VOV4.Xơ Đăng - Klêi kơ’nâi lối 3 khế pêi pro tiô tơdroăng pơkâ, a kong pơlê Kon Tum, Tơdroăng pơkâ kơxô̆ 11 dêi Chin phuh ‘na Tơdroăng ‘mâi rơnêu ƀă mơnhông pêi cheăng kâ - rêh ối pơlê pơla hiăng veăng kum pro tơƀrê khât kum ăm kuăn pơlê tơniăn tung tơdroăng rêh kâ ối, mơnhông pêi chiâk deăng, pêi cheăng kâ, tê mơdró klêi kơ’nâi tâ pơreăng COVID-19.

Lối 1 khế kố, pôa A Veo, hdroâng kuăn ngo Rơteăng, hngêi ối a pơlê Kà Bầy, cheăm Sa Bình, tơring Sa Thầy hlo dêi tơná mo tâ. Plâ hâi pêi cheăng a chiâk deăng, kơxê vêh a hngêi pôa ối poê nhâ ăm dêi 2 to ro ki nếo roê. Pôa A veo ăm ‘nâi, dế xơpá ‘na liăn, mê châ mung 100 rơtuh sap ing kơxô̆ liăn tŏng tơdroăng cheăng, tăng cheăng pêi tiô Pơkâ 11 dêi Chin phuh.  Ai liăn pôa roê 2 to ro hdrê tâi 50 rơtuh, tơdế kơxô̆ liăn ki u ối pôa roê hdrê loăng pêt, phon rơvât ăm kơdrum ki pêt loăng plâi kâ.

Pơkâ tơleăng châ tơdroăng ki xơpá ‘na liăn, ai tơdroăng vâ mơnhông mơdêk cheăng kâ rơpŏng hngêi, pôa A Veo ai tơ’nôm ivá rơtế dêi ƀă rơpŏng hngêi kơhnâ pêi chiâk deăng.

“Mơnê Đảng, Tơnêi têa hiăng tơmâng ngăn. Ƀă rơpŏng á mê hlo phiu ro khât drêng châ mung liăn dêi hngêi rak liăn vâ păn ro, pêt hdrê loăng pêt pêi cheăng kâ ăm rơpŏng hngêi mơnhông mơdêk tâ”.

Hnê chêh pro hlá mơ-éa mung liăn tiô pơkâ kơxô̆ 11 dêi Chin phuh a tíu pêi cheăng

Ƀă lối hrĭng rơpŏng kuăn pơlê a tơring Sa Thầy, kơxô̆ liăn mung ƀă liăn laih mơdrếo iâ tiô Pơkâ11 dêi Chin phuh hiăng kum pơkâ tơleăng mâu tơdroăng xơpá drêng kal dêi rơpŏng. Ing ngế ki pơkuâ thôn ƀă kăn pơkuâ Chi ƀô̆, ‘nâi ai kơxô̆ liăn mung kum vâ roê xúa kế tơmeăm tung hriâm tâp ăm hok tro, rơpŏng ngoh Lương Văn Phúc, ối tung rơpŏng kơtiê ‘na hngêi ối Thôn 1, cheăm Ya Xier chêh inâi ƀă Tôh kơdĭng liăn ƀă Mung liăn dêi thôn vâ veăng tung tơdroăng. Sap ing kơxô̆ liăn 20 rơtuh châ mung, ngoh roê kế tơmeăm xúa tung hriâm tâp ăm dêi 2 ngế kuăn:

“Rơpŏng á xơpá khât cho COVID-19. Tơnêi têa ai tơdroăng ki ăm mung liăn kố, mê á mung roê 2 toăng kơmăi tĭnh bảng vâ ăm dêi 2 ngế kuăn vâ hriâm gá tơniăn tâ. Rơhêng vâ 2 ngế kuăn kố hriâm rơkê, chiâng ngế ki ai pơxúa ăm rơpŏng hngêi vâ xo ah hmôi tŏng kum nôu pâ”.

Kơxô̆ liăn mung tiô Pơkâ 11 dêi Chin phuh hiăng tŏng kum cheăng pêi ăm lối 1.200 ngế pêi cheăng dêi kong pơlê Kon Tum

Ki khât gá a kong pơlê Kon Tum ăm ‘nâi, Tơdroăng pơkâ kơxô̆ 11, hâi lơ 30/1/2022 dêi Chin phuh ‘na Tơdroăng ‘mâi mơnhông ƀă Mơnhông cheăng kâ rêh ối pơlê pơla hiăng châ xúa tung tơdroăng rêh ối ƀă mơdêk châ tơƀrê. Vâ pêi châ tơdroăng kố, rêm râ, mâu kơvâ cheăng dêi kong pơlê hiăng tối tơbleăng pêi pro ƀă pro tơ’lêi tung mâu tơdroăng ki kal kum kuăn pơlê rĕng châ mung xo kơxô̆ liăn.

