VOV4.Xơ Đăng - Măng tĭng hdrối, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng pơkuâ po Rôh hôp tơpui tơno pơla kăn pơkuâ Kuô̆k hô̆i ƀă mâu kơ koan, tíu pêi cheăng dêi Kuô̆k hô̆i, Vi ƀan pơkuâ Kuô̆k hô̆i, tơbleăng hnoăng cheăng ki kal 6 khế mơ’nui hơnăm. A rôh hôp, pôa Vương Đình Huệ, kăn xiâm hnê ngăn Kuô̆k hô̆i pơkâ thế mâu kơ koan, tíu pêi cheăng pêi pro kơtăng mâu tơdroăng pơkâ pêi cheăng, mơdêk ki tơƀrê tâ nếo tung hnoăng cheăng, rak vế tro tơdroăng, túa pơkâ, rế tơkŭm tâi tâng rế pêi pro tơdroăng ki kal, tơdroăng pơkâ ki xiâm.

Tối tơbleăng xua Kăn xiâm chêh tôm xơ rơkong Kuô̆k hô̆i, Ngế pơkuâ Ƀơrô Kuô̆k hô̆i Bùi Văn Cường ăm ‘nâi, 6 khế apoăng hơnăm mâu kơ koan hiăng tí tăng ‘nâi plĕng ƀă tơkŭm klêi 2 rôh hôp Kuô̆k hô̆i , 6 rôh hôp Vi ƀan pơkuâ Kuô̆k hô̆i, 4 rôh khu kăn séa ngăn mâu tơdroăng kal dêi Kuô̆k hô̆i, Vi ƀan pơkuâ cheăng Kuô̆k hô̆i, 1 rôh hôp to mâu Kăn Kuô̆k hô̆i pêi môi hnoăng cheăng ƀă mâu rôh pêi cheăng dêi Đảng, khu kăn hnê ngăn Kuô̆k hô̆i, Vi ƀan pơkuâ Kuô̆k hô̆i, Kăn hnê ngăn Kuô̆k hô̆i ƀă mâu kơ koan, khu tơrŭm cheăng, tíu pêi cheăng, kong pơlê.

Tí tăng ‘nâi plĕng pê klêi 50/137 tơdroăng cheăng ‘na luât dêi troăng cheăng pêi Tơdroăng mơjiâng luât hneăng Kuô̆k hô̆i má 15 tiô tối mơgêi  kơxô̆ 19 dêi Khu xiâm kal kí. Tí tăng ‘nâi plĕng pêi 2 tơdroăng kal dêi tơdroăng tơkêa bro “ troăng hlâ vâ mơjiâng ƀă pê klêi Tơnêi têa tro tiô luât xah hô̆i chuh nghiah Việt Nam troh hơnăm 2030, troăng hơlâ troh hơnăm 2045”. Tơdroăng tí tăng ‘nâi plĕng, tơdroăng tơpui kâ châ pêi pro tro tơxâng ƀă rơkê.

Tâ tá hneăng hôp

Klêi tơmâng mâu tơdroăng veăng hnê tối, Kăn xiâm hnê ngăn Kuô̆k hô̆i pôa Vương Đình Huệ khê̆n kơdeăn, tối mâu tơdroăng pêi pro tung 6 khế apoăng hơnăm, mâu kơ koan, tíu pêi cheăng dêi Kuô̆k hô̆i hiăng kơdo mơ-eăm khât, pơtối  rak vế  mâu tơdroăng pêi tơƀrê dêi hneăng hdrối, Kuô̆k hô̆i hneăng 15 pơtối pơ’lêh nếo, mơ-eăm mơdêk ki tơ-brê tung hnoăng cheăng, mơhno ing mâu rôh hôp dêi Kuô̆k hô̆i, mâu rôh hôp dêi Vi ƀan pơkuâ cheăng Kuô̆k hô̆i, mâu hneăng hôp Hô̆i đŏng Kuăn ngo, mâu Vi ƀan, mâu khu kăn Kuô̆k hô̆i, ki hdrối nah cho kăn Kuô̆k hô̆i; tơdroăng cheăng tơrŭm pêi pơla Kuô̆k hô̆i, Kăn xiâm hnê ngăn tơnêi têa, Chin phuh, Măt trâ̆n Tơnêi têa Việt Nam, Hngêi tơleăng xiâm, Tíu xiâm séa ngăn arak luât, Tíu xiâm séa ngăn mơnhên ‘na liăn ngân Tơnêi têa, mâu kơ koan, mâu khu tơrŭm cheăng tung khu xiâm kal kí.

