VOV4.Xơ Đăng - Kong pơlê Kon Tum ai troăng tơkăng kong xŏn lối 292 km tơkoh ƀă péa to kong têa Lếo prếi Kul. Rơtế ƀă hnoăng cheăng rak vế krá tơniăn hnoăng pơkuâ, mơjiâng troăng tơkăng kong hơniâp lĕm, tơrŭm tơroâ, rêm rôh Têt troh, rơnó Hơngui vêh, kăn ƀô̆ lêng mố đô̆i gâk tơkăng kong Kon Tum ối tơkŭm po hên tơdroăng ki rak ngăn, tŏng kum Têt ăm kuăn pơlê, hlo nhên tơdroăng ki tơrŭm pơla khu lêng ƀă kuăn pơlê a tíu tơkăng kong Tơnêi têa.

Rơpŏng nâ Y Thêu, hdroâng kuăn ngo Jêh -Triêng ối a pơlê Đăk Ga, cheăm tơkăng kong Đăk Plô, tơring Đăk Glei, kong pơlê Kon Tum cho môi tung 12 rơpŏng kuăn pơlê ai tơdroăng rêh ối pá puât. Xua hên xiâm kối tơdroăng rêh ối dêi 5 ngế tung rơpŏng đi đo ôh tá tŭm tơmeăm kâ. Vâ chê Têt pói tơngah kân má môi dêi rơpŏng cho ai tŭm phái kâ, ôh tá khên tơmiât châ kâ kơƀăn tơxông ƀă kơƀăn kĕo mê thăm ôh tá khên tơmiât troh. Tơdroăng phiu ro troh ƀă rơpŏng nâ Y Thêu drêng kăn ƀô̆, mâu mô đô̆i gak tơkăng kong Đông Đăk Blô troh a hngêi kơ-êng tơdroăng rêh ối rơpŏng, diâp kơxuô tơmeăm tŏng kum rơpŏng ai tŭm tơmeăm kâ Têt.

Rơtế amê kăn ƀô̆ mô đô̆i gak tơkăng kong ối krếo rơpŏng veăng Hâi kơdrâm mơngế kơxuô kơƀăn tơxông ƀă châ xing xoăng djâ vêh kâ Têt. Nâ Y Thêu tối tiah kố:

“Rơpŏng pá puât tơkôm Têt hơnăm nếo laga ôh tá ai ki klâi vâ tơdah Têt. Á xuân mơnê hiăng diâp kơxuô tơmeăm troh a kŏng. Hơnăm nếo á xuân phiu ro vâ châ rôe môi iâ kơƀăn kĕo vâ rơtế tơdah Têt rơtế rơpŏng, phiu ro rơtế rơpŏng hngêi’’.

Kăn ƀô̆, mô đô̆i gak tơkăng kong Kon Tum rơtế ƀă kuăn pơlê kơxuô kơƀăn tơxông tung hâi Kơdrâm kuăn pơlê veăng kơxuô kơƀăn tơxông

Ôh tá ăm ai tơdroăng ai rơpŏng ôh tá ai tơmeăm vâ kâ Têt, tŏng kum tâi tâng rơpŏng kuăn pơlê châ kâ Têt mê cho tơdroăng mơ-eăm dêi kăn ƀô̆, mô đô̆i péa Đông mô đô̆i gak tơkăng kong Đăk Blô ƀă Sông Thanh pro đông tung cheăm Đăk Plô, tơring Đăk Glêi. Rơtế ƀă pơkâ pêi tŏng kum Têt ăm kuăn pơlê dêi Đảng ủy, Vi ƀan cheăm Đăk Blô, péa Đông mô đô̆i gâk tơkăng kong xuân mơjiâng pơkâ tơrŭm ƀă Đảng ủy, khu râ kăn pơkuâ tơkŭm po hên tơdroăng phiu ro Têt, tơdah rơnó Hơngui ăm kuăn pơlê cheăm tơkăng kong, ki má lối cho Tơdroăng ‘’Hơngui tơkăng kong hơtô hiâm mơno kuăn pơlê tung pơlê’’ ƀă ‘’Hâi kơdrâm kuăn pơlê veăng kơxuô kơƀăn tơxông’’.

Jâ Y Thanh, Kăn hnê ngăn Vi ƀan tơring Đăk Glêi tối ăm ‘nâi, tơring ai 3 cheăm tơkăng kong ƀă kong têa pú hmâ Lếo, mê cho: Đăk Plô, Đăk Nhoong ƀă Đăk Long. Kơnôm mâu tơdroăng pêi cheăng xua khu mô đô̆i gak tơkăng kong tơkŭm po, kuăn pơlê tơkăng kong ai tơ’nôm hên tơdroăng phiu ro rơdah Têt, phiu ro rơnó Hơngui:

“Mâu mô đô̆i gak tơkăng kong a mâu Đông rơtế vâi krâ kuăn pơlê a tơkăng kong tung roh kố châ phiu ro hơngui tơdah Têt. Kuăn pơlê châ tơdah mâu kơxuô tơmeăm dêi mâu mô đô̆i rơtế mâu Khu râ kăn pêi cheăng dêi Khu xiâm pơkuâ mô đô̆i, klêi mê Khu xiâm pơkuâ Mô đô̆i gâk tơkăng kong mê kuăn pơlê phiu ro ‘nâng. Ing mê, pro tơrŭm cheăng krá chân pơla mô đô̆i gak tơkăng kong ƀă kuăn pơlê a kơpong tơkăng kong. Vâi krâ kuăn pơlê châ kâ Têt phiu ro, hơtô, hơniâp lĕm’’.

