VOV4.Xơ Đăng - Tŏng kum mâu ai hnoăng kăch măng cho luât pơkâ tŏng kum ki phá mơhno tơdroăng “Niân tiah hâi kố kơnôm hnoăng dêi rơxông hdrối’’ dêi Đảng, Tơnêi têa ƀă mâu ngế hiăng pleăng hnoăng tơná tơlâ ta troh hlâ ăm tơdroăng kăch măng. Sap ing Pôa Hồ Chí Minh, Kăn xiâm hnê ngăn tơnêi têa xo hâi lơ 27/7 cho Hâi lêng rong râ hlâ hía, 75 hơnăm hdrối, tơdroăng cheăng ‘na luât, luât tŏng kum mâu ngế ai hnoăng châ tơbleăng tâi tâng, ôh tá xê to mơhno ki tŏng kum phá dêi Đảng, Tơnêi têa ƀă mâu ngế ai hnoăng ki ối veăng ‘no hnoăng kal khât tung rak tơniăn rêh ối pơlê pơla, mơnhông mơdêk tơnêi têa.

Ƀă mâu troăng hơlâ kơjo tŏng kum mơngế ai hnoăng rế hía rế châ tŭm tơniăn ƀă tá khu pơkuâ tơdroăng kal kí veăng pêi pro tơdâng tơ’mô, tơdroăng rak ngăn mơngế ai hnoăng pơ’lêh rơdêi, mơjiâng tơdroăng pâ mơnê hnoăng kân kĭn trâu hơngế, pêi đi đo ing Tơnêi têa troh mâu pơlê, thôn, kơtâu. Troh nôkố, lâp tơnêi têa hiăng mơnhên châ lối 9,2 rơtuh ngế ai hnoăng, tung mê ai lối 1,3 rơtuh ngế ai hnoăng châ tŏng kum liăn rêm khế.

Rêm hơnăm mơhá liăn tŏng kum môi xôh ăm 6 troh 8 rơpâu roh ngế, djâ lối 580 rơpâu roh ngế ai hnoăng rak ngăn rêm hneăng ƀă tŏng kum hnê hriâm ăm dâng 40 rơpâu roh ngế. Kơlo tŏng kum, mơhá liăn kơjo mơngế ai hnoăng châ pơhlêh tâk tơtro ƀă troăng pơ’lêh tâk kơlo liăn khế ki xiâm.

Tiô pơkâ kơxô̆ 75, hâi lơ 24/7/2021 dêi Chin phuh, pơkâ kơlo liăn châ tŏng kum, tŏng kum ăm tơ’nôm ƀă mâu troăng mơhá mơngế ai hnoăng ƀă kăch măng hiăng châ pơ’lêh mơdêk mâu kơlo tŏng kum, tŏng tơ’nôm ăm mâu ngế ai hnoăng, ƀă kơxô̆ liăn tâk tơ’nôm dâng 800 rơtal liăn vâ pơ’lêh tơ’nôm dâng 10 troăng hơlâ nếo ăm mơngế ai hnoăng ƀă nhŏng o mơngế ai hnoăng môi tiah: Tŏng kum liăn xối pleăng mô đô̆i hlâ tung tơplâ xâ châ pơ’lêh sap ing 500 rơpâu liăn/01 ngế mô đô̆i hlâ tung tơplâ xâ/01 hơnăm tâk 1 rơtuh 400 rơpâu liăn/01 ngế mô đô̆i hlâ tung tơplâ xâ/01 hơnăm; kơxô̆ liăn rak ngăn a rơpŏng hngêi châ pơ’lêh tâk sap ing 1 rơtuh 110 rơpâu liăn tâk 1 rơtuh 461 rơpâu 600 liăn/ngế/hơnăm; kơxô̆ liăn rak ngăn tơkŭm xuân châ pơ’lêh tâk sap ing 2 rơtuh 200 rơpâu liăn tâk 2 rơtuh 923 rơpâu 200 liăn/ngế/hơnăm ƀă hía hé.

Khu râ kăn teăng mâ mơngế ai hnoăng tơnêi têa lăm pôu pơlê kong xiâm Hà Nội

Pôa Châu Văn Đa, kăn pơkuâ ƀơrô Mơngế ai hnoăng, Khu pơkuâ cheăng pêi Mô đô̆i rong râ ƀă Rêh ối pơlê pơla kong pơlê Trà Vinh tối:

‘’Pêi pro troăng hơlâ kơjo mơngế ai hnoăng tơnêi têa mê Trà Vinh nôkố dế pơkuâ vâ chê 65 rơpâu ngế ai hnoăng tơnêi têa, tung mê, lối 19 rơpâu ngế mô đô̆i rong râ hlâ hía, ƀă mô đô̆i châi tamo cho lối 11 rơpâu ngế ƀă mâu ngế ki ê. Nôkố, Trà Vinh dế tŏng kum ăm vâ chê 12 rơpâu ngế, mơhá liăn rêm khế tiô mâu troăng hơlâ ki kơjo ƀă mơngế ai hnoăng ƀă kăch măng.

Nôkố, tiô pơkâ, Khu pơkuâ cheăng pêi Mô đô̆i rong râ ƀă rak ngăn pơlê pơla pơtroh kơxô̆ liăn ăm mâu kong pơlê mơhá sap ing hâi lơ 1 troh hâi lơ 10  ƀă hâi môi tơdroăng mơhá liăn châ pơtroh ing tíu pơtroh kơthô ƀă pêi pro kêi hdrối hâi lơ 10 rêm khế’’.

