VOV4.Xơ Đăng - Pêi pro tiô troăng rohlâ tŏng kum kọo ăm mung liăn tung tơdroăng ‘mâi hơ’lêh  ƀă mơnhông pêi cheăng kâ - rêh ối pơlê pơla tiô tiô tơtroăng pơkâ kơxô̆ 11 hâi lơ 30/1/2022 dêi chin phuh, nếo achê pơla kố, Tíu teăng mâ Hngêi rak liăn kum kuăn pơlê kơtiê mâu kong pơlê a kơpong Tây Nguyên hiăng lăm troh a tơrêm to cheăm vâ rê̆ng  teăm ăm vâi krâ nhŏng o  châ mung liăn.

Nếo châ Hngêi rak liăn tŏng kum rêh ối pơlê pơla ăm mung kơxô̆ liăn 50 rơtuh, nâ Săn a pơlê Piơm, pơlê kân Đak Đoa, tơring Đak Đoa ăm ‘nâi, nâ kô xúa vâ ‘mâi pêt dêi 1ha kơphế sap ing rơnó mê hngê kố. Vâ châ mung kơxô̆ liăn kơjo kố, apoăng hơnăm kố, nâ hiăng tơpui ƀă tôh ăm mung ƀă kơdĭng dêi pơlê vâ châ tơdroăng ki rơhêng vâ ƀă hngêi rak liăn. Klêi kơ’nâi mê, kăn ƀô̆ hngêi rak liăn hiăng lăm ngăn kơdrum, hmâng nâ Săn tối ‘na túa pơkâ vâ ‘mâi pêi dêi kơdrum:

“Á phiu ro khât drêng châ mung 50 rơtuh liăn vâ ai liăn vâ pêi dêi kơdrum kơphế kố. Môi iâ á roê phon rơvât vâ choi ăm kơphế xông kân. Kố cho kơxô̆ liăn ki pêi lo xiâmdêi rơpŏng mê á kô mơeăm pêt ăm gá lĕm, ai plâi kơtóu hên”.

Nâ Săn châ xo liăn mung a mơ’nui khế 4 kố nah vâ ‘mâi pêi dêi kơdrum kơphế

Ƀă ngoh Nguyễn Hoàng Linh (a thôn 1, pơlê kân Đak Đoa, tơring Đak Đoa), kơxô̆ liăn mung ai 40 rơtuh, ƀă liăn laih iâ tung pơla 20 hơnăm hiăng kum ngoh pêi pro châ tơdroăng ki rơhêng vâ cho ai môi toăng hngêo lĕm. On veăng ngoh kô kơdĭng ‘no hrê ƀă tăng cheăng pêi tơ’nôm vâ ai liăn mơdrếo hdrối khế hơnăm pơkâ:

“10 hơnăm kố đi đo ối a hngêi ki mung, ai hngê nếo á phiu ro khât. Kxxô̆ liăn laih rêm khế iâ, khế mơdrếo liăn laih ton, mê liăn khế on veăng má xuân rơkâ môi iâ, rak tơniăn mơdrếo liăn laih ƀă xiâ rêm khế, rak tơniăn mơdrếo chê̆n hdrối hơnăm pơkâ”.

Pêi pro tơdroăng ‘mâi mơnhông ƀă mơdêk cheăng ka rêh ối pơlê pơla tiô pơkâ kơxô̆ 11 hâi lơ 30/1/2022 dêi Chin phuh, rôh kố, Hngêi rak liăn Tŏng kum rêh ối pơlê pơla kong pơlê Gia Lai châ xing xoăng lối 100 rơtal liăn vâ pêi pro 3 tơdroăng: ăm mung tăng cheăng pêi; ăm mung ƀă mâu hok tro, sinh viên ƀă ăm mung pro hngêi ối. Nôkố mâu tơring, cheăm dế rĕng tơbleăng ăm kơxô̆ liăn kơjo kố troh ƀă kuăn pơlê. Pôa Nguyễn Văn Ngọc, kăn, pơkuâ Ƀơrô cheăng ăm mung Hngêi rak liăn tŏng kum rêh ối pơlê pơla tơring Đak Đoa, Gia Lai ăm ‘nâi:

