Tung inâi rak ngăn, khu pơkuâ ngăn Đoân cheăm tối tơbleăng tơring Kỳ Sơn ai lối 421 ngế đoân viên droh rơtăm, la ki khât, rêm rôh tơbleăng mâu tơdroăng cheăng ki kal djâ troăng ahdrối mê kơxô̆ ngế ki ai mâ bu châ tơdế xua mê, khu pơkuâ ngăn Đoân cheăm trâm hên xơpá vâ pêi châ tơƀrê môi tiah tơdroăng pơkâ mơ’no. Ngoh Lương Văn Trạc, ngế ki pơkuâ ngăn Đoân Droh rơtăm cheăm Phà Đánh, tơring Kỳ Sơn, Nghệ An tối:

“Pêi mâu kế tơmeăm droh rơtăm, xoăng cheăng ăm droh rơtăm rêm hơnăm mê tơkŭm xuân ôh tá châ hên xua vâi lăm pêi cheăng hơngế tâi ƀă drêng Têt vâi nếo vêh tơkŭm hên”.

Tơdroăng ki môi tiah cheăm hiăng tối tơbleăng nôkố dế hlo hên hĭn a mâu tơring peăng mâ hâi lu Nghệ An. Tơdroăng kố ôh ti pơkâ thế ai mâu tơdroăng ki ôh tá ai ngế cheăng tung tơdroăng tơ’noăng dêi Đoân Droh rơtăm, tung xut tah hrâ mơnguâ kơtiê xơpá a kơpong hngế hngo mê ối tơdjâk ôh tá kŭn troh hnoăng cheăng ‘mot đảng viên cho hdroâng kuăn ngo. Ngoh Nguyễn Đình Thuận, ngế ki pơkuâ ngăn Đoân Droh rơtăm tơring Quỳ Hợp, Nghệ An tối tiah kố:

“Kơxô̆ ngế ki ối a cheăm bu iâ tơdjâk troh tơdroăng ki tơkŭm tung khu tơrŭm xuân môi tiah tung tơdroăng pêi pro tơdroăng tơ’noăng a cheăm”

Ƀă nâ Lữ Thị Băng Châu, kăn pơkuâ ngăn Đoân tơring Con Cuông, Nghệ An tối:

“Túa tơmiât xuân môi tiah ki hlê plĕng dêi droh rơtăm ƀă mâu tơdroăng ki mơnhông mơdêk cheăng kâ mê tá hâi hlê plĕng khât, xua mê mâu túa pơkâ ăm droh rơtăm mơnhông mơdêk cheăng kâ mê ối iâ, ukố umê ƀă tá hâi tơƀrê”.

Tơmiât troh pơkâ tăng cheăng pêi ăm droh rơtăm hdroâng kuăn ngo, khu râ Đảng, khu kăn pơkuâ rêm râ ƀă khu tơrŭm Đoân a Nghệ An hiăng mơjiâng hên tơdroăng, tơdroăng tơkêa tŏng kum droh rơtăm hdroâng kuăn ngo ối a cheăm lơ droh rơtăm vêh ngi pơlê pêi cheăng, mơnhông mơdêk cheăng kâ, rế hía rế pro kro mơdrŏng a pơlê cheăm. Ngoh Vi Thái Thuận, kăn pơkuâ ngăn Đoân tơring Kỳ Sơn, Nghệ An ăm ‘nâi:

“Khu pơkuâ ngăn Đoân tơring mơdêk mâu liăn ngân vâ tŏng kum ăm droh rơtăm tung tơdroăng pơxiâm vâ pêi cheăng. Pakĭng mê khu pơkuâ ngăn Đoân tơring kô pơtối tơmâng ngăn, tơrŭm ƀă mâu kơvâ cheăng tơkŭm po mâu lâm hnê cheăng, hnê cheăng ki iâ hâi xuân môi tiah ton hâi, mê nếo po mâu lâm hnê hriâm ‘na khoa hok kih thât ăm đoân viên droh rơtăm vâ kum đoân viên droh rơtăm pơxiâm vâ pêi cheăng"

Hơnăm 2016, Mong Văn Sơn pơkâ vêh dêi ngi pơlê Phà Khảo, mung liăn sap ing hngêi rak liăn tŏng kum rêh ối pơlê pơla, hngêi rak liăn pêi chiâk deăng, ‘no liăn cheăng păn kơpôu, ro. Pơxiâm sap ing 1 pŭm kơpôu ƀă 3 pŭm ro mê châ khu pơkuâ cheăm Phà Đánh pro tơ’lêi hlâu bro môi kơpong păn kơ’nêi 3 ha, troh nôkố ngoh hiăng ai môi tíu ki păn kơpôu, ro rêm hơnăm châ xo liăn lối 100 rơtuh. Ƀă tơdroăng ki kơhnâ, chiu pá, Mong Văn Sơn hiăng chiâng túa pơkâ droh rơtăm pêi cheăng kâ rơkê dêi pơlê Phà Đánh xuân môi tiah dêi hdroâng kuăn ngo Khơ Mú tơring Kỳ Sơn. Ngoh Mong Văn Sơn phiu ro tối:

“ Á ‘no liăn roê kơpôu, ro,  peăng ‘na Đoân mê vâi xuân tŏng kum ‘na liăn mung ƀă peăng droh rơtăm pơxiâm vâ pêi cheăng ai tơkŭm po lâm hnê kih thuât păn ƀă rak ngăn. Á xuân hriâm ƀối ‘na kih thuât păn kơpôu, ro mê á hiăng xúa tung tơdroăng cheăng dêi á”.

Vâ tơbleăng mâu tơdroăng tơkêa tŏng kum droh rơtăm hdroâng kuăn ngo, tơdjêp tăng cheăng pêi ăm droh rơtăm mơnhông mơdêk cheăng kâ xuân môi tiah veăng kum pêi pro hnoăng cheăng xut tah hrâ mơnguâ kơtiê xơpá a cheăm xuân môi tiah pơxiâm ăm tơdroăng mơdêk hiâm mơno djâ troăng ahdrối khên tơmiât, khên pêi, khên tơnôu pơxiâm vâ pêi cheăng dêi khu droh rơtăm ai pơxúa khât. Ƀă khu pơkuâ ngăn Đoân Droh rơtăm cheăm Minh Hợp, tơring Quỳ Hợp, tŏng kum tơdjêp, tăng cheăng pêi ăm droh rơtăm hdroâng kuăn ngo châ mơnhên cho môi tung mâu hnoăng cheăng ki kal tung tơdroăng tơ’noăng droh rơtăm pơxiâm vâ pei cheăng dêi khu tơrŭm Đoân.

Pakĭng mơjiâng mâu túa pơkâ Đoân cheăm Minh Hợp tơkŭm tơbleăng tơdroăng hnê mơjiâng bro kế tơmeăm tung đoân viên, droh rơtăm, ing mê veăng kum tung pêi pro tơdroăng pơkâ hneăng hôp Đảng ƀô̆ cheăm hơnăm 2020 – 2025.

Drêng ai troăng hơlâ tŏng kum teăm tơdrêng, châ pro tơ’lêi hlâu ‘na hlá mơ-éa ki hlê plĕng mê droh rơtăm hdroâng kuăn ngo kô mơ-eăm ôh ti xê hluăn ing kơtiê mơnhông kro mơdrŏng ăm rơpŏng hngêi mê ối chiâng môi khu ki xiâm veăng kum tung pêi pro mâu tơdroăng mơnhông mơdêk cheăng kâ rêh ối dêi cheăm, tơring.