Tung 11 khế dêi hơnăm 2022, khi râ pơkuâ cheăng kong pơlê Kon Tum hiăng châ ’nâi ai 83 rôh ngế pro xôi luât rak ngăn kong, xo tơvêh lối 419m3 loăng tŭm tuá, tơnêi kong tro hdi xo lối 32ha.

A rôh kơ-êng mâu kăn Hô̆i đong kong pơlê Kon Tum, kăn teăng mâ cho pôa Trần Bá Tuấn tối nhên 2 todroăng ki hlo ai a tơring Ia HDrai ƀă Sa Thầy ƀă ki lŭp châ hrĭng m3 loăng, pôa tối hiăng ai tơdroăng ôh tá vâ tơmâng khât tung rak ngăn, ôh tá pêi tâi hnoăng cheăng tơná, thăm nếo ối ăm mâu khu ‘mêi châ hdi xo:

“Ƀă tơdroăng hdi xo kân môi tiah mê tâng pin pêi tro hnoăng cheăng tơrŭm ƀă, ‘nâi nhên hnoăng cheăng rak ngăn dêi mâu kơ koan, tíu pêi cheăng tung mê ai ngế pơkuâ rak ngăn kong, khu rak ngăn kong, mâu kăn cheăm, tơring  ƀă hên ki ê, mê kô ôh tá ai môi ngế ki lâi châ mot ko loăng hên môi tiah mê.

Tâng ko hên vâi châ pơto chơ troăng lâi? xuân ối ai mâu tíu gâk ngăn dêi mâu kơvâ cheăng nếo mê thế ’nâi hnoăng cheăng dêi mâu ki gâk ngăn a rêm tíu dêi rêm kơvâ cheăng mê tiah lâi?”.

Tiâ a ngiâ Hô̆i đong hnê ngăn kong pơlê, pôa Nguyễn Hữu Tháp, kăn phŏ hnê ngăn Vi ƀan kong pơlê Kon Tum tối, lôi ai tơdroăng xôi luât ‘na rak ngăn kong xua tơdroăng cheăng dêi mâu kăn pơkuâ, khu hnê mơhno dêi râ ủy, mâu kăn dêi mâu tíu pêi cheăng hâi vâ tơmâng khât, hâi tơmâng tro tơdroăng; Hnoăng cheăng dêi mâu kăn ƀŏ cheăng ‘na rak ngăn kong hâi pêi tâi ivá; Ối pro pơhôi tung rak ngăn, veăng môi tuăn ƀă khu ki tong ko loăng, ăm chơ loăng hmâng vâ; Luât pơkâ ‘na tơdroăng loăng kong hâi nhên khât, ối tơvâ tơvân; Ivá cheăng ƀă ki rơkê dêi mâu ngế cheăng rak ngăn ƀă mâu ki pơkuâ kong ôh tá tơkê... ‘Na troăng rơhlâ rak ngăn kong, pôa Nguyễn Hữu Tháp tối ăm ‘nâi:

“Vi ƀan hnê ngăn kong pơlê kô pơtối hnê mơhno mâu kơvâ cheăng ƀă mâu kong pơlê ki ngăn cho râ tơring, râ cheăm vâ châ rak kong. Mơdêk hnoăng cheăng dêi ngế pơkuâ kong ƀă mâu khu rak ngăn kong. Mơdêk tâ nếo tơdroăng lăm ngăn, tí tăng ngăn malối a rơnó pêi chiâk, muih kong, treăm chiâk deăng. Vi ƀan kong pơlê kô mơjiâng pơkâ vâ mơdêk tơdroăng cheăng lăm ngăn, tí tăng ngăn ƀă hlối hnê mơhno mâi cheăm tơring, ing tơring troh cheăm ƀă hnê ăm mâu ki pêi cheăng rak ngăn vâ rĕng châ ‘nâi, teăm rup pơxâu phâk, thế pơxâu phâk kơtăng mâu ki pro xôi’’.

Pôa Nguyễn Hữu Tháp, Kăn phŏ hnê ngăn Vi ƀan kong pơlê Kon Tum xuân tối, tâng pơchông ƀă hơnăm 2021 tơdroăng pro xôi luât rak ngăn kong tung kong pơlê hiăng kơdroh tá kơxô̆ rôh, tơnêi lơ tro hdi xo ƀă loăng ki vâi ko  xôi luât. Tung hơnăm, kong pơlê hiăng tơleăng pơxâu phâk liăn a 63 tơdroăng, pơxâu phâk 17 tơdroăng ƀă dế séa ngăn, mơnhên 32 tơdroăng. ‘Na hnoăng cheăng hiăng châ tơleăng pơxâu 27 ngế, tung mê ai 16 ngế kăn hnê ngăn.

Hngêi tơleăng kuăn pơlê rêm râ hiăng tơleăng 4 tơdroăng pơxâu phâk 20 ngế ai xôi tâi tâng kơlo pơkâ pơxâu phâk 347 khế kroăng tung hngêi phâk, 65 khế kroăng phâk ăm mâu ngế ki phâk la châ lo pa kong ƀă hnê pât ôh tá kroăng 60 khế.