A Dak Lak, sap hâi  lơ 6 troh lơ 8/1, Khu xiâm ngăn ‘na tơrŭm Pêi cheăng  Việt Nam tơrŭm ƀă Khu tơrŭm ngăn ‘na pêi cheăng kong pơlê Dak Lak tơkŭm po  ‘’Kơchơ Têt kŏng đoân hơnăm 2023’’. Kố cho tơdroăng pêi pro ki pơxúa khât veăng ‘no hnoăng tơmâng khât troh tơdroăng rêh ối dêi mâu kŏng nhân, mâu ngế pêi cheăng  ki xơpá, rơpŏng kơtiê, vâ ôh tá ai ngế ki lâi lôi pá rŏng drêng troh Têt, rơnó hơngui.

Râng a kŏng hên mâu tơmeăm nếo rôe tung ‘’ Kơchơ Tết  kŏng đoân hơnăm 2023’’ ngoh Nguyễn Hữu Lâm Sơn, kŏng nhân kŏng ti Thép ASEAN, kơpong hngêi kơmăi Hòa Phú tối ăm ‘nâi:

“Á châ vâi ăm 2 to phĭu 150 rơpâu liăn mê a lăm rôe kơhôp klô̆ng kố, ‘na tơmeăm ki ôh tá ăm liăn mê ai 1 to phich ki pế têa, môi  kŏng kếo têa rơmâ ƀă môi plâ ếo sâp’’.

Rôh apoăng á veăng rôe tơmeăm a kơchơ ‘’Tết kŏng đoân‘’, nâ Nguyễn Thị Phượng, kŏng nhân Kŏng ti mơgrúa hyôh kong prâi kong pơlê Dak Lak tối, tơdroăng cheăng mê hiăng kum ăm mâu ngế tung kŏng đoân ƀă mơngế pêi cheăng ai rôh châ rôe hên tơmeăm Têt ƀă yă rơpâ.

“Hơnăm kố cho rôh apoăng á troh a kố xo tơmeăm, á tâ hơniâp tung hiâm mơno ƀă phiu ro. Mâu tơmeăm ki hbru mê kum ăm rơpŏng á ai tơ’nôm Têt vâ  phiu ro dêi tung rơpŏng hngêi”.

Kơchơ Tết Kŏng đoân 2023 kong pơlê Dak Lak po sap hâi lơ 6 troh lơ 8/1/2023, ai 40 tíu tơbleăng tê tơmeăm, tê mâu tơmeăm hmâ xúa rêm hâi ƀă yă rơpâ ki ‘nâ “ôh tá ai yă’’ ăm lối 3.000 ngế kŏng nhân ki pêi cheăng. Tơdrêng amê, Liên đoân pêi cheăng kong pơlê Dak Lak xuân hbru 400 kơxu tơmeăm ăm mơngế pêi cheăng. Hlối tơkŭm pêi pro mâu tơdroăng mơhno túa lĕm tro, xah hêi, ro, hnê ‘na luât; khăm, hnê rak vế ivá ƀă hlối xing xoăng pơkeăng tê kơtê ăm mâu đoân viên, mơngế pêi cheăng.

Pôa Nguyễn Công Bão, Kăn tơrŭm hnê ngăn Pêi cheăng kong pơlê Dak Lak ăm ‘nâi:

“Kơchơ Kŏng đoân cho vâ pơtih tê, ki Khât cho tơmâng tŏng kum ăm mâu ngế pêi cheăng. Kố cho rôh apoăng Kŏng đoân kong pơlê châ tơkŭm po kơchơ Têt kŏng đoân, apoăng  ngin xuân tô tuăn, la ƀă tơdroăng veăng kum dêi Khu xiâm tơrŭm pêi cheăng, ki veăng tơmâng hnê mơhno dêi khu kăn  đảng kong pơlê, tơrŭm ƀă Vi ƀan ƀă mâu kơvâ cheăng tơdjâk troh ƀă malối cho ki veăng kum dêi mâu nâ o tung kŏng đoân rêm râ ngin hiăng teăm tơbleăng, mơhnhôk vâ chê 40 tíu pêi cheăng veăng tê tơmeăm’’.

