VOV4.Xơ Đăng - Xông tơpui a leh tơbâ 67 hơnăm Hâi Ƀok thái pơkeăng Việt Nam lơ 27/7, pôa Phạm Minh Chính, Ngế pro xiâm hnê ngăn Chin phuh tối nhên, ‘’tơdroăng cheăng khăm pơlât cho môi tơdroăng cheăng ki phá tơ-ê’’ ƀă tơdroăng rak ngăn, rak vế ivá kuăn pơlê rế hía rế tơtro tâ kơjo má môi, cho tơdroăng ki tô tuăn dêi Khu râ kăn pơkuâ Đảng, Tơnêi têa pin.

Pôa Phạm Minh Chính, Ngế pro xiâm hnê ngăn tơnêi têa

Chin phuh hnê mơhno mâu Khu xiâm, kơvâ cheăng thâ hriăn plĕng pơkâ tơbleăng troăng hơlâ ki phá tơ-ê ƀă mâu ngế pêi cheăng khăm pơlât, rơnêu, tơleăng mâu tơdroăng ki ối pá, pro tơ’lêi hlâu tơdroăng khăm pơlât ăm kuăn pơlê. Pin ối hên tơdroăng thế pêi vâ tơxâng tâ tơdroăng pói vâ dêi kuăn pơlê. Kuăn pơlê pói vâ mâu tíu khăm pơlât krúa lĕm tâ, rơkê tâ, tơ’lêi hlâu tâ; yă khăm pơlât, pơkeăng pơlât, tơmeăm khăm pơlât châ pơkuâ tơtro tâ, tơbleăng tơdrăng tâ; troăng hơlâ ƀaoh hiêm khăm pơlât, ƀaoh hiêm pơlê pơla tơtro ƀă châ tơƀrê tâ.

A Sa Ly tơplôu ƀă tơbleăng