Đăi tă Lê Minh Chính, Kăn pơkuâ hnê ngăn Đảng Mô đô̆i gak tơkăng kong dêi kong pơlê Kon Tum diâp kơxuô tơmeăm Têt khu râ kăn pơkuâ ƀă kuăn pơlê cheăm Đăk Plô, tơring Đăk Glêi

Vâ tơdroăng phiu ro Têt troh ƀă tâi tâng kuăn pơlê kơpong tơkăng kong, Têt Lo hơnăm nếo Nhâm Dần hơnăm kố, Khu xiâm pơkuâ Mô đô̆i gak tơkăng kong dêi kong pơlê Kon Tum tơdâng kơxô̆ liăn xing xoăng 300 kilô tơxông ăm rêm Đông mô đô̆i gâk tơkăng kong pơla péa tơnêi têa pú hmâ Lếo ƀă Kul vâ tơkŭm po Hâi kơdrâm kuăn pơlê veăng kơxuô kơƀăn tơxông. Kăn ƀô̆, mô đô̆i mâu đông xuân veăng mơ’no iâ kơxô̆ liăn tơná rôe mâu tơmeăm ki kal xúa rêm hâi lăm kơ-êng, tŏng kum teăm tơdrêng mâu rơpŏng kuăn pơlê ai tơdroăng rêh ối pá puât vâ mâu rơpŏng kố châ kâ Têt.

Pakĭng mê, Tơdroăng ‘’Hơngui mô đô̆i gak tơkăng kong hơtô hiâm mơno kuăn pơlê tung pơlê’’ châ tơkŭm po a tâi tâng 13 cheăm tơkăng kong dêi 4 tơring Đăk Glêi, Ngọc Hồi, Sa Thầy ƀă Ia H’Drai ƀă mâu tơdroăng pêi pro ki tơxâng ƀă tơdroăng nôkố hiăng tâk tơ’nôm tơdroăng phiu, trâu hơngế tơ’nôm tơdroăng tuăn pâ khu lêng kuăn pơlê tíu tơkăng kong.

Đăi tă Lê Minh Chính, Kăn pơkuâ hnê ngăn Đảng Mô đô̆i gak tơkăng kong kong pơlê Kon Tum tối ăm ‘nâi:

“Tung tơdroăng kố tơkŭm po hên tơdroăng, tơdroăng lăm pôu kơ-êng, diâp kơxuô tơmeăm ăm mâu rơpŏng ai troăng hơlâ tơnêi tŏng kum, rơpŏng kơtiê, hlối tơkŭm po mâu tơdroăng tŏng kum troăng tăng cheăng pêi ƀă tơmeăm khoăng ăm rơpŏng ai tơdroăng rêh ối pá puât. Tơdrêng amê, tơkŭm po mâu tơdroăng mơhno túa lĕm tro, mâu tơdroăng xah hêi tiô khôi hmâ vâi krâ nah vâ vâi krâ kuăn pơlê châ tơdah Hơngui phiu ro ƀă hiâm mơno tâi tâng rêm ngế kuăn pơlê pơrá châ xah hêi Têt ôh tá lôi kơbố parŏng’’.

Rơtế ƀă tơdroăng phiu ro rơdah Têt Lo hơnăm nếo Nhâm Dần 2022, drô troăng tơkăng kong tơnêi têa xŏn 292km tơkăng péa kong têa pú hmâ Lếo ƀă Kul, kuăn pơlê a 99 thôn, pơlê, ối tung 13 cheăm dêi 4 tơring a kong pơlê Kon Tum ai hên tơdroăng phiu ro vâ loi tơngah mot hơnăm nếo. Troh nôkố hiăng ai 4/13 cheăm tơkăng kong dêi kong pơlê Kon Tum hiăng châ plah thôn pơlê nếo.

Tơdroăng rêh ối dêi lối 16.200 rơpŏng ƀă 25 hdroâng mơngế nhŏng o rơtế rêh ối rế hía rế châ pơ’lêh, kơxô̆ rơpŏng kơtiê kơdroh rĕng. Têt tiô khôi hmâ vâi krâ nah cho roh vâ kăn ƀô̆, mâu mô đô̆i gak tơkăng kong Kon Tum rơtế khu râ kăn pơkuâ, kuăn pơlê thăm krá tơniăn tâ tơdroăng rŭm môi tuăn tơdjuôm ivá, môi hiâm mơno gâk kring hnoăng pơkuâ tơnêi tơníu, gâk kring tơkăng kong tơnêi têa ƀă mơnhông mơdêk cheăng kâ – rêh ối pơlê pơla mơdêk tơdroăng rêh ối kuăn pơlê tíu a go tơnêi têa.

Khoa Điềm chêh

A Sa Ly tơplôu ƀă tơbleăng