VOV4.Xơ Đăng - Kơxo lơ 12/4, Khu xiâm pơkuâ cheăng pêi mô đô̆i rong râ ƀă Rêh ối pơlê pơla, Tổng Liên đoân pêi cheăng Việt Nam, Ƀaoh hiêm pơlê pơla Việt Nam, Liên đoân Te emơdró ƀă Kơmăi kơmok Việt Nam. Khu tê mơdró kŭn ƀă krâ kơvâ Việt Nam kĭ Tơdroăng tơrŭm ‘na tŏng kum mơngế pêi cheăng, mơngế xúa mơngế pêi cheăng ƀă mơnhông tíu pêi cheăng. Ki nhên, tung la ngiâ, rêm pâ pêi pro kơtăng, châ tơƀrê, tơniăn mâu hnoăng cheăng, troăng pêi edei Tơdroăng pro tơniăn ƀă mơnhông mơdêk cheăng kâ – rêh ối pơlê pơla tiô Pơkâ kơxô̆ 11 dêi Chin phuh; Tơniăn pêi pro pơkâ mơnhông mơdêk tơrŭm pêi cheăng tơtro, tơniăn ƀă rơkê tung tơdroăng nếo.

Leh kĭ tơkêa pơla mâu tíu cheăng

Tơdjêp tơtro tơdroăng mơjiâng pro ƀă kal vâ ƀă mơnhông mơdêk tíu pêi cheăng krá tơniăn, pơtroh teăm tơdrêng mơngế pêi cheăng ki rơkê ăm mâu tíu pêi cheăng; Pơtối pêi pro châ tơƀrê mâu troăng hơlâ rêh ối pơlê pơla, kum rêh ối pơlê pơla, ki má lối cho troăng hơlâ ƀaoh hiêm pơlê pơla, tơniăn kum tung tơdroăng rêh ối pơlê pơla krá tơniăn ăm mơngế pêi cheăng. Rêm pâ kô pêi pro ƀă mơnhên tơdroăng châ tơƀrê mâu troăng hơlâ tŏng kum mơngế pêi cheăng, mơngế xúa mơngế pêi cheăng, ki má lối cho mơgêi, mơnhên mâu troăng hơlâ tŏng kum mơngế pêi cheăng, mơngế xúa mơngế pêi cheăng tiô pơkâ kơxô̆ 68 dêi Chin phuh.

A Sa Ly tơplôu ƀă tơbleăng