, pêi cheăng a Sư đoân 10, Kuân đoân 3. Lăm pôu séa ngăn tơdroăng cheăng hriâm tâp a mâu đông lêng, tíu pêi cheăng, pôa  Phan Văn Giang hiăng mơhnhôk mâu kăn ƀô̆, mâu lêng, malối cho mâu lêng hdroâng kuăn ngo, kal thế pêi mâu tơdroăng cheăng mơ-eăm tơkâ luâ xơpá, mơdêk ki tơrŭm dêi rơpó, kơhnâ hriâm, pơtâp vâ chiâng hlối khên râng pháu hơ’nêa ki nếo.

Đăi tươ̆ng Phan Văn Giang pơkâ thế ngế pơkuâ mâu đông lêng thế pêi pro kơtăng tơdroăng hnê pơtâp mâu tơdroăng vâ tơplâ, pêi tro hnoăng cheăng lêng, tơdroăng kring gak pơlê pơla cheăm bêng a kơpong Tây Nguyên. Đăi tươ̆ng Phan Văn Giang pơkâ thế, tung la ngiâ, mâu đông lêng dêi Sư đoân 10 kal tơrŭm krá tâ ƀă khu râ Đảng, mâu kăn ƀă mâu lêng tơplâ tơring kong pơlê tí tăng ‘nâi plĕng tơdroăng tung pơlê, cheăm, tơring, pêi tro hnoăng cheăng hnê mơhnhôk, veăng kum kuăn pơlê mơnhông cheăng kâ, kơdroh kơ klêa, xăm kơtiê, mơjiâng tơdroăng cheăng kal kí cheăm, bêng, tơring, kong pơlê krá rơdêi.