VOV4.Xơ Đăng - Mâu hâi achê Têt Nhâm Dần 2022, drêng rêm ngế hbrâ rơnáu vêh a hngêi tơkŭm tơdah Têt rơtế dêi ƀă rơpŏng hngêi cho rôh mâu kăn ƀô̆, lêng Mố đô̆i gak tơkăng kong dêi kong pơlê Gia Lai tối tơdjuôm, Mố đô̆i gak tơkăng kong Ia O tối krê mê mơ-eăm dêi tơná a tíu tơkăng kong vâ pêi pro tro hnoăng cheăng “péa tơdroăng” rak ngăn, rak vế tíu tơkăng kong ƀă hbrâ mơdât pơreăng COVID-19. Rơtế amê, tíu pêi cheăng xuân ối tơrŭm ƀă khu râ Đảng, khu kăn pơkuâ, mâu khu râ, kơvâ cheăng, tơring, cheăm rak ngăn tŏng kum vâi krâ nhŏng o a kơpong tíu tơkăng kong tơdah môi rơnó hơngui hơniâp ro, phâi tơtô.

Troăng séa ngăn tơkăng kong Ia O, cheăm Ia O, tơring Ia Grai, kong pơlê Gia Lai mâu hâi achê Têt Lo hơnăm nếo xú hŏm reăng plâi hôt tung rơnó reăng tơpo. Rơtế ƀă mâu mô đô̆i gak tơkăng kong a troăng kân séa ngăn kơhlong kơhlăng, kơ’vĕng kơ’vong ƀă kơtâk tơnêi khêi bazan, ngin troh a tơneăn kơxô̆ 25 xua Đông mô đô̆i gak tơkăng kong Ia O pơkuâ. Tơneăn krá tơniăn a tơkăng kong to loăng pơlái kong kế rơtâ tá têa kroăng Pô Kô.

Đăi ŭy Nguyễn Đức Võ, kăn ƀô̆ troh pêi cheăng ing Khu pơkuâ mô đô̆i tơring Ia Grai troh đông tơkăng kong Ia O tối, kố cho Têt apoăng ngoh hơngế hngêi vâ tơdah rơnó hơngui a tơkăng kong rơtế khu mô đô̆i gak tơkăng kong:

‘’Tơkâ hluâ mâu hâi á rêh ối akố, tơrŭm cheăng pơla péa pâ tơdâng tơ’mô, tơtro. Troh pêi cheăng gak kring tơkăng kong xuân môi tiah hbrâ mơdât pơreăng COVID-19 a kơpong tơkăng kố. Ngin rơtế tâi tâng mâu pú mô đô̆i tơrŭm cheăng tơdâng tơtro, tá tung tơdroăng rêh ối xuân tơdâng tơtro.

Ahdrối châ pơkâ to pêi cheăng akố, krê á xuân mơnhên troăng tơmiât krá tơniăn, Têt kố kô ối a kơpong tơkăng vâ mơdât mâu ngế mot lo a tơnêi têa pin ôh tá tro luât, xuân môi tiah séa ngăn, gak ngăn vâ gak kring kơpong tơkăng kong. Pêi tơtro tơdroăng cheăng lêng vâ ngin hmiân tuăn ƀă rơpŏng a hngêi xuân hmiân tuăn há’’.

Mâu kăn ƀô̆ mô đô̆i gak tơkăng kong Ia O pêi pro séa ngăn a troăng tơkăng kong

Pêi pro tơdroăng pơkuâ tơkăng kong ƀă hbrâ mơdât pơreăng COVID-19, Têt hơnăm kố, ôh tá xê to khu mô đô̆i gak tơkăng kong, mê khu mô đô̆i séa ngăn tơkăng kong ối ai tơ’nôm tá mâu kăn ƀô̆ troh pêi cheăng ing khu mô đô̆i ƀă khu lêng kuăn pơlê gak kring. Trung tă Vũ Văn An, Trung đô̆i phŏ Khu lêng, pơkuâ tíu gak kơxô̆ 1 – Pơkuâ gak ngăn tơkăng kong ƀă Hbrâ mơdât pơreăng COVID-19, đông mô đô̆i tơkăng kong Ia O, tối ăm ‘nâi: Xua pơreăng COVID-19 xông tâ tú ó xua mê hên khế hiăng hluâ, Đông mô đô̆i gak tơkăng kong Ia O đi đo rak kơtăng mâu tôh pêi cheăng gak drô troăng tơkăng kong. Kăn ƀô̆, mâu mô đô̆i teăng dêi pó gak plâ hâi plâ măng, rế tơniăn tơdroăng hbrâ mơdât pơreăng COVID-19, rế rak krá tơniăn hnoăng pơkuâ tơkăng kong, gak kring tơniăn tung cheăm.

‘’Tơdroăng cheăng roh mơ’nui hơnăm ngin mê kăn pơkuâ đông hiăng pêi pro troh rêm kăn ƀô̆ mô đô̆i vâ rak tơniăn ‘na gak kring tơniăn a kơpong tơkăng kong tối tơdjuôm ƀă tung kơpong gak ngin pơkuâ. Nhŏng o ngin mơnhên 100% kăn ƀô̆ mô đô̆i hmiân tuăn tơdroăng tơmiât, pêi kêi đeăng hnoăng cheăng, tơniăn tŭm tơdroăng gak kring tung kơpong tơkăng kong.

