VOV4.Xơ Đăng - Kơxê lơ 1/6 Kuô̆k hô̆i hiăng tơpui tơno a hngêi hôp kân tơ’nôm tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla ƀă liăn ngân tơnêi têa hơnăm 2021 ƀă mâu khế apoăng hơnăm 2022. Veăng xông tơpui a hngêi hôp kân, Kăn teăng mâ Kuô̆k hô̆i cho pôa K’Nhiễu – Khu Lâm Đồng veăng tơpui: Kơpong vâi krâ hdroâng kuăn ngo ƀă kong ngo ai tíu ki kal tung mơdêk tơnêi têa xuân môi tiah tơdroăng pêi cheăng kăch măng dêi Đảng. Kuô̆k hô̆i hneăng má XIV hiăng tơbleăng ăm pêi pro Pơkâ kơxô̆ 120 kĭ troăng hơlâ mơ’no liăn cheăng tơdroăng pơkâ tơnêi têa mơnhông cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030. Chin phuh hiăng hnê mơhno kơtăng, ó rơdêi mâu khu xiâm pêi pro ƀă po rơdâ.

Pôa K’Nhiễu pâ thế Chin phuh, Ngế pro xiâm hnê ngăn Chin phuh tơmâng, hnê mơhno mâu khu xiâm, kơvâ ki tơdjâk thế ai môi tơdroăng khŏm mơ-eăm păng ‘nâng tơdroăng kal kí rơdêi má môi vâ tơkŭm mơngế pêi cheăng, ivá, tuăn ngôa rơkê vâ pêi pro tơkŭm po pêi pro tơdroăng, mơ-eăm mơ’no liăn 100% kơxô̆ liăn môi tiah pơkâ pêi hiăng châ pơcháu.

A Sa Ly tơplôu ƀă tơbleăng