Jâ Hồ Thị Châu Loan, Kăn phŏ pơkuâ Khu pơkuâ cheăng pêi mô đô̆i rong râ ƀă rêh ối pơlê pơla kong pơlê Nghệ An tối ăm ‘nâi, kong pơlê nôkố ai lối 68 rơpâu ngế ai hnoăng, ối má 3 tung lâp tơnêi têa. Rêm khế liăn ngân tơnêi têa mơhá liăn ăm mơngế ai hnoăng tơnêi têa lối 136 rơtal liăn.

‘’Rêm hơnăm klăng hâi lơ 27/7, kong pơlê xuân tơbleăng mâu pơkâ vâ tơkŭm po mâu tơdroăng leh tơbâ Hâi mô đô̆i rong râ hlâ hía tung lâp kong pơlê tơxâng, kơnâ ƀă xuân kân krip. Mơhé cho kong pơlê ối hên pá puât, ƀă mơngế ai hnoăng kân, laga ngin xuân mơ-eăm vâ pêi pro tơtro mâu troăng pơkâ pêi, troăng hơlâ ăm mơngế ai hnoăng ƀă kăch măng, tơniăn tŭm tơdrêng. Leh tơbâ 75 hơnăm Hâi mô đô̆i rong râ hlâ hía, mê pakĭng tơdroăng tiah hmâ rêm hơnăm, mê hơnăm kố kong pơlê ối ai tơdroăng pêi cheăng, mê cho ngin thế tơkŭm po hneăng hôp trâm mâ, kheăn kơdeăn mơngế ai hnoăng tơnêi têa tung kong pơlê’’.

Pôa Nguyễn Bá Hoan, Ngế xiâm phŏ pơkuâ cheăng pêi mô đô̆i rong râ ƀă rêh ối pơlê pơla trâm mâ mơngế ai hnoăng tơnêi têa

Pakĭng mâu troăng hơlâ dêi Đảng, Tơnêi têa, tơdroăng tơdjuôm ivá dêi pơlê pơla ƀă rơpŏng mơngế ai hnoăng tơnêi têa xuân châ tơmâng tŏng kum ƀă ai hên tơdroăng ki tơxâng. Bu riên sap hơnăm 2011, tơdroăng ‘’Pâ mơnê mơngế ai hnoăng’’ lâp tơnêi têa hiăng tơdah vâ chê 5.600 rơtal liăn, mơjiâng nếo vâ chê 39 rơpâu toăng hngêi; lâp tơnêi têa ai lối 4 rơpâu 100 Jâ Nôu Việt Nam khên tơnôu ối rêh châ mâu tíu cheăng tơdah rak ngăn troh tá lêk lôi.

Troh mơ’nui hơnăm 2020 ai vâ chê 99% rơpŏng mơngế ai hnoăng ƀă tơnêi têa ai kơlo rêh ối ƀă lơ luâ tâ kơlo rêh ối tơdâng dêi kuăn pơlê a tíu rêh ối; 98,7% cheăm/bêng/pơlê kân pêi tơtro tơdroăng tŏng kum mô đô̆i rong râ, mô đô̆i hlâ tung tơplâ xâ, mơngế ai hnoăng tơnêi têa; mơ-eăm pêi kêi đeăng tơdroăng tŏng kum hngêi ối ƀă mơngế ai hnoăng ƀă kăch măng ƀă ôh tá ai rơpŏng mơngế ai hnoăng ối tung rơpŏng kơtiê.

Pôa Nguyễn Bá Hoan, Ngế xiâm phŏ Pơkuâ cheăng pêi Mô đô̆i rong râ ƀă rêh ối pơlê pơla tối ăm ‘nâi:

‘’Tung pơla kố nah, tơdroăng cheăng tŏng kum pơlê pơla ƀă rak ngăn, păn roăng, pơlât ngăn mâu ngế ai hnoăng xuân châ pêi tơtro. Tơdroăng mơhnhôk mâu khu cheăng pơlê pơla, mâu khu ai hiâm mơno tŏng kum rak ngăn tơdroăng rêh ối mơngế ai hnoăng, rak ngăn Jâ Nôu Việt Nam khên tơnôu, klêi mê rak ngăn tơnâp ‘mế mâu ngoh khên tơnôu hlâ tung tơplâ xâ, mơjiâng mâu tíu koh tơbâ a mâu kong pơlê châ pêi pro ƀă tơdroăng tơmâng tŏng kum dêi mâu khu râ kăn pơkuâ ƀă mâu khu ai hiâm mơno tŏng kum, khu tê mơdró ƀă mâu ngế krê.

Klăng roh leh tơbâ 75 hơnăm, mâu khu râ kăn pơkuâ hiăng tơmâng tŏng kum, mơ’no hrĭng rơtal liăn ing liăn ngân tơnêi têa, liăn ngân kong pơlê klêi mê mơhnhôk ing mâu râ veăng tơlo ing Mât trâ̆n Tơnêi têa Việt Nam, mâu khu cheăng, mâu ngế mơdró vâ rak ngăn, păn roăng mâu ngế ai hnoăng tơnêi têa ƀă á loi tơngah khât tơdroăng cheăng kố pơtối châ tơmâng ƀă thăm pêi pro rơdêi tung la ngiâ’’.

VOV1 chêh

A Sa Ly tơplôu ƀă tơbleăng