Pơtâng tối mơhnhôk kuăn pơlê pêi tiô kơtăng troăng hơlâ dêi Đảng, luât dêi Tơnêi têa, pêi tơtro tơdroăng hbrâ mơdât pơreăng a kơpong tơkăng kong.

Mâu kăn ƀô̆ mô đô̆i gak tơkăng kong Ia O séa ngăn tơneăn

Tung hơnăm 2021, Đông mô đô̆i gak tơkăng kong Ia O hiăng mơdoh lối 100 hâi pêi cheăng kum kuăn pơlê pêi chiâk deăng, rơnêu troăng pơlê, kơtâo ƀă hía hé. Roh Têt troh Rơnó hơngui vêh, ƀă hên kơxô̆ liăn, mơngế pêi cheăng, kăn ƀô̆ dêi đông mơhnhôk tŏng kum hrĭng kơxuô tơmeăm ăm mâu rơpŏng pá puât mơngế hdroâng kuăn ngo a mâu pơlê, mâu ngế ai hnoăng ƀă kăch măng. Tối ‘na tơdroăng tuăn pâ dêi mâu mô đô̆i Đông tơkăng kong Ia O ăm kuăn pơlê, pôa Nap Pháp, Kăn pơkuâ thôn pơlê Tăng tối ăm ‘nâi:

“Kơpong gak ngăn cho cheăm kơpong tơkăng kong, nhŏng o mô đô̆i gak tơkăng kong tŏng kum kuăn pơlê hên, tơdah păn mâu vâi o ối kŭn, mâu ngế ki ôh tá ai ivá, mơjiâng pro hngêi tuăn pâ ăm mơngế kơtiê, mơngế ai hnoăng ƀă kăch măng, mâu ngoh mô đô̆i gak tơkăng kong tŏng kum liăn, kuăn pơlê mê veăng mơ’no hâi pêi cheăng. Mâu tíu gak ngăn ối gak vâ hbrâ mơdât pơreăng, ki má lối cho to khế hdrối a cheăm ai pơreăng, mâu mô đô̆i xing xoăng dêi pó kum tá hiâm mơno, troh nôkố pơreăng hiăng châ mơdât. Mơnê hên ‘nâng mâu pú hiăng kum ăm cheăm mơdât pơreăng. Troh hơnăm la ngiâ pói mâu mô đô̆i gâk tơkăng kong mơnhông mơdêk, pơtối tŏng kum kuăn pơlê, kum ăm cheăm’’.

Thiê̆u tă Nguyễn Thanh Hà, Kăn phŏ pơkuâ đông gâk tơkăng kong Ia O tối ăm ‘nâi: Têt kố, 100% mâu mô đô̆i a mâu tôh, tíu gak ôh tá vêh tơdah Têt a rơpŏng. Tơdah hnoăng cheăng ối gak pêi cheăng a hâi Têt, tâi tâng pơrá mơnhên hiâm mơno pôu râng hnoăng cheăng, gâk tơkăng kong plâ hâi plâ măng.

‘’Tung roh hdrối, tung ƀă kơ’nâi Têt Lo hơnăm nếo, ƀă mâu kăn ƀô̆ Đông mô đô̆i gak tơkăng kong Ia O, ngin đi đo hlê plĕng pêi pro xuân môi tiah mâu tơdroăng hnê mơhno dêi Khu xiâm pơkuâ mô đô̆i tung tơdroăng pêi cheăng tơplâ mơdât ƀă mâu ngế xôi, ki rơhêng vâ tối tung hneăng roh hdrối têt. Ngin đi đo hnê mơhno mâu khu pêi cheăng ‘nâi tơdroăng tung peăng pin a tơkăng kong, ƀă peăng tá tơkăng kong vâ ai troăng tơplâ mơdât mâu ngế xôi a kơpong tơkăng kong.

Khu hnê mơhno đông ngin đi đo hnê mơhno tơdroăng tung cheăm tơrŭm ƀă khu râ kăn pơkuâ cheăm tung tơdroăng hbrâ mơdât pơreăng. Pakĭng mê ngin xêo tâi tâng mâu rơpŏng kơtiê ƀă mâu rơpŏng vâ chê kơtiê vâ ngin ai mâu kơxuô tơmeăm tŏng kum tung roh Têt Lo hơnăm nếo Nhâm Dần 2022’’.

Tơ’nôm pa môi hơnăm nếo tơdah rơnó Hơngui a tơkăng kong, laga mâu ngế mô đô̆i Đông gak tơkăng kong Ia O hiăng lôi dêi tơdroăng tơdroăng khíu pâ krê, xuân đi đo râng krá hnêa kuăn pơlê tung tơnêi têa tơdah Têt tơniăn lĕm.

Hoàng Qui chêh

A Sa Ly tơplôu ƀă tơbleăng