Tơdrăng ƀă pôu râng dêi tơdroăng, mê cho tơdroăng ki hlo tơdjuôm dêi mâu kăn ƀă kuăn pơlê tung 2 hâi tơdế êng. Mâu kăn Kuô̆k hô̆i hiăng êng mâu rơkong kơ-êng ki ‘nâng ‘nâi, nhên, tro ƀă khu tơdroăng ki châ kơ-êng, tơbleăng tro tơdroăng ki ai khât tung rêh ối; malối; tối troh mâu tơdroăng ki trâm tung pơlê pơla. Tơdrăng mơhno mâu tơdroăng ki tá hâi pêi pro klêi, mâu tơdroăng ki ôh tá ai ivá, mâu kăn rơhêng vâ Chin phuh, mâu khu xiâm kơvâ cheăng pơtối ai mâu troăng hơlâ pêi pro kơtăng, tơƀrê, xua tơdroăng ki mơnhông rĕng, krá tơniăn dêi tơnêi têa:

“Kơ-êng ƀă môi tơdroăng ki kơhnâ, tơdrăng, tơkŭm ing mâu tơdroăng ki hnê mơhno dêi Kăn xiâm hnê ngăn Khu kăn xuân môi tiah mâu rơkong tơpui tối dêi ngế ki kơ-êng ƀă tiâ mơnhên dêi mâu ngế xiâm pơkuâ kơvâ cheăng, dêi Ngế pro xiâm phŏ hnê ngăn Chin phuh ƀă tơdroăng tơpui tơdrăng ƀă veăng tơbêng”.

“Mâu rơkong kơ-êng drêng kăn pơtroh troh ăm khu pơkuâ ngăn kơvâ cheăng hiăng tiâ mơnhên tro khât ƀă xuân ƀă tơdroăng ki ai rêm hâi. Á hâk vâ khât xua mâu troăng hơlâ ki ngế xiâm pơkuâ mơ’no tối.”

Pŭn ngế kăn pơkuâ kơvâ cheăng tơbleăng tơdroăng ki tiâ mơnhên kơ-êng a Kuô̆k hô̆i hneăng 15. Ƀă hiâm mơno pôu râng, nhên troăng hơlâ ƀă tơhrâ tung hnê mơhno, pơkuâ ngăn, kăn pơkuâ Khu xiâm, kăn pơkuâ cheăng kơvâ cheăng ôh tá ví mâu rơkong kơ-êng ƀă tơpui tơno dêi mâu kăn, ai troăng hơlâ pêi pro nhên ƀă hên tơdroăng ki mâu kăn tối. Ai mâu kăn Kuô̆k hô̆i tối:

“Á hlo Ngế xiâm ngăn kế tơmeăm khoăng tung têa a tơnêi ƀă hyôh kong prâi tơngah, tơdrăng tiâ mâu rơkong kơ-êng dêi Kăn Kuô̆k hô̆i. Peăng rơkong tiâ dêi ngế xiâm pơkuâ 1 kơpêng 5 á hlo tro khât. Á hiăng tok kơƀeăng tơtŭng tơpui vâ pêi pro nhên tơ’nôm mâu tơdroăng ki hdi têa kơxĭ tung tơdroăng ki hrik xo prêi vâ tơdjâk troh têa kơxĭ”.

“Kơvâ cheăng ƀă kơmăi kơmok ƀă tê mơdró, kơ koan pơkuâ ngăn tơnêi têa athế ai môi rôh ki séa ngăn, mơnhên tối mâu xiâm kối ki lâi kii tơdjâk troh khu mơdró kâ lo ing kơchơ mơdró. Mâu khu mơdró kâ mê tê mơdró kơvâ cheăng klâi? Vâi hiăng pêi cheăng châ to lâi hơnăm vâ ai troăng tŏng kum ki hiăng vâ mê. Ai tiah mê ‘nôi pin nếo ai troăng hơlâ tŏng kum khu mơdró kâ.

Tiâ rơkong kơ-êng a ngiâ Kuô̆k hô̆i, pôa Đặng Quốc Khánh, ngế xiâm ngăn tơmeăm khoăng tung têa a tơnêi ƀă hyôh kong prâi mơhno nhên ki xơpá ‘na mâu hmốu prêi mơjiâng bro mâu tơdroăng tơkêa ki kal dêi tơnêi têa, malối cho tơdroăng tơkêa bro prôk tơdrăng; tối mâu troăng hơlâ vâ ‘mâi mơnhông mâu têa kroăng ki hiăng tro ‘mêi ó khât.

Tối nhên tơkŭm rak ngăn mơnhông túa lĕm tro kơpong hdroâng kuăn ngo iâ mơngế, pôa Nguyễn Văn Hùng, ngế xiâm ngăn túa lĕm tro, tơ’noăng ivá ƀă ôm hyô tối tiah kố: mơjiâng pơkâ túa lĕm tro cho tơdroăng ki kal ƀă tŭm vâ mơjiâng môi tơdroăng túa lĕm tro. Tơdrêng amê hlối ăm ‘nâi, kô ai troăng hơlâ pơkâ nếo pro tơ’lêi hlâu má môi ăm ngế ki tơ’noăng, ngê̆ sih klêi kơ’nâi tơ’noăng, mơđah tơbleăng ƀă hên ki ê.

Tiâ rơkong kơ-êng a ngiâ Kuô̆k hô̆i, pôa Trần Hồng Hà, Ngế pro xiâm phŏ hnê ngăn Chin phuh tối nhên mâu troăng pơkuâ vâ rak tơniăn tơdroăng ki pơkâ pêi mơdât pro mơhrê drêng pêi pro hơ’lêh liăn khế ing lơ 1/7 la ngiâ. Jâ Phạm Thị Thanh Mai, ngế ki lo ing Hà Nội tối tiah kố:

“Ngế pro xiâm phŏ hnê ngăn tơnêi têa cho ngế ki hiăng hmâ tiâ mơnhên tung mâu rôh hôp dêi Kuô̆k hô̆i. Ngin hlo mâu tơdroăng ki ối tung kơvâ kơ-êng Ngế pro xiâm phŏ hnê ngăn tơnêi têa xuân ‘nâi nhên khât, prôk tơdrăng tung mâu tơdroăng. Ai mâu tơdroăng kal nhên ƀă tá mâu tơdroăng tung la ngiâ mê ngin rơhêng vâ kal athế ai hâi khế vâ tơhrâ pêi pro ƀă athế ai troăng prôk. Tơdroăng mê gá kal khât vâ kuăn pơlê, xuân môi tiah Kuô̆k hô̆i séa ngăn”.

Rơtế ƀă mâu troăng hơlâ ƀă rơkong tơhrâ châ mâu khu xiâm xiâm, kơvâ cheăng mơ’no tối a hneăng hôp tôh kố, mâu kăn ƀă kuăn pơlê rơhêng vâ tiah kố troăng hơlâ séa ngăn kô châ pêi pro kơtăng vâ rak tơniăn mâu troăng hơlâ châ pêi pro, mơdêk tơƀrê klêi kơ’nâi rôh kơ-êng tung tơdroăng ki ai khât.