VOV4.Xơ Đăng - Măng tĭng hdrối, drêng hâi pêi cheăng apoăng dêi hơnăm nếo Nhâm Dần, pôa Vương Đình Huệ, kăn xiâm hnê ngăn Kuô̆k hô̆i ƀă mâu kăn pơkuâ Kuô̆k hô̆i hiăng trâm mâ, pơcháu hnoăng cheăng ăm mâu kăn Kuô̆k hô̆i ki pơkuâ, kăn ƀô̆, kông chưk, viên chưk ƀă mâu ngế pêi cheăng dêi Ƀơrô cheăng Kuô̆k hô̆i. Tơpui a rôh trâm mâ, pôa Vương Đình Huệ, Kăn xiâm hnê ngăn Kuô̆k hô̆i tối nhên, rơhêng vâ khên tơnôu, rơhêng vâ mơnhông, hiâm mơno khên tơnôu dêi hdroâng kuăn ngo, tơkôm tung mâu tơdroăng mơnhông tung la ngiâ, tung mê ai tơdroăng mơnhông tơƀrê ƀă troăng hơlâ pơkâ.

A rôh trâm mâ, pôa Vương Đình Huệ, Kăn xiâm hnê ngăn Kuô̆k hô̆i hiăng tơbleăng ‘na tơdroăng hneăng lăm pôu rơkâu Têt Lo hơnăm nếo dêi Kăn xiâm hnê ngăn Kuô̆k hô̆i rơtế ƀă mâu kăn cheăng a 6 to kong pơlê peăng Hdroh ƀă mâu tơdroăng pêi pro dêi kăn xiâm phŏ hnê ngăn Kuô̆k hô̆i. Tối tiah kố, hơnăm nah, ai hên tơdroăng cheăng tơvâ tơvâ, hên tơdroăng tô tuăn tung pêi cheăng, la ing tối tơbleăng rê̆ng dêi mâu Ngế cheăng tung Vi ƀan pơkuâ cheăng Kuô̆k hô̆i, kuăn pơlê khê̆n kơdeăn khât mâu tơdroăng cheăng pêi dêi kuô̆k hô̆i.

Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng a rôh trâm mâ

Mâu kăn Kuô̆k hô̆i, kăn ƀô̆, mâu ngế pêi cheăng tung Ƀơrô Kuô̆k hô̆i ai hnoăng hâk tơngăm mâu tơdroăng hiăng pêi châ tơ-ƀrê mê, la ôh tá chiâng phêp tơngôu, pôi tá ngăn hiăng hôm a mâu tơdroăng ki hiăng châ pêi pro.

Kăn xiâm hnê ngăn Kuô̆k hô̆i ăm ‘nâi, hơnăm 2022 pơtối cho hơnăm ki kal, hơnăm pakĭng pêi pro tơdroăng Pơkâ dêi Tíu xiâm, mâu tơdroăng pơkâ dêi Kuô̆k hô̆i. Kăn hnê ngăn Đảng, Tơnêi têa, kuăn pơlê, mâu kuăn pơlê tơmâng vâ ‘nâi plĕng ƀă pơtối tơngah a tơdroăng cheăng dêi Kuô̆k hô̆i, mê kal thế hbrâ tŭm tơdroăng, pro mâu tơdroăng ki tơviah chiâng mâu tơdroăng ki tiah hmâ vâ ai tiô tơdroăng púi vâ tung rêh ối.

‘’Pôa Hồ hiăng tối, Kuô̆k hô̆i pin cho vâ mơhno ăm hlo tơdroăng ki môi tuăn dêi rơpó tung tâi tâng hdroâng kuăn ngo ƀă ing tuăn mơ-eăm dêi mâu hdroâng kuăn ngo Việt Nam. Púi vâ mơnhông rơdêi, púi vâ mơnhông tơ-ƀrê, ai tuăn mơ-eăm xông rơdêi dế hdroâng kuăn ngo, thế tơ kôm a mâu tơdroăng pêi tơ-ƀrê, tung mê ai tơ-ƀrê khât ‘na luât pơkâ.

Xua mê, hnoăng cheăng pêi dêi Kuô̆k hô̆i ối kân ‘nâng. Pro ti lâi  vâ ai môi tơdroăng ‘na luât ‘na tơdroăng pêi thế tơdâng tơ’mô, tŭm, môi tuăn, tơbleăng ăm ‘nâi, tơdrăng, tơ’lêi pêi. ‘Na tơdroăng ki kal thế ai tiô tơdroăng púi vâ tơ-ƀrê tơnêi têa rĕng châ mơnhông tơ-ƀrê, krá tơniăn tâ nếo ƀă hlối tơrŭm cheăng ƀă mâu kong têa tung lâp plâi tơnêi rơdâ tâ. Mê cho  tơdroăng ki pin thế tơchĕng tơmiêt.

