Tung tơdroăng hnê tối apoăng hơnăm 2022, pôa Vương Đình Huệ, Kăn xiâm hnê ngăn Kuô̆k hô̆i tối: Kuô̆k hô̆i, Vi ƀan pơkuâ Kuô̆k hô̆i kô hbrâ rơnáu tâ nếo, rơtế tơmâng pêi pro khât tâ nếo ƀă Chin phuh, mâu kơ koan  tơnêi têa vâ teăm séa ngăn, pơkâ mâu tơdroăng dêi râ tơná pơkuâ.

Tơpui hlối pêi, kơ’nâi 1 hơnăm tơbleăng tơdroăng mơjiâng luât dêi hneăng pêi cheăng Kuô̆k hô̆i 15, mâu kơ koan Kuô̆k hô̆i, Chin phuh ƀă mâu kơ koan tơdjâk troh hiăng pê klêi 81/137 tơdroăng cheăng mơjiâng luât, pêi klêi tơdroăng tí tăng ngăn, séa ngăn lơ tăng ngăn, mơjiâng nếo (châ lối 59% tơdroăng cheăng pêi dêi tâi tâng hneăng), pro xiâm ki tro luât vâ Chin phuh, mâu kăn kong pơlê xúa pêi tơtro, mâu tơdroăng, pêi tro, tơƀrê tung hbrâ, mơdât pơreăng, kring vế  tơniăn ivá dêi kuăn pơlê, tŏng kum khu mơdró, mơngế pêi cheăng tơkâ luâ xơpá ƀă kring vế tơniăn rêh ối pơlê pơla; mơdêk tung pơla ‘mâi mơnhông ƀă mơdêk cheăng kâ -rêh ối krá tơniăn klêi kơ’nâi pơreăng kân COVID-19.

Malối, pakĭng péa rôh hôp, hâi apoăng hơnăm, Kuô̆k hô̆i po Hôp ôh tá xê tiah hmâ rôh má môi vâ ngăn, pơkâ hên tơdroăng ki kân, pêi pro tơdrêng, tơdjâk troh tơdroăng ‘mâi mơnhông, mơdêk tơnêi têa tung tơdroăng “rêh ối tiah hmâ nếo nôkố‘’. Tơdroăng tơkŭm po rôh hôp ôh tá xê tiah hmâ rôh má môi châ ngăn cho pơkâ tơdroăng ton nah dêi Kuô̆k hô̆i Việt Nam tung 76 hơnăm hdrối, tối troăng rơhlâ, ki mơ-eăm tơdroăng kal kí dêi kơ koan xiâm Tơnêi têa malối môi tiah mơ-eăm hơ’lêh nếo, pêi pro xua tơdroăng ki pơxúa dêi kuăn pơlê.

Hôp ‘’rôh ôh tá xê tiah hmâ’’ vâ tơleăng mơnhên tơdroăng kal pêi tơdrêng. Ki khât mơhno tâng Kuô̆k hô̆i ôh tá rơtế ƀă Chin phuh ai pơkâ tiâ rĕng kô pro ôh tá châ  ki vâ mơnhông tơnêi têa. Mâu tơdroăng kal tơpui tơno a rôh hôp ôh tá xê tiah hmâ, ôh tá xê to bú ai tiô púi vâ a ngiâ ăm hơnăm 2022, hơnăm 2023, mê ối ai pơxúa kal ăm tâi tâng hneăng ƀă mâu hơnăm pơtối.

Tâi tâng mâu tơdroăng ki hbrâ ƀă tơkŭm po rôh hôp xuân mơhno nhên tơdroăng hvái ngăn hơngế, hriăn tơmiât hên tâ ƀă tơdroăng veăng hbrâ sap  apoăng, ing hơngế.

Tơdroăng vâ tối cho tơdroăng Kuô̆k hô̆i tơbleăng Pơkâ kơxô̆ 43/2022 hâi lơ 11/01/2022 ‘na luât pơkâ a hơnăm liăn, liăn ngân ƀă kơxô̆ liăn ‘no mê dâng 350 rơpâu rơtal liăn, tơ’mô ƀă lối 8% GDP vâ tŏng kum tơbleăng tơdroăng ‘mâi mơnhông ƀă mơdêk cheăng kâ - rêh ối, veăng mơnhông GDP hơnăm 2022 tâk 8,02%. Châ tối hên ó tung lối 10 hơnăm hdrối, dêi khu mâu kong têa ki mơnhông mơdêk má môi  tung lâp plâi tơnêi.

Môi tiah rơkong ki Ngế xiâm chêh tôm xo rơkong, Ngế pơkuâ Ƀơrô Kuô̆k hô̆i, cho pôa  Bùi Văn Cường tối: Tơdroăng pơkâ châ pơkâ tung môi roh hôp ki kal khât, hâi ai tơdroăng po hôp ƀă tơpui hên tơdroăng, hnoăng cheăng pêi, hnoăng dêi mâu kăn Đảng, Kuô̆k hô̆i, Chin phuh, mâu Khu xiâm, kơvâ cheăng ƀă mâu kăn Kuô̆k hô̆i. Luât pơkâ mê po troăng ki kal khât, tung mê mâu pơkâ, pro hlá mơ-éa tơ ‘lêi hlâu hên tâ, xoăng râ pêi cheăng rơdêi troh tơrêm khu xiâm, kơvâ cheăng, kong pơlê ki sap nah hâi xúa pêi.

