Hâi lơ 6/12, Kăn pơkuâ Kŏng an kong pơlê Dak Nông hiăng troh mơhnhôk, diâp pri ăm mâu kăn ƀô̆ lêng Ƀơrô gâk kring măng ƀă ƀơrô hbrâ tơplâ mơdât xúa kơmăi kơmok rơkê rơtế ƀă Kŏng an 2 tơring Dak Rlâp prế Dak Glong, rêm tíu pêi cheăng ai 5 rơtuh liăn, xua tơdroăng ki rơkê tung tơplâ mơdât, tăng rup plâ ‘nhiê 3 rôh pro xôi xah ƀai kâ liăn ƀă tơdroăng ki kă đô̆ kơtu ƀa long.

Hdrối mê, mâu tíu cheăng Kŏng an kong pơlê hiăng châ kăn pơkuâ ngăn Đảng Dak Nông diâp tơdrêng 120 rơtuh liăn klêi kơ’nâi plâ ‘nhiê rôh ká đô̆ kơtu ƀa long vâ chê 600 rơtal liăn.

Pêi pro rôh plâ ‘nhiê, tăng rup mâu ngế pro xôi, rak tơniăn gâk kring, gâk vế Têt Lo hơnăm nếo Quý Mão 2023, malối cho tung pơla po World Cup, Kŏng an kong pơlê Dak Nông hiăng plâ mơdât, tăng rup plâ ‘nhiê tơdroăng ki xah ƀai kâ liăn tiô tơdroăng ki kă đô̆ kơtú ƀa long ing măng internet kân má môi sap nah troh nôkố a kong pơlê kố.

Kŏng an Dak Nông hiăng rup kroăng 17 ngế, rup xo 4 toăng kơmăi tĭnh râng kŏng, hên tài khoản hngêi rak liăn, phôn râng kŏng, kơmăi tĭnh râng kŏng, rơxế ô tô ƀă hên ki ê, apoăng mơnhên kơxô̆ liăn ai tơdjâk troh tơdroăng ki xah ƀai kâ liăn vâ chê 600 rơtal.

Ki rơhêng vâ tối, cho tung kơxô̆ liăn ki mâu ngế ki tro rup ai Lương Ngọc Thành, chuyên viên Khu ngăn kế tơmeăm tung têa, a tơnêi ƀă hyôh kong prâi kong pơlê Dak Nông, ƀă Nguyễn Ngọc Trung, chuyên viên Khu ngăn Khoa hok kong ngê̆ kong pơlê Dak Nông. Lương Ngọc Thành, kot mâ hơnăm 1993 châ mơnhên cho ngế ki xiâm, pơkuâ mâu tơdroăng cheăng dêi tơdroăng kă đô̆ kơtú ƀa long vâ chê 600 rơtal liăn.