Ki tơxâng vâ tối, pakĭng pê klêi mâu tơdroăng cheăng tiô pơkâ, Kuô̆k hô̆i ai tiô tơdroăng púi vâ pêi tro mâu tơdroăng cheăng nếo, ai hên tơdroăng ki lê̆m tơ-brê, hên tơdroăng cheăng, pêi tơbrê, rơkê, pêi ai pơxúa châ mơdêk tung tâi tâng tơdroăng mơjiâng luât, séa ngăn, pơkâ mâu tơdroăng ‘na tơnêi têa, tơdroăng tơpui kâ, pro pơlĕm tơdâng tơ’mô tá tung tá ƀă pá kong. Tơdroăng pơkuâ hnê mơhno dêi hô̆i đŏng hnê ngăn kuăn pơlê pêi châ tơ-brê. Tơdroăng cheăng hnê ngăn mâu tơdroăng kuăn pơlê púi vâ xuân hlo pêi tơ-brê, mơdêk hnoăng cheăng pêi dêi mâu kơ koan tíu pêi cheăng ki tơdjâk troh.

“Đảng khu kăn Kuô̆k hô̆i, Vi ƀan pơkuâ cheăng, mâu kơ koan hiăng hnê pêi pro kơtăng tơdroăng hnê mơhno dêi khu xiâm kal kí, khu kăn hnê ngăn, teăm tơdrêng pơ’lêh nếo, pơtối pêi pro mâu pơkâ ton nah dêi Tíu xiâm, mâu hlá mơ-éa hnê mơhno dêi mâu kơ koan xiâm , ai tiô púi vâ mơjiâng ƀă mơnhông mơdêk tơnêi têa , ‘na cheăng kâ - rêh ối, cheăng lêng, kring tơniăn, tơpui kâ, malối ‘na pêi péa tơdroăng cheăng ki pin tối cho pơtối sé ngăn hbrâ mơdât tơiăn rơkê tơ-brê pơreăng COVID-19 ƀă ‘mâi mơnhông cheăng kâ rêh ối. Ki kố ai hoăng veăng ‘no veăng pêi dêi Kuô̆k hô̆i pin’’.

Kăn xiâm hnê ngăn Kuô̆k hô̆i  ăm ‘nâi, tơdroăng tơbleăng pêi mâu pơkâ dêi tíu xiâm, Khu xiâm kal kí kăn hnê ngăn Đảng ƀă hbrâ, mơjiâng mâu tơdroăng tối tơbleăng dêi Đảng Kuô̆k hô̆i  ƀă mâu tơdroăng chêh, tơdroăng tơkêa bro dêi tíu xiâm châ mâu Tíu xiâm, khu xiâm kal kí, Kăn hnê ngăn Đảng khĕn kơdeăn khât ki tơ-brê ƀă ki rơkê, pêi tơ-brê.

‘Na tơdroăng pêi hnoăng cheăng tung la ngiâ, pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu kơ koan, tíu pêi cheăng pơtối rak vế pêi pro tơ-brê tâ nếo tung tơdroăng cheăng, tơniăn tro tiô pơkâ, hlối tâi tâng tŭm tơdroăng hlối cho ki xiâm, khât vâ ví lơ pro ton mâu tơdroăng cheăng.

Malối, thế mơdêk tơrŭm cheăng tung tá, mâu tơdroăng cheăng pêi, tiêuh ƀan tiô troăng ki rơkê, tơ-brê; pêi tro tơdroăng cheăng dêi khu kăn Kuô̆k hô̆i, dêi Vi ƀan Pơkuâ cheăng Kuô̆k hô̆i.

Tối vâ môi tuăn pơkâ rĕng tơkŭm po hneăng hôp mơgêi, Kăn xiâm hnê ngăn Kuô̆k hô̆i pơkâ thế mâu kơ koan thâ tơbleăng mâu tơdroăng tiô tơdroăng mơjiâng luât hơnăm 2022, pêi pro tro tiô troăng hơlâ tâi tâng hneăng tiô tối mơgêi kơxô̆ 19-KL/TW dêi khu xiâm kal kí; tơbleăng mâu tơdroăng pêi pro séa ngăn dêi Kuô̆k hô̆i ƀă Vi ƀan pơkuâ cheăng Kuô̆k hô̆i hơnăm 2022 ƀă rôh apoăng ăm hơnăm 2023; tí tăng ngăn vâ ‘nâi nhên tơdroăng tơbleăng pêi  mâu pơkâ dêi Kuô̆k hô̆i, Vi ƀan pơkuâ cheăng Kuô̆k hô̆i ƀă hía hé.

Pakĭng mê, tơkŭm po klêi tơniăn mâu tơdroăng kal ăm rôh kơ êng, tiâ apoăng khế 8; tơkŭm po hôp ƀă khu ngế rơkê vâ veăng kơ êng tơdroăng tơkŭm po Hneăng hôp tơpui ‘na cheăng kâ hơnăm 2022.

VOV1

Gương tơplôu ƀă tơbleăng