VOV4.Xơ Đăng - Tiô Tơbleăng “Tơdroăng kơtiê hên troăng Việt Nam 2021” kô ai tơ’nôm 10 rơtuh ngế châ pơxúa sap ing mâu troăng hơlâ tŏng kum ƀă tơdroăng pơkâ dêi tơnêi Chin phuh ‘na tŏng kum pơlê pơla ƀă kơdroh kơtiê sap hơnăm 2021 – 2025. Rơtế ƀă tơdroăng kơdroh tah hrâ mơnguâ kơtiê xơpá, malối cho a mâu kơpong hngế hngo, sap ing hơnăm 2020, Chin phuh hiăng ai môi Tơdroăng Pơkâ tơnêi têa kum krê ăm kơpong hdroâng kuăn ngo ƀă peăng kong ngo. Tơkâ luâ 2 hơnăm tơrŭm pơla 10 kơ koan, khu xiâm kơvâ cheăng, lối chât to kong pơlê tung lâp tơnêi têa, tơdroăng kố hiăng pêi pro tro mâu hvêa chêng prôk ki kal vâ pêi pro pơkâ “Pôi tá lôi kơbố pá rŏng”.

Ing môi rơpŏng ối tung khu kơtiê ton tĕng, rơpŏng nâ Lò Thị Da, ối a cheăm Quang Chiểu, tơring Mường Lát hiăng châ tŏng kum hdrê pêt, mơnăn păn ing tơdroăng kơdroh kơtiê dêi cheăm. Klêi kơ’nâi 5 hơnăm pêi pro, troh nôkố rơpŏng nâ hiăng ai tâi tâng khu kơpôu, ro, chu, í, peâp tâk châ hrĭng to, rơtế ai kơdrum plâi kâ, rêm hơnăm pêi lo châ chât rơtuh liăn, chiâng rơpŏng ki kro mơdrŏng dêi pơlê.

“Kơnôm ai tơdroăng tŏng kum dêi cheăm mê á kơdroh tô tuăn ‘na kơxô̆ liăn mơ’no pêi cheăng, bu păn mơnăn mơnôa, pêt mơjiâng tơmeăm, xuân tơ’lêi hlâu xua á ôh tá ai liăn mơ’no cheăng laga châ tŏng kum hdrê pêt, mơnăn păn. ‘Na kih thuât mê xuân châ tŏng kum ing kơxop hlá mơ-éa, kăn ƀô̆ hnê mơhno kih thuât vâ á pêi tiô’’.

Dă K’Nàng cho cheăm apoăng dêi tơring Đam Rông (Lâm Đồng) châ mơnhên hluăn ing kơtiê

Rah xo rơpŏng vâ mơnúa pêi pro, vâ djâ troăng ahdrối ƀă po rơdâ cho môi tung mâu troăng pêi ki kong pơlê Thanh Hóa pêi pro Tơdroăng pơkâ xiâm Tơnêi têa ăm krê kơpong vâi krâ hdroâng kuăn ngo ƀă kơpong kong ngo. Pôa Hà Văn Thuỷ, Kăn phŏ pơkuâ hnê ngăn cheăng hnê mơhno má môi tơring Quan Hóa tối ăm ‘nâi, thế pơ’lêh troăng tơmiât pêi tung pêi pro tơdroăng pêi cheăng, tơdroăng tơkêa bro; tơkŭm pơtâng tối, mơhnhôk, djâ troăng ahdrối dêi kăn ƀô̆, đảng viên, tah lôi troăng tơmiât kơnôm to a Tơnêi têa:

‘’Hdrối nah, tŏng kum ăm tê kơtê, xing xoăng ăm tê kơtê laga pơkâ nôkố cho kuăn pơlê thế rơtế tơdroăng pêi cheăng dêi tơdroăng tơkêa bro, rah mâu ngế tŭm pơkâ. Nôkố ki ăm vâ tŏng kum tơdrêng kơdroh vâ tơkŭm mơ’no liăn cheăng tŏng kum mơnhông mơdêk kơpong, mơnhông mơdêk cheăng kâ rêh ối pơlê pơla, pro tơ’lêi hlâu mơnhông mơdêk pêt mơjiâng krá tơniăn’’.

Pôa Hầu A Lềnh, Ngế xiâm, Kăn pơkuâ Vi ƀan hdroâng kuăn ngo

Tơdroăng pơkâ xiâm tơnêi têa ăm kơpong vâi krâ hdroâng kuăn ngo hiăng châ Kuô̆k hô̆i tơbleăng ăm pêi pro a Pơkâ kơxô̆ 120 hâi lơ 19/6/2020. Troăng pêi xing xoăng kơxô̆ liăn hiăng châ Vi ƀan pơkuâ Kuô̆k hô̆i kĭ ăm pêi pro a hâi lơ 22/5/2022. Kố cho Tơdroăng pêi ki kân, roh apoăng dêi Đảng, Chin phuh ăm kơxô̆ liăn ƀă tơdroăng tơmâng ki má môi, pêi tiô ton tơdroăng mơnhông troăng hơlâ kum hdroâng kuăn ngo tung hneăng hdrối nah.

