Pôa Vương Đình Huệ, kăn xiâm hnê ngăn Kuô̆k hô̆i tơnêi têa pin hiăng châ pêi pro klêi mâu tơdroăng ki kal ƀă vâ châ pêi klêi tung tâi tâng. Cheăng kâ kân pơtối rak vế tơniăn; bro mơhrê châ hbrâ mơdât, kơlo yă roê xúa plâ hơnăm tâk 3,15% tung kơlo tơdroăng ki rơhêng vâ dêi Kuô̆k hô̆i; GDP tâk châ 8,02%, kơlo hên má môi tung 10 hơnăm hdrối; mâu tơdroăng bro tơdâng kân dêi cheăng kâ châ rak tơniăn.

Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i, Hô̆i đong hnê ngăn rêm râ pơtối ai hên hơ’lêh nếo, mơdêk ki rơkê, tơƀrê tung tơdroăng cheăng.

“Tơdroăng ki Kuô̆k hô̆i séa ngăn, pơkâ 5 khu tơdroăng ki kân, ki kal ƀă ki kal pêi pro tơdrêng a Hneăng hôp ki ôh tá tối hdrối má 2 kô veăng kum tŏng kum teăm tơdrêng hên tơdroăng xơpá, tơvâ tơvân tung tơdroăng ki ai khât, tơdrêng a mê hlối pro ivá ki kal vâ pêi pro hnoăng cheăng hơnăm 2023 ƀă mâu ki pơtối”.

Pôa Vương Đình Huệ, kăn xiâm hnê ngăn Kuô̆k hô̆i pơkâ thế, hơnăm 2023, mâu khu kăn pơkuâ, mâu kơvâ cheăng, tíu pêi cheăng, khu mơdró kâ ƀă kuăn pơlê kal séa ngăn kơtăng mâu tơdroăng pơkâ, mơgêi dêi Khu pơkuâ ngăn Tíu xiâm Đảng, Tơdroăng pơkâ 68/2022 dêi Kuô̆k hô̆i ‘na túa pơkâ mơnhông mơdêk cheăng kâ rêh ối pơlê pơla hơnăm 2023; malối, kal hơ’lêh nếo hiâm mơno, ai túa ki xúa mâu tơdroăng ki nếo, troăng hơlâ ki nếo, kơhnâ, hbrâ rơnáu, rơkê tung hnê mơhno, pơkuâ.

Kăn xiâm hnê ngăn Kuô̆k hô̆i pơchân, kal mơdêk pêi klêi tơdroăng pơkâ mơnhông, tơkŭm pơkâ tơleăng xơpá, tŏng kum mơjiâng bro tê mơdró teăm tơdrêng ăm kuăn pơlê, khu mơdró kâ, mơjiâng mâu tơdroăng mơnhông ƀă ivá mơdêk nếo. Ngăn nhuô̆m mơnhông mơhno túa lĕm tro tơdâng ƀă cheăng kâ, kal kí, pơlê pơla; rĕng hriăn ngăn, mơjiâng tơdroăng pơkâ tơnêi têa ‘na mơhno túa lĕm tro vâ mơnhông mơhno túa lĕm tro môi tiah hiâm mơno hnê mơhno dêi pôa Nguyễn Phú Trọng, kăn xiâm hnê ngăn Đảng.

Pêi pro tro mâu troăng hơlâ tŏng kum rêh ối pơlê pơla, kơdroh kơtiê krá ton, rak tơniăn tơdroăng, tơdâng tơ’mô pơlê pơla, rak vế kong prâi tơnêi tíu, tŏng kum tơdroăng rêh ối hiâm mơno, liăn ngăn ăm kuăn pơlê, malối cho mâu ngế ki ai hnoăng, rơpŏng kơtiê, mâu ngế ki ai tơdroăng rêh ối malối xơpá a kơpong hngế hngo, kơpong tíu tơkăng kong, chuăn rơlố, kơpong hdroâng kuăn ngo.

Pakĭng mê, kal mơdêk ki ai hlâu, ‘mâi mơnhông, rak vế gak kring pơlê pơla cheăm bêng, gâk kring; mơdêk rơdêi ƀă mơdêk ki kal ‘na tơrŭm tơpui kâ, mơdêk tơƀrê, rơkê tung mot tơrŭm cheăng ƀă kong têa ê; rak vế tơniăn tơdroăng ki hơniâp lĕm, tơniăn, tơrŭm vâ mơnhông rĕng ƀă tơniăn ton. Mê cho tơdroăng pơkâ mơnhông.

Vâ pêi pro hơ’lêh tơdâng tơ’mô ƀă tơƀrê mâu tơdroăng pơkâ a Hneăng hôp ôh tá tối hdrối rôh má 2, Kuô̆k hô̆i hneăng 15, pôa Vương Đình Huệ, kăn xiâm hnê ngăn Kuô̆k hô̆i pơkâ thế.

“Chin phuh, Ngế pro xiâm hnê ngăn Chin phuh, Vi ƀan pơkuâ Kuô̆k hô̆i, Hô̆i đong hnê ngăn Hdroâng kuăn ngo, mâu kơ koan dêi Kuô̆k hô̆i, khu râ, kơvâ cheăng, mâu kơ koan tung kơ koan tơnêi têa, mâu Khu kăn dêi Kuô̆k hô̆i, mâu kăn Kuô̆k hô̆i tơkŭm po tơbleăng rĕng pêi pro, teăm tơdrêng mâu Luât, Tơdroăng pơkâ ki nếo châ tơbleăng, tơrŭm krá hnoăng cheăng hiâm mơno ƀă hnoăng cheăng khu tơrŭm, kăn ƀô̆ vâ rak vế tro tiô hiâm mơno “kơpêng kơdâm môi hiâm mơno” tơdrăng ki pôa Nguyễn Phú Trọng, kăn xiâm pơkuâ ngăn Đảng hiăng hên hdroh tối nhên. Malối, mâu kăn Kuô̆k hô̆i ƀă tơdroăng ki tơtro, tối tơbleăng rĕng, tŭm troh kuăn pơlê tung lâp tơnêi têa klêi kơ’nâi dêi Hneăng hôp; tơmâng, tơkŭm ƀă tơbleăng rơkong tơpui tối ƀă tơdroăng loi tơngah dêi kuăn pơlê; séa ngăn tơƀrê tơdroăng tŏng kum mâu rơkong pâ thế, pơsăm tối, pơsăm tơkêng dêi kuăn pơlê”.

Tơdrêng a mê, hlối hbrâ rơnáu kum tro mâu tơdroăng kum Kuăn pơlê hơniâp ro rơnó Hơngui, tơdah Têt Lo hơnăm nếo Quý Mão hơniâp ro, rơdêi, tơniăn, kơdĭng, bro chiâng ivá nếo sap ing pơlê cheăm ƀă rêm rơpŏng, khŏm mơeăm pêi ƀlêi chiâng Pơkâ Hneăng hôp 13 dêi Đảng; túa pơkâ mơnhông mơdêk cheăng kâ rêh ối pơlê pơla hơnăm 2023 sap ing mâu hâi ki apoăng, khế ki apoăng dêi hơnăm nếo.