Pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối: Hneăng má 1 dêi rôh hôp hiăng ƀlêi chiâng; châ kuăn pơlê vâ ‘nâi plĕng; séa ngăn. Hnoăng cheăng ‘na mâu ngế cheăng hiăng châ tơbleăng teăm tơdrêng, tro tiô pơkâ, tro túa ƀă kơxô̆ phĭu pôk hên. Tơdroăng ki tơpui tơno a hngêi hôp kân, dêi mâu tôh ƀă rôh kơ-êng hơniâp ro, tơniăn krê, tro tơdroăng ki kal, ‘nâng ‘nâi. Hên mâu kăn châ tơpui, hên rơkong tơpui tối tro ‘ló, ai pơxúa, tiô hiâm mơno veăng mơjiâng, pôu râng dêi hnoăng, pơkâ mơ’no hên troăng vâ kum ăm tơdroăng ki kal pơkuâ cheăng kâ rêh ối pơlê pơla, tơdroăng cheăng lêng, pring vế dêi Chin phuh, mâu khu xiâm kơvâ cheăng.

A rôh hop 34, Vi ƀan pơkuâ Kuô̆k hô̆i châ ngăn nhên ƀă mơhno túa tơmiât ki nhên dêi tơdroăng tơkêa, kơxop hlá mơ-éa ki lâi hiăng rak tơniăn tŭm tơdroăng vâ pơtroh ăm Kuô̆k hô̆i tơbleăng a rôh má 2, malối cho mâu tơdroăng tơkêa ai tơdjâk kân môi tiah Luât Baoh hiêm xah hô̆i ki ‘mâi hơ’lêh ƀă mâu tơdroăng tơkêa, kơxop hlá mơ-éa pơtroh ăm Kuô̆k hô̆i tơbleăng tiô pơkâ a 1 hneăng hôp (môi tah: Pơkâ tơnêi tơníu têa kơxĭ tơnêi têa; Luât Pơkuâ ngăn, xúa pháu hơnêa, trếo pơtôu ƀă kế tơmeăm xúa tơdjâk ki ê ki ‘mâi hơ’lêh); mâu tơdroăng pơkâ tíu pro troăng hơlâ xiâm ăm kong pơlê Nghệ An, pơlê kong kân Đà Nẵng.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Vi ƀan pơkuâ Kuô̆k hô̆i tơkŭm tung mâu tơdroăng ki hiăng châ ‘mot tơ’nôm tung Tơdroăng veăng mơjiâng luât, luât pơkâ dêi hơnăm 2024:

"Luât ‘mâi hơ’lêh 4 tơdroăng Luât cho: Luât ‘mâi hơ’lêh, ‘mot tơ’nôm tơdroăng Luât Tơnêi tơníu; Luât hngêi ối; Luât Tê mơdró hngêi trăng, tơnêi tơníu; Luât mâu khu tơrŭm ăm mung liăn ƀă tơdroăng Pơkâ dêi Kuô̆k hô̆i ‘na kơdroh nâp hnoăng liăn mơhá mâu tơdroăng ki kơnía git. Mâu tơdroăng ki lâi khu râ hnoăng pơkuâ hiăng ăm troăng hơlâ mê mâu tơdroăng yă ki lâi tŏng kum xơpá, tơvâ tơvân”.

Vi ƀan pơkuâ Kuô̆k hô̆i hiăng ăm rơkong tơpui tối ‘na kơxop hlá mơ-éa Luât tơniăn troăng prôk. Pôa Lê Tấn Tới, Kăn xiâm pơkuâ Vi ƀan tơdroăng cheăng lêng ƀă gâk kring dêi Kuô̆k hô̆i tối nhên: hâi lơ 22/5, Kuô̆k hô̆i hiăng tơpui tơno a Hngêi hôp kân ‘na kơxop hlá mơéa Luât Tơniăn troăng prôk. Ki xiâm mâu rơkong tơpui tối pơrá môi tuăn ƀă kơxop hlámơéa Luât Tơniăn troăng prôk hiăng châ tơmâng xo, ‘mâi rơnêu. Ki rơhêng vâ tối, Kăn xiâm pơkuâ Vi ƀan Tơdroăng cheăng lêng Gâk kring tối nhên: séa ngăn tơdroăng ki ai khât tung pơla hdrối kố nah, pơkâ thế Vi ƀan pơkuâ Kuô̆k hô̆i ăm ‘mot tơ’nôm túa pơkâ “Rơxế ô tô chơ hok tro, vâi hdrêng mâm non lơ rơxế ô tô tơdah xo, chơ chiân hok tro, vâi hdrêng mâm non” tung Troăng 46 dêi kơxop hlá mơ-éa Luât. Pôa Nguyễn Khắc Định, kăn xiâm phŏ hnê ngăn tơnêi tối nhên túa tơmiât:

"Rơxế chơ chiân hok tro athế ai pơkâ krê, pro tiah lâi vâ ngế ki rak ngăn, ngế ki vê rơxế mê drêng lo ing rơxế athế rak tơniăn tung rơxế ôh ti ai kơbố xếo. Pin kal tối tơbleăng tơdroăng kố troh lâp lu, hbrâ mơdât troh lâp lu, pêi pro rôh séa ngăn tơniăn vâ rak vế mâu rơxế chơ chiân hok tro ki ôh tá ai tŭm tơdroăng vâi tro thế pơtê tâi”.

Tối ‘na túa tơmiât môi tuăn khât ƀă tơdroăng cheăng pơkâ krá kâk ƀă rơxế ô tô chơ hok tro, vâi hdrêng, rak tơniăn a troăng prôk ƀă mâu tơdroăng ki chơ chiân vâi hdrêng mâm non, hok tro ƀă rơxế ô tô, pôa Bùi Văn Cường, ngế xiâm chêh tôm xo rơkong Kuô̆k hô̆i tối tiah kố: pakĭng pơkâ thế ƀă mâu rơxế ô tô, ối pơkâ thế ƀă ngế ki vê, ngế ki rak ngăn tung rơxế, tíu hnê hriâm ƀă hên ki ê. Malối cho ngế ki chơ hok tro râ má môi, vâi hdrêng mầm non athế ai tăng ‘nân tơtro ƀă tiô kơ hơnăm tiô pơkâ, ƀă kal pêi pro nhên pơcháu chiân ăm kơ koan ki lâi pơkâ vâ ăm gá tŭm:

"Troăng 70 Luât troăng prôk pơkâ ai 2 túa rơxế chơ chiân vâi hdrêng hok tro cho tíu ki hnê hriâm; ƀă khu mơdró kâ, pơkâ thế luât kố ôh ti xê pơkâ pôu râng dêi hnoăng cheăng dêi hngêi trung hnê hriâm mê ối pơkâ khu ki chơ chân vâi hdrêng ƀă rơxế ô tô xuân athế pôu râng dêi hnoăng cheăng tung tơdroăng kố”.

Xuân a rôh hôp kố, Vi ƀan pơkuâ Kuô̆k hô̆i ăm rơkong tơpui tối ‘na tơdroăng ki tơpui tối leăng, tơmâng xo, ‘mâi rơnêu kơxop hlá mơéa Luât Pơlê kong xiâm ki ‘mâi hơ’lêh ƀă ăm rơkong veăng tơpui ‘na Túa pơkâ Pơlê kong xiâm Hà Nội pơla hơnăm 2021 – 2030, mâ ngăn troh hơnăm 2050 ƀă ‘mâi rơnêu Túa pơkâ tơdjuôm Pơlê kong xiâm Hà Nội troh hơnăm 2045, hnoăng vâ pêi troh hơnăm 2065.