VOV4.Xơ Đăng - Hâi kố, a pơlê kong xiam Hà Nội pơxiâm po kân krip Hneăng hôp má 3 Kuô̆k hô̆i hneăng 15. Tiô tối hdrối tung pơla pêi cheăng dêi Kuô̆k hô̆i hneăng rôh kố cho 20 hâi, kô mơgêi a hâi pơtăm, hâi lơ 17/6/2022. Hneăng hôp kố hiăng châ hbrâ rơnáu nhên ‘na tơdroăng ki kal, tung tơdroăng ki pơtối mơdêk hơ’lêh hiăng châ xúa tơƀrê a mâu hneăng hôp hdrối, tơkŭm séa ngăn hên tơdroăng ki kal dêi tơnêi têa. Hdrối hâi vâ po hneăng hôp, a mâu kong pơlê hiăng po hên rôh trâm mâ kuăn pơlê vâ mâu kăn Kuô̆k hô̆i ‘nâi nhên tơdroăng ki rơhêng vâ, tuăn tơmiât dêi kuăn pơlê.

A rôh hôp má 10, ai pơkuâ hnê mơhno dêi pôa Vương Đình Huệ, Kăn xiâm hnê ngăn Kuô̆k hô̆i ăm hnê tối nhên ‘na tơdroăng hbrâ roh hôp má 3, Kuô̆k hô̆i hneăng 15, mê cho tơkŭm po hôp, hbrâ hdrối tơdroăng kal vâ hôp, hbrâ hdrối mâu tơdroăng, hâi chôu pơxiâm po, hâi chôu mơgêi heăng hôp, tơdroăng hbrâ rơnáu, ‘na kring tơniăn hbrâ mơdât pơreăng, tơdroăng hnê tối ăm roh hôp.

Tiô tơdroăng a rôh hôp má 3, Kuô̆k hô̆i kô séa ngăn tối tơbleăng 5 tơdroăng luât, 4 tơdroăng chêh tung hlá mơ-éa pơkâ, mê cho: Luât kăn sát cơ động; Luật Điện ảnh cho luât đŏng phim ki (‘mâi hơ’lêh); Luât tê mơdró ƀaoh hiêm (‘mâi hơ’lêh); Luât tơ’noăng, khĕn kơdeăn (‘mâi hơ’lêh); Luât ‘mâi hơ’lêh, tơ’nôm mâu tơdroăng luât xúa tuăn ngôa rơkê; Pơkâ ‘na mơnúa túa tơkŭm pêi cheăng, hnê pêi cheăng, hnê cheăng pêi ăm mâu ngế ai xôi pa kong hngêi phâk; Pơkâ ‘na Tơdroăng mơjiâng luât, luât pơkâ hơnăm 2023 ‘mâi hơ’lêh.

Pôa Phan Đình Trạc trâm mâ kuăn pơlê tơring Đơn Dương, Lâm Đồng

Tơdroăng mơjiâng luât, Luât pơkâ hơnăm 2022; Tơdroăng Pơkâ ki kal dêi rôh hôp Kuô̆k hô̆i (‘mâi hơ’lêh), tơdroăng pơkâ mơnúa pro dêi mâu luât pơkâ ki kal, mơnhông mơdêk kong pơlê Khánh Hòa.

