Pơxiâm sap hâi lơ 3/1 troh hâi lơ 15/3, tâi tâng tơdroăng chêh ‘na luât tơnêi ki (‘mâi hơ ‘lêh) châ tơmâng xo ing tơdroăng veăng hnê tối tung lâp lu kuăn pơlê, vâ pơtối rak vế ki pơkuâ xiâm, tuăn ngôa rơkê, tơdroăng ki mơ-eăm dêi kuăn pơlê. A rôh hôp dêi Vi ƀan pơkuâ Kuô̆k hô̆i rôh má 18 kố nah, pôa Vương Đình Huệ, Kăn xiâm hnê ngăn Kuô̆k hô̆i tối pơchân, tơdroăng tơmâng xo mâu tơdroăng veăng hnê tối dêi kuăn pơlê a tơdroăng hlá mơ-éa luât Tơnêi ki (‘mâi hơ’lêh) thế pêi pro khât, tơtro tơƀrê, ví tơdroăng bú pê mơhno to a ngâ. 

Tơdroăng tơmâng xo mâu tơdroăng veăng hnê khĕn kô chiâng chêh ƀă hlá mơ-éa, tơkŭm po rôh hôp, lơ hôp tơpui tơno; thế rak tơniăn tro khât, ai pơxúa ƀă hlối tơƀrê, ai tiô púi vâ dêi kuăn pơlê. Ing mâu troăng rơhlâ, tơdroăng hnê tối dêi khu chêh hlá tơbeăng, hên ngế kăn ƀô̆, đảng viên ƀă kuăn pơlê tối tiah kố, tơdroăng tơmâng xo hnê tối thế tơkŭm tŭm tâi tâng, tro nhên ƀă châ tí tăng ‘nâi plĕng, tơmâng xo, tối nhên kơtăng vâ pêi klêi tơdroăng chêh tối tung hlá mơ-éa luât Tơnêi ki (‘mâi hơ’lêh). Tơdroăng pơkâ dêi Vi ƀan pơkuâ cheăng Kuô̆k hô̆i pơkâ thế, mơdêk hnê tối, mơhnhôk kuăn pơlê, veăng hnê tối tơdroăng mê.