Kuô̆k hô̆i pơcháu ăm Vi ƀan pơkuâ cheăng Kuô̆k hô̆i pơkâ mâu tơdroăng, ki xiâm, ki kal ê ƀă luât tung pơla Kuô̆k hô̆i ôh tá hôp vâ teăm. Pakĭng mê, rơtế ƀă Chin phuh. Tơdroăng mơ-eăm ƀă tơdroăng ăm hlo  dêi rôh hôp ôh tá xê tiah hmâ rôh má môi, Kuô̆k hô̆i hneăng 15 hiăng pro tiô túa nếo, cho rôh ki nếo pêi cheăng vâ châ tơƀrê.  Xo liăn ngân châ hên, luâ tâ tơdroăng tâng vâ pơchông ƀă tơdroăng tối hdrối; kơxô̆ ki hrê, chĕn hnoăng tung tơdroăng séa ngăn; GDP hơnăm 2022 plâ hơnăm tâk 8,02%, hên má môi tung pơla hơnăm 2011-2022; mâu tơdroăng pro tơdâng tơ’mô ki kân châ pro tơniăn.

Mâu tơdroăng ki kal châ tối tơbleăng a mơ’nui hơnăm ai hên tơdroăng tro, cho xiâm vâ mơhnhôk pêi ăm tơdroăng pơkâ 5 hơnăm, thăm rế kal tâ drêng tơnêi têa pơxiâm mot tung hơnăm apoăng dêi hneăng ki kal tung pêi pro mâu pơkâ hneăng Hôp kân rôh má 13 dêi Đảng.

Nhoăm tâ drêng hlo tơbrê tung tâi tâng mâu tơdroăng cheăng ƀă hên tíu ki tơƀrê mê drêng pin vêh ngăn nếo tơdroăng pêi pro dêi hơnăm 2022 tơdroăng tung lâp plâi tơnê nôkố dêi hơ’lêh phá tơ ê, sap nah hâi ai tiah hmâ, ki xơpá thăm xơpá tâ tâng vâ pơchông ƀă drêng mơjiâng pơkâ mơnhông cheăng - rêh ối hơnăm 2022.

Ƀă tơdroăng ôh tá tơniăn tung lâp plâi tơnêi, pro pá xua liăn ôh tá kơnâ; yă têa kơxăng to kơnâ, tơmeăm mơjiâng hngêi trăng drêng tâk drêng chu, tơdjâk kân troh hên kơvâ cheăng; hên tơdroăng ối tơvâ tơvân kal tơleăng mơnhên; tung mê, pơreăng tâ tú, kong prâi pro ôh tá tơniăn, khía mơhot têa kân lân lu rơ-iô, pro hên tơmeăm tro tơ’nhiê lŭp ‘na tơdroăng pêi cheăng tê mơdró ƀă tơdroăng rêh ối dêi kuăn pơlê.

Tối mâu tơdroăng tơdjâk ‘mêi kơpêng mê ăm hlo mâu tơdroăng ki pin hiăng châ pêi pro cho nhoăm kơnía khât. Tơdroăng ‘mâi mơnhông rơdêi ‘na cheăng kâ  mơhno ăm hlo cho hnoăng pơkuâ rơkê dêi Chin phuh xuân môi tiah mâu khu xiâm, kơvâ cheăng; ki mơ-eăm khât dêi tâi tâng khu cheăng kal kí, dêi kuăn pơlê, khu mơdró kâ. Ƀă malối cho rơtế ƀă dêi rơpó, veăng tŏng kum teăm tơdrêng, tơƀrê dêi Kuô̆k hô̆i ing luât pơkâ “ki tơviah, pro pơxúa ăm môi tơdroăng ôh tá tiô pơkâ,  phá tơ ê xêh”.

Pơloăng mơnúa, xơpá xuân ối hên, la tơdroăng tuăn loi a tơdroăng ki vâ pêi pro ăm hlo nhên, drêng ai mâu kăn Kuô̆k hô̆i tối:  Lâp plâi tơnêi dế tối Việt Nam môi tiah tơmeăm ki vâ pơtih mơhno a ngâ dêi mâu hơnăm kơ’nâi ai pơreăng COVID-19 ƀă ki rơdêi klêi kơ’nâi hiăng kâi mơdât pơreăng. Loi khât tiah kố, ƀă tơdroăng tơrŭm, môi tuăn dêi rơpó tung khu cheăng kal kí, ai veăng kum, vâ pêi pro dêi tâi tâng kuăn pơlê ƀă mâu khu mơdró, ƀă tơdroăng pơkuâ rơkê dêi Đảng, tơdroăng ‘nâi hbrâ rơnáu pêi pro, rơtế dêi Kuô̆k hô̆i ƀă tơdroăng pơkuâ pêi kơtăng, veăng hnê djâ dêi Chin phuh, mê pin pêi kô klêi tơniăn mâu tơdroăng pơkâ pêi iâ khế tung hơnăm 2023, xuân môi tiah mâu pơkâ pêi ton hơnăm tung la ngiâ.