Kuô̆k hô̆i kô ăm hnê tối 6 tơdroăng tơkêa luât mê cho: Luât têa châu (‘mâi hơ’lêh); luât hbrâ mơdât tơxiăn tô pâm dêi rơpó tung rơpŏng hngêi  (‘mâi hơ’lêh); Luât Séa ngăn (‘mâi hơ’lêh); Luât Pêi pro tơdroăng môi tuăn kuăn pơlê a pơlê cheăm, luât ‘mâi hơ’lêh, tơ’nôm mâu tơdroăng luât Tần số vô tuyến điện; Luât khăm, pơlât  (‘mâi hơ’lêh). ‘Na mâu tơdroăng cheăng kâ-rêh ối, liăn ngân tơnêi têa, séa ngăn ƀă mâu tơdroăng kal ki ê, Kuô̆k hô̆i séa ngăn tối tơbleăng ‘na tối tơ’nôm tơdroăng pêi pro tiô pơkâ mơnhông cheăng kâ rêh ối ƀă liăn ngân tơnêi têa hơnăm 2021; tơdroăng pêi tiô pơkâ mơnhông cheăng kâ-rêh ối ƀă liăn ngân tơnêi têa mâu khế apoăng hơnăm 2022. 

Kĭ pơkâ liăn tơnêi têa hơnăm 2020. Séa ngăn tối Tơbleăng ‘na tơdroăng kơdĭng liăn, pôi tá hrê hmâng vâ hơnăm 2021 ƀă mâu tơdroăng kal ki ê.

Hdrối po rôh hôp, mâu kong pơlê kơpong Tây Nguyên xuân môi tiah tung lâp tơnêi têa, hiăng pêi pro tơdroăng trâm mâ kuăn pơlê. Vi ƀan xiâm Măt trâ̆n tơnêi têa Việt Nam tơbleăng tâi tâng tơdroăng, pâ thế dêi kuăn pơlê ƀă kuăn pơlê pơtroh ăm rôh hôp má 3, Kuô̆k hô̆i hneăng 15. Vi ƀan pơkuâ Kuô̆k hô̆i tối tơbleăng tơdroăng hiăng klêi séa ngăn tơbleăng dêi kuăn pơlê pơtroh ăm roh hôp má 2 Kuô̆k hô̆i  hneăng 15.

Dak Lak trâm mâ kuăn pơlê hdrối vâ po rôh hôp má 3 Kuô̆k hô̆i  hneăng 15

Kuăn pơlê Tây Nguyên tối ƀă pâ thế troh mâu kăn Kuô̆k hô̆i hên tơdroăng ‘na xơpá, tơvâ tơvân châ kong pơlê, tơring ƀă xiâm tơnêi têa tơmâng tăng troh tah lôi. Mê cho, tơdroăng pêi pro tro tiô pơkâ mơnhông mơdêk kơphô̆ tung thôn pơlê nếo dế pêi hrá; pro hlá mơ-éa ối tơvâ tơvân, malối pro hlá mơ-éa ki pro nếo, pro pơ’lêh inâi, lơ hlá mơ-éa ki nếo mơnhên xuá tơnêi, tơdroăng pro tơbăng, chêl thiăn hnoăng pro mâu tơmeăm khoăng ối trâm hên xơpá; tơdroăng ko kong hdi tơnêi, tí tăng luá kuăn kiâ kong, tơdroăng hbrâ mơdât kâ kơluâ ai drêng ‘nâ, ai tíu ‘nâ “ ôh tá pro kơtăng, bú mơnhâu tê” tơdroăng tôu pâm dêi on veăng, tơdroăng tôu pâm a hngêi trung rế tâk ó ƀă hên ki ê.

Mâu tơdroăng châ kuăn pơlê tơmâng hên má môi cho yă tơmeăm khoăng to kơnâ. Tung mê, yă phon rơvât  kơdrâ tâk, tung pơla mê tơmeăm pê lo ing chiâk deăng ai drêng to drêng chu, pro tơdroăng pêi chiâk pêt kơchâi plâi pôm trâm hên xơpá.

Pôa Phan Tùng Châu, kuăn pơlê ối a thôn Nghĩa Hiệp 2, cheăm Ka Đô, tối:

“Nôkố mâu phon yă to kơnâ ó, pơtih môi kơxâk phon yă 1.350 rơpâu liăn, hdrối nah bú 950.000liăn/kơxâk, tung pơla mê tơmeăm pê lo môi tiah kơchâi plâi pôm tê rơpâ, tíu tê ôh tá tơniăn, pâ thế khu râ kăn pro ti lâi vâ yă phon chu tơniăn yă tơmeăm pêi lo châ to vâ kuăn pơlê kơdroh iâ ki pá puât’’.