Pôa Nguyễn Minh Thuận, kăn pơkuâ ngăn Đảng cheăm Sa Bình, tơring Sa Thầy ăm ‘nâi, klêi kơ’nâi tơdroăng Pơkâ kơxô̆ châ pơkâ, Đảng ủy, khu kăn pơkuâ cheăm hiăng séa ngăn troh tâi tâng kăn ƀô̆, đảng viên ƀă troh rêm thôn, pơlê:

“Sap ing hneăng má 1, khu kăn pơkuâ cheăm hiăng tơrŭm ƀă Hngêi rak liăn tŏng kum rêh ối pơlê tơring Sa Thầy séa ngăn, tơkŭm chêh inâi mâu rơpŏng ki ai tơdroăng rêh ối xơpá xua tro tơdjâk dêi pơreăng kân COVID-19 vâ tŏng kum ăm mung.

Ƀă troh nôkố ai 30 rơpŏng châ mung ƀă xuân dế ‘no liăn ăm mung dâng 1,4 rơtal liăn. Đảng ủy xuân xing xoăng mâu kơvâ cheăng, đoân theh tŏng kum ăm kuăn pơlê xúa kơxô̆ liăn mung rak tơniăn tơƀrê má môi”.

Cho môi tung mâu tíu pêi cheăng ki tơbleăng tơdrêng kơxô̆ liăn mung kơjo tiô Pơkâ kơxô̆ 11 dêi Chin phuh, pôa Nguyễn Văn Trung, Kăn phŏ pơkuâ Hngêi rak liăn Tŏng kum rêh ối pơlê pơla kong pơlê Kon Tum ăm ‘nâi, tâi tâng tơdroăng ki rơhêng vâ mung liăn tiô Pơkâ kơxô̆ 11 a kong pơlê Kon Tum hơnăm 2022 ƀă 2023 ai lối 1.200 rơtal liăn, tung mê, ai 5 tơdroăng ăm mung.

Nôkố, tíu pêi cheăng dế mơdêk rĕng tơdroăng ki xing xoăng liăn mung rôh má 1 dêi 3 tơdroăng ăm mung ƀă tâi tâng kơxô̆ liăn ai 112 rơtal liăn troh rêm khu ki châ mung:

“Chin phuh mơ’no tơdroăng Pơkâ teăm tơdrêng vâ ăm mâu ngế ki châ mung, malối cho mâu ngế ki xua Hngêi rak liăn Tŏng kum reh ối pơlê pơla kum. Rơpŏng kơtiê ƀă mâu ngế ki ai troăng hơlâ xơpá vâi ôh tá mơhúa tung lối 2 hơnăm hdrối ai pơreăng kân, nôkố vâi ai liăn ki kố vâ vâi ‘mâi mơnhông dêi kơxô̆ liăn mơjiâng pro, tê mơdró tơniăn nếo tung tơdroăng rêh ối”.

Riân troh hâi lơ 11/5, Hngêi rak liăn tŏng kum rêh ối pơlê pơla kong pơlê Kon Tum hiăng ‘no ăm mung 75,4 rơtal liăn tơ’mô 67% kơxô̆ liăn mung rôh má 1 tiô Pơkâ kơxô̆ 11 dêi Chin phuh. Kơnôm ing kơxô̆ liăn mung kố, lối 1.200 ngế pêi cheăng tung kong pơlê ai cheăng pêi; vâ chê 400 ngế hok tro ai kơmăi tĭnh hriâm tâp; 30 rơpŏng kăn ƀô̆ kŏng nhân, viên chưk châ mung liăn pro hngêi ối tiô pơkâ kơxô̆ 100 dêi Chin phuh ƀă kơxô̆ liăn 15 rơtuh.

Xuân ing tơdroăng pêi pro Pơkâ 11 dêi Chin phuh, Hngêi rak liăn Tŏng kum rêh ối pơlê pơla kong pơlê Kon Tum hiăng ‘mâi rơnêu mơdon hơnăm liăn laih mung ăm 320 rơpŏng kuăn pơlê ƀă tâi tâng kơxô̆ 13 rơtal.

     Khoa Điềm chêh

Katarina Nga tơplôu ƀă tơbleăng