VOV4.Xơ Đăng - Pêi pro troăng hơlâ kơdroh xo hnoăng mơhá tiô Pơkâ kơxô̆ 43 dêi Kuô̆k hô̆i ‘na tŏng kum pro tơniăn ƀă mơnhông cheăng kâ – rêh ối pơlê pơla, sap ing hâi lơ 1/2/2022, Kŏng ti on tơhrik Dak Nông hiăng pêi pro kơdroh 2% hnoăng mơhá VAT ƀă mơngế ki xúa on tơhrik tung kong pơlê. Kơlo kơdroh hnoăng mơhá sap ing 10% chu u ối 8%. Tiô PC Dak Nông, rêm khế kŏng ti pro lối 165.000 mơ-éa đơn điê̆n tưh ăm mơngế ki xúa on tơhrik, tâi tâng kơxô̆ liăn kơdroh hnoăng mơhá VAT cho lối 20 rơtal liăn.

Mơngế pêi cheăng tung PC Dak Nông hnê mơhno tơmối kĭ tơdroăng ing phôn râng kŏng

Kơlo hnoăng mơhá nếo kô châ kơvâ on tơhrik pêi pro troh tâi hơnăm 2022, ƀă pói vâ kum mơngế ki xúa on tơhrik kơdroh kơxô̆ liăn on tơhrik, kum pêi pro châ tơƀrê tơdroăng rak tơniăn ƀă mơnhông mơdêk cheăng kâ – rêh ối pơlê pơla.

A Sa Ly tơplôu ƀă tơbleăng