Rêm ngế kăn Kuô̆k hô̆i, kăn ƀô̆, mâu ngế pơkuâ kơ koan tíu pêi cheăng, mâu ngế pêi cheăng a rêm kơ koan, tơrêm tơdroăng cheăng pêi ki pơrá phá dêi rơpó thế ‘nâi tơchê̆ng tơmiât tơdroăng kố pin mơjiâng luât, mơjiâng luât pơkâ cheăng cho vâ rế mơnhông mơdêk tơ-ƀrê’’.

Pôa Vương Đình Huệ, Kăn xiâm hnê ngăn Kuô̆k hô̆i pơkâ thế, tơdroăng séa ngăn, klêi Tết Lo hơnăm nếo, mâu Ngế pơkuâ séa ngăn thế pêi cheăng tâi ivá vâ pê klêi 4 tơdroăng kal  ‘na séa ngăn dêi Kuô̆k hô̆i hiăng pơkâ; pakĭng séa ngăn 107 tơdroăng tơkêa bro tung Tơdroăng pêi pro dêi Đảng khu kăn Kuô̆k hô̆i pêi tơdroăng Pơkâ hneăng hôp má 13 dêi Đảng ƀă 137 tơdroăng cheăng mơjiâng luât  tiô tối mơgêi kơxô̆ 19 dêi Khu xiâm kal kí ƀă Tơdroăng tơkêa bro Troăng rơhlâ Tơdroăng mơjiâng luât hneăng pêi cheăng dêi Kuô̆k hô̆i hneăng 15.

Mơhno pá môi hdroh nếo, ki xêt, ki tơ-ƀrê tung séa ngăn dêi Kuô̆k hô̆i vâ tơniăn tơnêi têa pêi pro tro luât Xah hô̆i chuh nghiah dêi kuăn pơlê, xua kuăn pơlê, tiô pôa Vương Định Huệ, Kăn xiâm hnê ngăn Kuô̆k hô̆i tối, kuăn pơlê thế châ xúa mâu tơdroăng cheăng pêi ki tơ-ƀrê dêi tơdroăng mơnhông cheăng kâ-rêh ối, dêi tơdroăng pơ’lêh nếo. Pakĭng mê, tŭm tơdroăng pơkâ dêi Kuô̆k hô̆i ‘na mâu tơdroăng ki kal dêi tơnêi têa thế pơkâ ki pơxúa dêi tơnêi têa, ki pơxúa dêi kuăn pơlê mê ki hdrối tâ.

Ƀă tơdroăng cheăng pơkâ mâu tơdroăng kal dêi tơnêi têa, pôa Vương Đình Huệ, Kăn xiâm hnê ngăn Kuô̆k hô̆i tối pơchân, tŭm tơdroăng pơkâ dêi Kuô̆k hô̆i, tơdroăng ki kal dêi tơnêi têa thế pơkâ ki pơxúa dêi tơnêi têa, hdroâng kuăn ngo ahdrối. ing tơdroăng ki pơxúa dêi  tơnêi têa dêi hdroâng kuăn ngo  vâ pin  tơpui kâ, séa ngăn, tối tơbleăng, tung ki pơxúa dêi tơnêi têa, hdroâng kuăn ngo ai ki pơxúa dêi kuăn pơlê ƀă khu mơdró.

Pôa Vương Đình Huệ, Kăn xiâm hnê ngăn kuô̆k hô̆i loi khât, ƀă tơdroăng hmâ pêi pro ki lĕm tro 76 hơnăm hdrối nah dêi Kuô̆k hô̆i Việt Nam, mâu tơdroăng pêi tơ-ƀrê dêi Kuô̆k hô̆i hneăng 15 hiăng châ pêi tơ-ƀrê tung hơnăm apoăng dêi hneăng, mâu kăn Kuô̆k hô̆i, kăn ƀô̆, mâu ngế pêi cheăng tung Ƀơrô Kuô̆k hô̆i kô pơtối tơrŭm môi tuăn môi mơno, pơtối rak vế ki rơkê pú hên, vâ pê klêi mâu tơdroăng cheăng dêi Đảng, Tơnêi têa, kuăn pơlê pơcháu, veăng mơjiâng tơnêi têa Việt Nam rế ton rế rơdêi, kuăn pơlê rế phâi tơtô, hơniâp ro, tơxâng ƀă tuăn loi, tơdroăng púi tơngah dêi Đảng, tơnêi têa, kuăn pơlê.

VOV 1

Gương tơplôu ƀă tơbleăng