“Ki xiâm cho kum vâi krâ nhŏng o pin ai liăn vâ mơnhông mơdêk cheăng kâ, tơniăn tung tơdroăng rêh ối ‘mâi mơnhông cheăng kâ. Klêi kơ’nâi ăm mung, á séa ngăn tơdroăng ki xúa kơxô̆ liăn mung dêi vâi krâ nhŏng o tro pơkâ há lơ ôh; tơrŭm ƀă mâu kơvâ cheăng ƀă mâu khu pú hên, đi đo séa ngăn, tơdroăng ki xúa liăn mung, vâ châ ‘nâi mâu tơdroăng ki kal tơ’nôpm, ví tơdroăng ki mơhrê liăn ngân mung”.

Rơtế ƀă Gia Lai, mơ’nui khế 4 kố nah, Tíu pêi cheăng Hngêi rak liăn tŏng kum rêh ối pơlê pơla mâu kong pơlê tung kơpong Tây Nguyên hiăng ‘no ăm mung kơxô̆ liăn kơjo tiô Pơkâ 11/NQ-CP dêi Chin phuh ‘na tơdroăng ‘mâi mơnhông ƀă mơdêk cheăng kâ rêh ối pơlê pơla. Ki nhên, a Dak Lak hiăng ‘no ăm mung châ vâ chê 5 rơtal liăn ăm mâu ngế mung apoăng. Tung mê ai 83 ngế mung vâ tăng cheăng pêi, rak v ế ƀ ă po rơdâ tơdroăng cheăng pêi ƀă tâi tâng kơxô̆ liăn lối 4,2 rơtal liăn. Tiô pơkâ, kong pơlê Dak Lak châ Tơnêi têa xing xoăng lối 71 rơtal liăn vâ tơbleăng 3 tung 5 tơdroăng ăm mung kơjo tiô Pơkâ 11/NQ-CP, tung mê: Ăm mung tăn cheăng pêi, rak vế ƀă po rơdâ tơdroăng cheăng pêi ai 50 rơtuh liăn; Ăm mung pro hngê ối ai 20 rơtuh liăn ƀă hên ki ê. A Lâm Đồng, Tíu pêi cheăng Hngêi rak liăn tŏng kum rêh ối pơlê pơla kong pơlê xuân hiăng tơkŭm ‘no ăm mung rôh ki apoăng mâu tơdroăng ăm mung kơjo tiô pơkâ 11/NQ-CP dêi Chin phuh. Mê cho tơdroăng ăm mung tăng cheăng pêi, rak vế ƀă po rơdâ tơdroăng cheăng pêi ăm 50 ngế pêi cheăng, ƀă tâi tâng kơxô̆ liăn vâ chê 3 rơtal liăn a Tíu ki ăm mung hngêi rak liăn tŏng kum rêh ối pơlê pơla tơring Di Linh ƀă Dam Ròng. Ƀă mâu ngế ki mung cho mâu ngế pêi cheăng vêh sap kơphô̆ ki kân klêi kơ’nâi ai pơreăng pơreăng kân Covid-19, mung vâ tăng cheăng pêi tơniăn tung rêh ối. Tung pơla hdrối kố nah, Hngêi rak liăn tŏng kum rêh ối pơlê pơla kong pơlê Lâm Đồng hiăng ‘no ăm mung ƀă 15 khu mơdró kâ mung mơdrếo liăn khế pơtê pêi cheăng ăm lối 4.600 ngế pêi cheăng, ƀă tâi tâng kơxô̆ liăn mung lối 18 rơtal.

Tơdroăng tơbleăng ăm mung tăng cheăng pêi, rak vế ƀă po rơdâ tơdroăng cheăng pêi tiô pơkâ 11/NQ-CP dêi Chin phuh hiăng pêi pro châ tơdroăng ki rơhêng vâ dêi hên ngế kuăn pơlê trâm pá xua pơreăng kân Covid-19 ƀă kal ‘mâi mơnhông, mơdêk cheăng kâ rêh ối.

                                                                   VOV Tây Nguyên

Katarina Nga tơplôu ƀă tơbleăng