VOV4.Xơ Đăng - Hơnăm hriâm 2022 – 2023 cho hơnăm má 3 tung lâp kơvâ cheăng ngăn hnê hriâm ƀă hnê mơjiâng tuăn ngoâ rơkê pêi pro tơdroăng ki hnê hriâm phôh thong nếo, tiô tơdroăng pơkâ kô pêi pro ƀă lâm 3, lâm 7 ƀă lâm 10. A râ má môi, ƀă khô̆i lâm 3, nâl Ănglê ƀă Tin học chiâng môn hriâm ki pơklât thế. Laga, ôh tá bê lâm hriâm, kế tơmeăm hriâm ƀă mâu thái cô hnê dế cho tơdroăng ki pro pá ăm hên hngêi trung drêng pêi pro tung hơnăm hriâm kố. Xua mê, rơtế ƀă tơdroăng ki hbrâ rơnáu mâu kế tơmeăm xúa, tơdroăng ki hbrâ rơnáu mâu thái cô kal châ pêi pro tiah lâi vâ pêi pro tơdroăng hnê hriâm phoh thong nếo ƀlêi chiâng?

Tơdroăng hnê hriâm phổ thông túa nếo ƀă lâm 3 ai hên tíu ki pơ’lêh tâng pơchông ƀă tơdroăng hriâm nôkố, mê cho pơklât hnê hriâm môn Ănglê ƀă Tin học; ai hriâm tơ’nôm tơdroăng vâ ’nâi ‘na Kŏng ngê̆, tiô hên mâu thái cô, tơdroăng tơkŭm hnê hriâm, ăm tơ-tro, hok tro châ ‘nâi hlê nâl Ănglê ƀă Tin học cho tơdroăng ki tơtro ƀă tơdroăng pơkâ thế dêi rơxông nôkố mơnhông mơdêk ivá hriâm dêi hok tro.

Laga, ing troăng rơhlâ pơkâ ối trâm hên xơpá, malối a mâu kơpong hngế hngo, kong ngo ối trâm hên xơpá, malối xua ối pá puât ôh tá ai veăng hriâm tơmeăm hnê hriâm ‘na môn Tin học. Thái Vì Văn Tụt, Ngế pơkuâ hngêi trung râ má môi Chiềng Cang, tơring Sông Mã, kong pơlê Sơn La tối ki khât gá:

‘Kong mêi vâi o tro kơchoh, kong tô vâi o tro tô ôh tá chiâng tât tô mêi, kơƀăng chêh, tăng ‘nân ôh tá ai tiô pơkâ ăm mâu ăm hok tro ‘nân, xuân tơdjâk pro pá troh tơdroăng hnê dêi thái cô ƀă hriâm dêi hok tro. Vâ xúa kơmăi kơmok tung hnê hriâm la ƀă lâm hriâm ki pơtân mê mâu thái cô trâm hên xơpá’’.

Tơdrêng ƀă tơdroăng ôh tá ai tíu hnê kơƀăng ôh tá ai, tơmeăm hnê môn Tin học mê tơdroăng thái cô hnê môn ki kố ƀă nâl Ănglê xuân pro mâu hngêi trung râ má môi trâm pá. Nôkố, thái cô hnê Tin hok ki hên châ hriâm túa hnê ăm râ má péa ƀă má pái. La tiô hnê mơhno, thái cô hnê Tin hok kô hnê peăng Kŏng ngê̆ ƀă kơxô̆ chôu hnê tâk luâ péa hdroh tâng vâ pơchông ƀă tơdroăng hriâm nôkố, la ki khât gá ôh tá xê thái cô môn Tin hok ki lâi xuân châ hriâm tơdroăng vâ hnê, châ hriâm tơ’nôm túa hnê ‘na tơdroăng mê.

Cô Cảnh Thị Hải Yến, hnê môn Tin học, Hngêi trung râ má môi Liên Hà, tơring Đan Phượng, pơlê kong kân Hà Nội tô tuăn khât:

“Hngêi trung râ má môi Liên Hà bú ai môi ngế a cô hnê Tin hok, cho ‘nâng pá hlối tơbrêi xua tơdroăng hnê gá hên ƀă hnê tá môn kŏng ngê̆ mê xuân thế ti tăng hriăn tơ’nôm xêh tơdroăng hnê. Tiô tơdroăng hnê ki nếo Tin học kô hnê 2 tiết/măng tĭng ƀă môn Kŏng ngê̆ hnê 1 tiết/măng tĭng, tơkŭm tâi tâng 42 tiết mê tơbrêi ‘nâng xua gá luâ kơ ivá á, mê á xuân púi vâ ƀơrô ngăn hnê hriâm râ tơring la ngiâ tăng tơ’nôm ngế ki hnê vâ rơtế xoăng dêi rơpó hnê ’’.

