Kơxo lơ 13/12, a Hngêi Kuô̆k hô̆i, pơxiâm po hneăng hôp má 18 dêi Vi ƀan pơkuâ cheăng Kuô̆k hô̆i. Hneăng hôp po tung 3 hâi, Vi ƀan pơkuâ cheăng Kuô̆k hô̆i ăm hnê tối ƀă tơbleăng hên tơdroăng kal. ‘Na tơdroăng mơjiâng luât, Vi ƀan pơkuâ cheăng Kuô̆k hô̆i ăm hnê tối ƀă séa ngăn tơbleăng Luât ‘mâi hơ’lêh, tơ’nôm mâu tơdroăng dêi Luât ‘na tơdroăng chêh pro, tơdroăng séa ngăn, pơkâ xúa mâu luât pơxâu phak liăn a Hngêi tơleăng kuăn pơlê; Séa ngăn, pơkâ tơdroăng xo tơdroăng veăng hnê khĕn dêi kuăn pơlê ’na tơdroăng tơkêa bro Luât Tơnêi (ki ‘mâi hơ’lêh). Pakĭng mê, ăm hnê tối ‘na troăng rơhlâ pơtroh, tơmâng xo, ‘mâi hơ’lêh hlá mơ-éa chêh Luât khăm, pơlât (hơ’lêh).

Xuân a hneăng hôp, Vi ƀan pơkuâ cheăng Kuô̆k hô̆i ăm hnê tối ‘na tơdroăng ‘mâi hơ’lêh tơdroăng hbrâ liăn vâ tơniăn ki hâi xúa tâi a hơnăm 2021 dêi Khu xiâm ngăn ‘na bro hnoăng mơhá ƀă Khu xiâm ngăn tíu tê mơdró kăng kong; tơdroăng tơ’nôm tơdroăng tơkêa pro liăn ngân tơnêi têa liăn tŏng kum ôh tá tơvêh dêi kong têa ê hơnăm 2021 ƀă ăm tơ’nôm liăn rôe phái dêi tơnêi têa vâ ‘măn kơdĭng.