Dak Lak cho môi tung 22 kong pơlê châ Tổng Liên đoân Pêi cheăng Việt Nam roh tơkŭm po tơdroăng ‘’ Kơchơ Tết Kŏng đoân hơnăm 2023’’. Tiô jâ Trần Thị Thanh Hà, ngế cheăng tung khu kăn hnê ngăn, ngế pơkuâ ngăn khu Pêi cheăng, Khu tơrŭm Pêi cheăng Việt Nam tối, kố cho tơdroăng pêi pro ai pơxúa khât tung khu cheăng kŏng đoân veăng kum vâ mâu rơpŏng kŏng đoân, mơngế pêi cheăng ki xơpá châ ro Têt rơnó hơngui, tơdah Têt tơtô, hơniâp ro’’.

“Mâu kơchơ Têt kŏng đoân hơnăm kố châ tơkŭm po kân sap 30-120 tiu tơbleăng tê tơmeăm ăm mâu kong pơlê, amê ai mâu tíu tơbleăng tê rôe ôh tá ăm liăn ƀă malối cho Tổng Liên đoân pêi cheăng Việt Nam ai sap 25 rơpâu troh 3 rơpâu vocher ăm môi rôh po kơchơ tê ƀă rêm vocher ai 300 rơpâu liăn vâ mơngế pêi cheăng chiâng xúa vâ rôe mâu tơmeăm a tíu tê ƀă malối ngin xuân mơhnhôk hên mâu tíu tê dêi tíu xiâm tơnêi têa ƀă kong pơlê tê mâu tơmeăm ki lĕm ƀă yă rơpâ sap 10-50 troh 70 % vâ mơngế pêi cheăng ai môi rôh Tết tơtô lĕm’’.

A kơpong hngêi kơmăi pro tơmeăm Linh Trung 1, Pơlê kong kân Hồ Chí Minh, Kŏng đoân kơpong hngêi kơmăi pro tơmeăm xuân hiăng tơkŭm  po tơdroăng ‘’Hâi leh tơrŭm pâ - Têt trâm mâ dêi rơpó’’ hơnăm 2023, vâ tơmâng tŏng kum ăm chât rơpâu kŏng nhân ki xơpá. Hâi leh pêi pro hên tơdroăng cheăng, pơxúa khât. Kŏng nhân châ ăm phĭu rôe tơmeăm vâ pơ’lêh xo hên kế tơmeăm, tơmeăm xúa tung rơpŏng hngêi tung rôh Têt.

Pakĭng mê, tơdroăng mê xuân hiăng hbru ăm vĕ to tơƀai, vĕ to rơxế lơ treng, vĕ to rơxế kân, tơmeăm Têt ăm mâu kŏng nhân ki xơpá. Kŏng nhân Nguyễn Thị  Thiết a kŏng ti Freetrend, pơlê a Quảng Trị châ ăm vĕ to rơxế vêh a pơlê ăm tá mâu rơpŏng hngêi, phiu ro ăm ‘nâi:

“Kố cho rôh apoăng á châ xo vé hơ-ui pâ vêh kâ Têt klêi kơ’nâi 3 hơnăm pêi cheăng. Ƀă vĕ mê a rôe pa kong lối 2 rơtuh, nôkố châ ăm vĕ mê chía tâ iâ kơxô̆ liăn’no hên. Ôh tá xê to á châ vêh  ƀă môi kơtâ vĕ mê tâi rơpŏng hngêi á ai 4 ngế xuân vêh kâ Têt’’.

Tiô tối tơbleăng hdrối dêi Kŏng đoân Kơpong hngêi kơmăi pro tơmeăm - Kơpong hngêi kơmăi Pơlê kong kân Hồ Chí Minh kô tơmâng tŏng kum ăm lối 30.000 đoân viên kŏng nhân ing mâu tơdroăng pêi pro môi tiah: Hâi leh kŏng nhân, Po kơchơ tuăn pâ, Têt tơkŭm dêi rơpó, trâm mâ kŏng nhân ki ối pêi cheăng a mê, ăm vĕ to tơ ƀai, vĕ to rơxế lơtreng, vĕ to rơxế kân, pôe xâk, rơnuâ pro kơnêi chêng kŏng tê kơtê, ăm chư  pơto pơtih, mơdĭng tơ’noăng karaoke..., tâi tâng kơxô̆ liăn lối 20 rơtal liăn.