Tiô tối tơbleăng troh hơnăm 2025, drêng tơdroăng Hnê hriâm phôh thong ki nếo châ tơbleăng hnê a tâi tâng mâu khu lâm thế tơ’nôm lối 24 rơpâu thế thái cô hnê a pái môn ki nếo cho Ngoại ngữ, Tin học ƀă Kŏng ngê̆ râ má môi. Mâu kơxô̆ ki mê ăm hlo nhên ki pá dêi mâu hngêi trung tung kong pơlê, tơring, cheăm xơpá khât tung tơdroăng tăng xo ‘mot thái cô vâ hnê. Mâu kong pơlê tơring ăm ‘nâi, tơdroăng oh tá ai thái cô tŭm drêng tơbleăng hnê ‘na tơdroăng hnê a hơnăm 2018 cho tơdroăng ki ôh tá xê ton nah, mê hiăng mơjiâng hên luât pơkâ tơkâ luâ xơpá, môi tiah: mơhnhôk thái cô hriâm ai  văn ƀằng 2, hnê hriâm tiô tơdroăng pơkâ thế ahdrối.

Ki hdrối, vâ tơkâ luâ xơpá tung tơdroăng dế ôh tá ai tŭm thái cô hnê mâu môn Tin học, Ngoại ngữ, mâu kong pơlê tơring xuân hnê tối ăm mâu hngêi trung râ má môi mơjiâng pơkâ hnê hriâm a hngêi trung vâ tơkŭm hnê péa môn hriâm mê ăm tơ’ló, tơ-tro ƀă tơdroăng ki ai lơ ôh ai tơmeăm hnê, hlối xing xoăng chôu hnê tro tiô khoa hok vâ pêi pro tiô troăng rơhlâ hnê péa pái to hngêi trung...

Pôa Phạm Đức Thắng, Ngế pơkuâ ƀơrô ngăn hnê hriâm ƀă hnê mơjiâng tuăn ngôa rơkê tơring Ba Bể, kong pơlê Bắc Kạn ăm ‘nâi:

‘’Thái cô nôkố hnê mâu môn ki ôh tá ai ngế hnê môi tiah môn Ngoại ngữ cho hnê nâl kong ê mê. Cho tơdroăng ki pá tơdjuôm ôh tá xê to tơring Ba Bể cho dêi ki tâi tâng dêi mâu tơring tung kong pơlê. ‘Na tơdroăng ôh tá ai tŭm thái cô hnê nâl Ănglê mê peăng Ƀơrô xuân tối ăm tơring ‘nâi vâ tơkâ luâ xơpá ƀă  tơdroăng túa hnê tơ pái to hngêi trung. Tơkéa vâ tối thái cô a hngêi trung ki kố hnê hâi teăm tŭm chôu klêi mê kô chiâng lăm hnê a hngêi trung ki ê’’.

Nôkố mâu Hngêi trung ngăn hnê hriâm ƀă hnê mơjiâng tuăn ngôa rơkê kong pơlê xuân veăng tí tăng ‘nâi plĕng ăm Vi ƀan hnê ngăn rêm râ kong pơlê, pơlê kong kơdrâm hnê mơhno ăm mâu tơring túa ki rah xo thái cô mot hnê, kĭ tơkêa pêi cheăng, tơmâng veăng hnê ƀă thái cô hnê nâl Ănglê, Tin học. Hlối rak tơniăn ăm mâu thái cô châ hriâm tơ’nôm tơdroăng môn hriâm, hriâm tơdroăng xúa hnê tung hlá mơ-éa hnê hriâm hdrối vâ xoăng hnoăng cheăng ăm hnê.

Ki khât ăm hlo Tơdroăng hnê hriâm phôh thong ki nếo kum hok tro châ achê hlê ƀă nâl Ănglê ing hriâm Tin học vâ hlê tŭm tơdroăng. Ki khât gá tơbleăng hnê 2 môn hriâm mê a mâu hngêi trung râ má môi ăm hlo kal tơrŭm hnê tơƀrê tâ nếo dêi kơvâ ngăn Hnê hriâm ƀă hnê mơjiâng tuăn ngôa rơkê ƀă mâu kong pơlê, tơring tung hbrâ mâu thái cô hnê ƀă hngêi trung hriâm tơmeăm vâ hnê hriâm thế ai tro tiô pơkâ.

      Minh Hường-VOV1

Gương tơplôu ƀă tơbleăng