Tiô Ngế xiâm pơkuâ Vi ƀan hdroâng kuăn ngo dêi Kuô̆k hô̆i, kố cho tơdroăng ki má môi ƀă kân; tơkŭm a kong pơlê 13.222 thôn ki pá puât ối tung 3.434 cheăm dêi 51 kong pơlê kơpong vâi krâ hdroâng kuăn ngo. Kố cho mâu kơpong vâi krâ kuăn pơlê ai tơdroăng cheăng kâ rêh ối pơlê pơla pá puât má môi tung lâp tơnêi têa, ối a 3 kơpong pêi ton xŏn cho  peăng mâ hâi lo pá Hdroh tơnêi têa, Tây Nguyên ƀă peăng mâ hâi lo pá Kơnhŏng Tơnêi têa.

Xua mê, tơdroăng chêh xo vâ ‘nâi, tơpui tơno ƀă mâu kong pơlê vâ mơnhên tŭm, chêh tối tung tơbleăng chiâng pêi pro klêi kơ’nâi ai Pơkâ Kuô̆k hô̆i cho tơdroăng pêi thế mơdon hên chôu phut. Pôa Hầu A Lềnh, Ngế xiâm, Kăn pơkuâ Vi ƀan hdroâng kuăn ngo tối ăm ‘nâi:

‘’Tơdroăng tơrŭm ƀă mâu khu xiâm, kơvâ cheăng, krê Tơdroăng kố ai 10 khu xiâm, kơvâ cheăng veăng tơkŭm pêi pro. Kố cho tơdroăng pêi ki kân ai 10 tơdroăng tơkêa bro. 14 tơdroăng tơkêa bro ki kŭn, 36 hnoăng cheăng. Mê cho 36 troăng hơlâ, châ tơkŭm ing mâu troăng hơlâ ối xêt khât ing hneăng hdrối nah mot a kố.

Xua mê Tơdroăng pêi cho hên hĕng, ai tá troăng hơlâ nếo, ai tá troăng hơlâ ton dế ai châ tơƀrê. Xua mê tơdroăng tơkŭm ‘mot vâ mơjiâng môi mơ-éa hnê mơhno pêi pro Tơdroăng cho pêi cheăng tâi ivá, rơkê tơtro ƀă nhên. Xua kố cho roh apoăng Đảng ƀă Tơnêi têa ‘măn kơxô̆ liăn krê xua mê ôh tá ăm phêp pêi tơngôu; kal ai tơdroăng vêh séa ngăn đi đo’’.

Mơhé liăn ngân ôh tá ai hên ối pá puât laga Kuô̆k hô̆i, Chin phuh hiăng mơdêk kơxô̆ mơ’no liăn cheăng vâ kơdroh kơtiê châ péa xôh tâng pơchông ƀă hneăng hdrối, đi đo hnê mơhno vâ pêi pro tŭm troăng hơlâ kơdroh kơtiê, mơ-eăm pêi pro Tơdroăng pơkâ xiâm tơnêi têa kơdroh kơtiê krá tơniăn tiô troăng tŭm têk, hên troăng ƀă kơdroh ki vêh kơtiê; pro tơ’lêi hlâu ăm mơngế kơtiê, rơpŏng kơtiê tơ’lêi hlâu châ achê mâu tơdroăng mơdró pơlê pơla ki xiâm, ki má lối cho a mâu kơpong thôn pơlê, kơpong kong ngo, rơlố, kum pêi pro pơkâ xiâm tơtêk cheăng kâ, tơniăn rêh ối pơlê pơla, pêi kêi đeăng mâu pơkâ kơdroh kơxô̆ rơpŏng kơtiê.

Kơxô̆ liăn tŏng kum pơlê pơla vâ chê 62 rơpâu rơtal liăn ki ê rơnêu tơmeăm khoăng klêi kơ’nâi pơreăng COVID-19 xông tâ tú, rơpâu tâ̆n phái tŏng kum thâ ƀă rơpâu rơtal liăn ing liăn hbrâ dêi tơnêi têa vâ tŏng kum kuăn pơlê kơpong peăng Tơdế tơnêi têa rơnêu kế tơmeăm khoăng ‘’têa kân lân lu, khía mơhot’’ cho tơdroăng mơ-eăm kân, teăm tơdrêng, vâ kuăn pơlê châ xúa hnoăng rêh ối, hnoăng châ rak ngăn khăm pơlât, hnoăng tăng cheăng pêi. Ôh tá ai ki klâi phá tơ-ê, mê cho mâu tơdroăng mơ-eăm xua hnoăng kuăn mơngế dêi Đảng, Tơnêi têa Việt Nam.

Trần Sỹ Đức/VOV1/Tơplôu: A Sa Ly