VOV4.Xơ Đăng - Tơdroăng ki 24 ngế kuăn pơlê Việt Nam kơtâu hdâ lo ing casino a tíu tơkăng kong Kul – Việt Nam ƀă mâu rôh ki pro leăm mâu ngế pêi cheăng ôh tá tro luât ngi kong têa achê kố châ pơlê pơla tơmâng ngăn khât. A rôh hôp tơbleăng tiah hmâ hneăng hôp Khu xiâm tơpui kâ po a mơ’nui măng tĭng hdrối, ngế cheăng tơpui kâ Việt Nam cho jâ Lê Thị Thu Hằng tối nhên, mâu kơ koan ki ai tơdjâk ƀă mâu kong pơlê kal hbrâ kơchăng, mơdêk hlê plĕng dêi pơlê pơla, dêi kuăn pơlê ƀă tơdroăng ki lăm pêi cheăng a kong têa ê, tung mê ai Kul.

Hlo mâu tơdroăng rế ton rế hên tơdroăng mơngế Việt Nam tro mâu ki leăm tăng cheăng pêi djâ lăm pêi cheăng a kong têa Kul ƀă ai trâm hên xơpá tung tơdroăng pêi cheăng, Ngế kum cheăng tơpui kâ jâ Lê Thị Thu Hằng ăm ‘nâi:

“Kố cho tơdroăng ki ngin xuân tơmâng khât. Ngế xiâm tơpui tơno tối, mâu kơ koan teăng mâ Việt Nam a kong têa Kul tơrŭm ƀă nhên khât ƀă mâu khu xiâm pơkâ cheăng, kong pơlê tung kong têa mê, malối cho mâu kong pơlê ki achê tíu tơkăng kong bă kong têa Kul hlối tơrŭm ƀă kơ koan, khu râ pơkuâ cheăng a kong pơlê ki mê vâ tơdah xo tơdroăng, mơnhên, tơbleăng hên troăng rơhlâ kum kuăn pơlê ƀă teăm tơdrêng kum kuăn pơlê ki xơpá, hluăn ing xía vâ.

Pơla hdrối kố nah, mâu kơ koan khu râ pơkuâ cheăng hiăng tŏng kum ƀă djâ vêh kĕn Việt Nam dâng lối 500 ngế kuăn pơlê châ vêh a tơnêi têa pin tơniăn, kum pro hlá mơ-eá ăm rơpâu ngế kuăn pơlê ki ê”.

Tung 6 khế apoăng hơnăm kố, Khu xiâm Kŏng an hiăng ‘nhiê tah troăng khu ki ‘mêi, rup hên ngế ki lơ pơlông djâ mâu ngế lăm pêi cheăng hmâng vâ a kong têa Kul ƀă hlối ăm hlá mơ-éa hnê tối tơbleăng hdrối ăm kuăn pơlê ki ai tơdjâk tơdroăng mê. Tiô Ngế tơpui kâ tối, drêng mâu ngế pêi cheăng dêi Việt Nam lăm cheăng a kong têa Kul, hên ngế trâm xơpá tung pơla pêi cheăng, la tung pơla tơbleăng tơdroăng kring vế kuăn pơlê, mâu kơ koan teăng mâ Việt Nam xuân trâm mâu tơdroăng pá há.

Jâ Lê Thị Thu Hằng ăm ‘nâi:

“Ki hdrối mê, cho tơdroăng tơdah vâ veăng tŏng kum kal thế veăng tơrŭm ing peăng kơ koan khu râ pơkuâ cheăng dêi kong têa ki mê há. Hên mơngế ki lăm pêi cheăng mê ôh tá ai hlá mơ-éa ki klâi tung châ, ôh tá ai hlá mơ-éa ki vâ mot lo xua tơkâ luâ kong têa Kul hmâng vâ, mê ai thế ton hên hâi vâ mơnhên tơdroăng ‘na ngế ki mê ‘na nôu pâ nhŏng o gá xuân môi tiah pro pá khât tung tơdroăng pơcháu, tơdah xo pcháu. mâu kơ koan teăng mâ Việt Nam a Kul hiăng mơ-eăm khât hbrâ rơnáu xing xoăng tơdroăng cheăng chôu vâ pêi cheăng, trâm tơpui ƀă thế đi đo tơpui ƀă peăng Kul vâ tơleăng mơnhên tơdroăng mê”.

Jâ Lê Thị Thu Hằng xuân tối, tung la ngiâ, Khu xiâm tơpui kâ ƀă mâu kơ koan teăng mâ Việt Nam a kong têa Kul kô tơrŭm ƀă mâu kơ koan khu râ pơkuâ cheăng, mâu kong pơlê tung tơnêi têa ƀă peăng Kul vâ tơbleăng mâu luât pơkâ xuân môi tiah mơdêk tơdroăng cheăng pêi a tíu pêi cheăng teăng mâ, kring vế kuăn pơlê pin a kong têa Kul, djâ vêh a tơnêi têa mâu kuăn pơlê pin ki tro vâi heâk pơlông djâ lăm pêi cheăng hmâ vâ, rak tơniăn hnoăng ki pơxúa, tơtro ƀă luât, tơxâng dêi kuăn pơlê Việt Nam.

Mâu cheăm, tơring, kong pơlê xuân thế mơdêk hnoăng cheăng séa ngăn, tối tơbleăng hdrối ăm kuăn pơlê drêng lăm pêi cheăng a kong têa ê.

A rôh hôp ƀă khu chêh hlá tơbeăng, po ngăn tí tăng ‘nâi ‘na tơdroăng chât ngế Việt Nam kơkâ luâ têa kroăng, kơtâu hdâ ing casino a tíu tơkăng kong kong têa Kul , jâ Lê Thị Thu Hằng Ngế kum tơpui kâ tối ăm ‘nâi, Khu kăn pêi cheăng teăng mâ Việt Nam a kong têa Kul hiăng pêi cheăng ƀă mâu kơ koan khu râ pơkuâ cheăng a kong têa ki ê, pâ thế rĕng séa ngăn, mơnhên xiâm ing lâi ƀă hnoăng cheăng pêi dêi rêm pâ tung tơdroăng ăm ai tơdroăng ki mê. Nôkố ivá mâu ngế ki hiăng vêh a tơnêi têa mê hiăng tơniăn ƀă khăm ngăn ăm ‘nâi âm tính ƀă ma tŭi.

VOV1

Gương tơplôu ƀă tơbleăng