Hâi  leh veăng ai lối 1 rơpâu ngế pêi cheăng, hok tro, sinh viên... tung kong pơlê; 30 khu mơdró, mâu tíu pêi cheăng, mâu tíu hnê cheăng pêi ƀă kô rah lối 10 rơpâu ngế mot pêi cheăng. Pakĭng mâu tơdroăng pêi cheăng a hngêi kơmăi, rah lăm hriâm kong ê, hâi leh tăng cheăng pêi rôh apoăng kố rah hên ngế cheăng ‘na kih thuât viên pro phom kơlôn, spa, mâu ngế  cheăng ngăn pơkeăng khăm pơlât, mâu ngế cheăng hơ’lêh pro tơmeăm kâ, têa ôu, mâu ngế veăng pêi ki kố ki mê, hnê tối tê tơmeăm.

Rôh kố, Tíu chêh hlá tơbeăng Hngêi rak liăn Tơnêi têa Việt Nam xuân tơkŭm po tơdroăng “Hlê plĕng ‘na liăn ngân” vâ kum mơngế pêi cheăng a Dak Lak chôu pâ tơdroăng hriâm ki kal ‘na liăn ngân, kô hlê ‘na tơdroăng xiâm rêi ton nah dêi liăn Việt Nam, tơdroăng tơpui ‘na liăn; Mơngế pêi cheăng ối châ veăng rup kơxô̆ ngăn châ mơhá tơmeăm ki klâi. Rôh kố, Liên đoân ngăn Cheăng pêi kong pơlê Dak Lak xuân diâp ăm 50 kơxu tơmeăm ăm đoân viên kŏng đoân ki xơpá.