VOV4.Xơ Đăng - Drêng troh leh tơbâ 75 hơnăm hâi mố đô̆i rong râ - hlâ hía, lơ 10/7, khu kăn pơkuâ hnê ngăn Đảng kong pơlê, Hô̆i đong, Vi ƀan hnê ngăn, Vi ƀan Măt trâ̆n tơnêi têa Việt Nam kong pơlê Hà Giang tơkŭm po leh pôu ngăn, tơbâ ƀă ‘mé 10 kơxêng kiâ mâu mố đô̆i ki hiăng hlâ tung rôh tơplâ kring vế tơnêi têa ‘mé a ilâng kiâ Vị Xuyên. Veăng leh mê ai pôa Trương Tấn Sang, Kăn xiâm hnê ngăn tơnêi têa hneăng hdrối, pôa Vũ Đức Đam, Ngế pro xiâm phŏ hnê ngăn tơnêi têa.

Tung chôu phut hmái hơtĭng, nhoăm pâ, mâu kăn chôu nháng xú lĕm, koh tơbâ hnoăng ki kân ki mâu ngế hiăng hlâ ai hnoăng xúa tơplâ ƀă kring vế tơnêi têa. Kố cho mâu ngế hiăng rơtế ƀă dêi rơpó pơla mâu lêng ƀă kuăn pơlê rêm hdroâng kuăn ngo kong pơlê Hà Giang khên tơnôu ối amê, khên tơnôu tơplâ troh hlâ, mơ-eăm kring vế tơnêi tĭng dêi tơnêi têa tung tơplâ kring vế tíu tơkăng kong peăng Kơnhŏng.

Kố cho hâi leh, kơdrâm kuăn pơlê ƀă mâu lêng hơnăm hiăng krâ ki hiăng veăng tơplâ a tíu tơplâ Vị Xuyên mê nah mơhno hiâm mơno ối pâ chôu vế chiâng rơrêk tung hiâm mơno drêng hlo mâu pú tơná tơkŭm ’mé a ilâng kiâ Tơnêi têa a Vị Xuyên.

Gương tơplôu ƀă tơbleăng