A Dak Lak, tung rôh pêi cheăng dêi Khu kăn Kuô̆k hô̆i kong pơlê Dak Lak ƀă Vi ƀan hnê ngăn kong pơlê ƀă mâu tíu pêi cheăng, kơvâ cheăng vâ hbrâ mâu tơdroăng veăng a roh hôp má 3, Kuô̆k hô̆i hneăng 15, hên tơdroăng pâ thế tơdjâk troh luât pơkâ mơnhông mơdêk tung cheăng kâ rêh ối dêi kong pơlê hiăng châ tơ’nôm a hlá mơ-éa tối tơbleăng pơtroh ăm Kuô̆k hô̆i.

Tiah mê, tơdroăng mơdêk xúa on tơhrik ‘mâi pro, Dak Lak ai tơmeăm khoăng hên ‘na on tơhrik kơtâu ƀă mâ hâi, mê tung troăng rơhlâ mơnhông mơdêk ‘mâi mơnhông troh hơnăm 2015, Chin phuh, Khu xiâm ngăn tê mơdró kal thế séa ngăn ‘mâi hơ’lêh ivá vâ mơdêk pro on tơhrik ‘mâi pro a Dak Lak.

Pôa Vũ Đình Trưng, kăn phŏ pơkuâ ngăn tê mơdró Dak Lak pâ thế:

“Troh hơnăm 2045 ivá on tơhrik kơtâu ing mâ hâi châ dâng 41%. Tiah mê, Dak Lak pâ thế ing 10 rơpâu troh 15 rơpâu MW gá hôm. Vâ mơdêk on tơhrik ‘mâi pro cho tơmeăm khoăng kân ‘na tơnêi, tíu mọiâng pro on tơhrik ai hên troăng kơxái 500 KV ƀă tíu krâ ‘măn kơmăi  500KV a kố. Xua mê, tơdroăng pơchiăn ivá on tơhrik akố ôh tá ai’’.

Môi tơdroăng châ mâu kăn pâ thế Kuô̆k hô̆i séa ngăn tơbleăng a rôh hôp mê cho Luât ƀaoh hiêm pơlê pơla ki ‘mâi rơnêi. Tung mê ai tơdroăng tơdjâk troh pơkâ luât tŏng kum ‘na xía vâ xua pêi cheăng ƀă haoh hiêm ôh tá ai cheăng pêi. Pôa Nguyễn Khắc Tuấn, Ngế pơkuâ Ƀaoh hiêm pơlê pơla kong pơlê Dak Lak tối tiah kố, drêng pêi pro tơdroăng pơkâ tŏng kum tơdjâk troh tơdroăng mê ối pá, xua hâi teăm vâ môi tuăn dêi rơpó”.

“Nôkố tơleăng mơnhên ƀaoh hiêm ôh tá ai cheăng pêi mê peăng kơvâ ngăn mơngế pêi cheăng pro. Ƀaoh hiêm pơlê pơla bú xo ƀă hrê tê. ‘Na xía vâ tung pơla pêi cheăng mê ƀaoh hiêm pêi cheăng xuân dế tăng troăng mơnhên la pơkâ a Luât Cheăng pêi mê xuân ối pá, tơvâ amê.  Xua mê púi vâ mâu kăn thế ngăn nhên tâi tâng tung luât ƀaoh hiêm ki ‘mâi hơ’lêh pro ti lâi vâ pro tơ’lêi hlâu má môi ăm mơngế ki pêi cheăng ƀă kuăn pơlê drêng pêi pro tiô luât pơkâ tŏng kum ƀaoh hiêm pơlê pơla”.

Gương tơplôu ƀă tơbeăng