Troh nôkố Khu xiâm ngăn tơmeăm khoăng tung têa a tơnêi ƀă hyôh kong prâi hiăng pơkuâ chêh pro 6 tơdroăng pơkâ ƀă 4 hlá mơ-éa pơkâ, tung mê, ƀă kơxop hlá Pơkâ nhên pêi pro mâu tơdroăng dêi Luât Tơnêi tơníu tung mê ai 10 Chương, 115 Troăng pơkâ nhên 51 tơdroăng ki kal châ pơcháu tung Luât, tơkŭm tung pơkâ tơdjuôm, môi tah: ivá, hnoăng cheăng, troăng pơkâ, mơjiâng khu cheăng tơnêi têa dêi khu tơrŭm chêh inâi tơnêi tơníu, tơkŭm mơnhông tơnêi; pơkâ, xúa tơnêi; mơnhông, pơkuâ ngăn, tí tăng tơkŭm tơnêi; pơcháu tơnêi, ăm mung tơnêi, hơ’lêh xúa tơnêi; pơkâ tơleăng tơdroăng ki tơxup tơbriât tơnêi, pơkâ tơleăng tơdroăng luât ‘na tơnêi tơníu ƀă ngế ki ai tơdroăng pro xô luât ‘na tơnêi tơníu drêng pêi pro hnoăng cheăng tung kơvâ tơnêi tơníu. Pôa Lê Minh Ngân, ngế xiâm phŏ ngăn tơmeăm khoăng tung têa a tơnêi ƀă hyôh kong prâi ăm ‘nâi:

“Khu xiâm ngăn tơmeăm khoăng tung têa, a tơnêi ƀă hyôh kong prâi hiăng xo rơkong tơpui dêi mâu khu râ, kơvâ cheăng ki ai tơdjâk troh dêi 63 to kong pơlê pơlê kong kân ối tung Tơnêi têa, ing 4 rôh hôp a mâu kơpong; xo rơkong tơpui tối ƀă hlá mơ-éa a mâu khu xiâm, kơvâ cheăng, khu tơrŭm ki ai tơdjâk troh tơmâng tơpui tối leăng mâu rơkong tơpui ƀă pơtroh ăm Khu xiâm mơjiâng luât pơkâ. Tiô tối hdrối 19/04/2024 Hô̆i đong kô tơkŭm hôp séa mơnhên mâu Tơdroăng pơkâ kố.

A rôh hôp, kăn pơkuâ Khu xiâm ngăn chiâk deăng ƀă Mơnhông thôn pơlê ăm ‘nâi: ai hên tơdroăng ki nếo, tơdroăng ki trâm tung pơla rơnêu, ‘mot tơ’nôm tơdroăng pơkâ 156 dêi Chin phuh pơkâ nhên pêi pro mâu tơdroăng dêi Luât Tơnêi tơníu, xuân môi tiah mơjiâng tơdroăng pơkâ nhên ‘na tơnêi pêi báu. Khu xiâm ngăn chiâk deăng ƀă Mơnhông thôn pơlê dế xo rơkong tơpui tối ‘na kơxop hlá mơ-éa 2 tơdroăng pơkâ kố tiô pơkâ ƀă hên ki ê.

Mơnhên tối Khu xiâm ngăn chiâk deăng ƀă Mơnhông thôn pơlê hiăng pêi pro hbrâ rơnáu, teăm tơdrêng tro tơdroăng hnê mơhno dêi Chin phuh, pôa Trần Hồng Hà, Ngế pro xiâm phŏ hnê ngăn tơnêi têa tối nhên: kal pơtối pêi pro nhên mâu tơdroăng ki ối a rơkong tơpui tối phá ra phá dêi rơpó ‘na pơkâ, mâu ngế, troăng hơlâ pêi pro ƀă hên ki ê; rĕng xo mâu rơkong tơpui tối dêi kong pơlê, khu mơdró kâ, khu tơrŭm, rêm râ kal kí rêh ối pơlê pơla ƀă hên ki ê ƀă tơdroăng pơkâ ‘na chêl thiê̆n, tŏng kum, vêh pro pơlê, pơkâ yă tơnêi; mơjiâng, pơkâ tiô hlá mơ-éa ki chêh pro ‘nâng ‘nâi ƀă tơdroăng Pơkâ ‘na pơxâu phâk pro xôi liăn ngân tung kơvâ tơnêi tơníu ƀă hên ki ê.

Ngế pho xiâm phŏ hnê ngăn tơnêi têa pơkâ thế: Khu xiâm ngăn Chiâk deăng ƀă Mơnhông thôn pơlê rak vế tơniăn Hlá mơéa Pơkâ nhên ‘na tơnêi pêt báu tro hâi khế, pêi pro kơtăng hiâm mơno xoăng râ, xoăng hnoăng pơkuâ, hơ’lêh chêh bro hlá, mơ’no tối mâu tơdroăng pơkâ, tơdroăng vâ pêi séa ngăn, mơnhên tối tơdroăng pêi pro mâu pơkâ ‘na tơnêi pêt kong, tơnêi pêt báu:

“Athế pêi pro mâu tơdroăng pơkâ kơtăng tro rak vế tơniăn mâu pơkâ tơkŭm tŭm têk mâu pơkâ dêi Luât tơnêi tơníu, rak vế athế tro mơ-éa chêh bro, tro luât, tơ’mô môi tiah luât, Pơkâ ôh ti chiâng mơdêk dêi tơná ƀă Luât. Pơkâ thế mâu kăn pơkuâ pêi pro xoăng râ xuân cho tơdroăng vâ pin séa ngăn”.

Ngế pro xiâm phŏ hnê ngăn tơnêi têa pơkâ thế Khu xiâm mơjiâng luât, Khu xiâm ngăn tơmeăm khoăng tung têa, a tơnêi ƀă hyôh kong prâi tơrŭm, rĕng hbrâ rơnáu hồ sơ, hlá mơ-éa vâ pơtroh ăm Kuô̆k hô̆i pơkâ ăm phêp Luât tơnêi tơníu hơnăm 2024 châ xêt pê pro a hâi lơ 1/7/2024. Khu xiâm mơjiâng rĕng mơjiâng bro mâu hlá mơ-éa pơkâ nhên pêi pro Luât Hngêi ối hơnăm 2023 ƀă Luât tơnêi tơníu hơnăm 2024 a hâi lơ 1/7/2024.