Vâ ngăn bài má 2 po ngăn drăng kô: https://vov4.vov.gov.vn/Xodang/chuyen-muc/tolo-lian-cheang-tram-hen-pa-puat-oh-ta-kai-cha-chiang-cheang-va-pote-xuan-ta-t-c178-410040.aspx

Ƀai má pái : Tơdroăng pói tơngah, pói vâ dêi kong pơlê, khu tê mơdró

VOV4.Xơ Đăng- Khế 6/2021, Ngế pro xiâm hnê ngăn Chin phuh hiăng ai pơkâ kơxô̆ 984 mơ’no ‘na tơdroăng Mơgêi 82 hơnăm 2020 dêi Khu xiâm ngăn cheăng kal kí hneăng XII. Chin phuh hiăng pơkâ thế mâu khu râ, kơvâ cheăng, kong pơlê athế rak vế, pêi pro i tŭm, nhên rơdâ khât ‘na tơdroăng pơkuâ ngăn, hnê tơdjâ dêi Khu xiâm ngăn cheăng kal kí. Ing mê, vêh ‘mâi mơnhông mâu tơdroăng ki ối ‘ro, tá hâi kâi chiâng pêi pro, ối lot tung rak vế pêi pro tiô troăng pơkâ, hnoăng cheăng xiâm vâ kơdroh tah, lêi tah lôi mâu tơdroăng ‘mâi rơnêu, hơ’lêh nếo Kŏng ti ngăn ‘na chiâk deăng, pêt kong ki dế ai păng ‘nâng dế nôkố. Mơgêi tơdroăng khu ƀai: “Tơdroăng pơkâ 30: Kal ai tơdroăng ing hnoăng cheăng păng ‘nâng ing Kŏng ti ngăn ‘na chiâk deăng - pêt kong a Tây Nguyên” hâi kố, ngin ai tơpui ƀai má mơ’nui, dó inâi “Hiâm tuăn pói tơngah, rơhêng vâ dêi kong pơlê, khu mơdró”.

Tung kơxô̆ 16 kŏng ti pêi chiâk deăng ƀă pêt mơjiâng, mơnhông cheăng kâ ing kong a kong pơlê Dak Nông, ai 3 tíu pêi pro tơlo liăn, 6 tíu hiăng pơtê cheăng. Pôa Nguyễn Xuân Tuấn, Kăn pơkuâ ƀơrô Kĭ tê mơdró, Khu pơkuâ pơkâ tơdroăng cheăng ƀă mơ’no liăn cheăng kong pơlê Dak Nông tối ăm ‘nâi, mâu kŏng ti pơrá ai ƀăng lối 500 hectar, tiô hnê mơhno Mơgêi 82 dêi Khu xiâm kal kí mê thế tơniăn hnoăng pơkuâ dêi Tơnêi têa ƀă mâu kŏng ti kố.

Tơdrêng amê, tơdroăng rah ăm tơtro, tơlo liăn cheăng nôkố a kong pơlê dế trâm hên tơdroăng, kal rĕng pêi pro nhên mâu troăng prôk la ngiâ, hnê mơhno a Mơgêi 82 vâ pơtối pêi pro ƀă tah lôi tơdroăng pá puât:

‘’Pêi pro Mơgêi 82 dêi Khu xiâm kal kí mê ƀă mâu kŏng ti ai ƀăng kân, lối 500 hectar tơngi klêng mê Tơnêi têa kô rak tơlo liăn vâ pêi cheăng. Tâng chiâng vâ tơniăn rế cho tơdroăng vâ pro ăm tơtro, tơdroăng pơkâ troăng pêi la ngiâ mê kô rak troăng pêi kŏng ti môi khu. Kơxô̆ liăn chĕn pơtân ƀă kố ai troăng tơleăng’’.

Mơgêi 82 dêi Khu xiâm kal kí pói tơngah tah lôi mâu tơdroăng tơvâ tơvân tung troăng pơkâ pêi, troăng hơlâ ƀă luât nôkố

Pôa Lê Danh Thắng, Kăn phŏ rak liăn ngân kong pơlê Dak Lak, tối ăm ‘nâi, klêi kơ’nâi ai Mơgêi 82 dêi Khu xiâm kal kí, kong pơlê hiăng ăm pơtê tơdroăng rah pro ăm tơtro, tơlo liăn ƀă pơ’lêh chiâng troăng péa péa khu tơrŭm). Tiô pôa Thắng, tơdroăng séa ngăn, pơ’lêh troăng pơkâ pêi, troăng hơlâ kô chiâng kum kong pơlê tah lôi mâu tơdroăng pá puât, tơvâ tơvân, ki má lối cho pá ‘na liăn ngân ƀă mâu khu tê mơdró pơtê lôi:

“Dak Lak ai 3 khu tê mơdró dế pơtê, drêng mơjiâng troăng pêi cho hía ki tơdâng, mê cho ôh tá ai ki klâi, kơxô̆ liăn pêi lo ôh tá tŭm vâ mơdrếo. Xua ki kố tung Mơgêi 82 dêi Khu xiâm kal kí ai môi tơdroăng cho liăn ngân kô tŏng kum ki ôh tá tơdâng tơ’mô vâ tơniăn kơxô̆ liăn mơhá, chiâng vâ pơtê khu tê mơdró’’.

Pôa Trịnh Đình Trường, Kăn hnê ngăn Hô̆i đong pơkuâ, Kăn xiâm pơkuâ Kŏng ti tơlo liăn pêi cheăng kơphế Gia Lai ƀă Kŏng ti tơlo liăn Chế Biển Hồ, tối, Mơgêi 82 dêi Khu xiâm kal kí hiăng ăm khu tê mơdró ăm hlo pói tơngah tah lôi mâu tơdroăng tơvâ tơvân tung troăng pơkâ pêi, troăng hơlâ ƀă luât nôkố. Tung mê, tối nhên tơdroăng ‘mâi rơnêu, tơ’nôm mâu pơkâ ki phá tơ-ê ‘na luât ngân, hnoăng mơhá ƀă troăng pơkâ mung liăn ki kơjo:

‘’Tơdroăng kố cho tơdroăng ki pro xôi ki ê ‘na luât, mâu pơkâ pêi tiô, Pơkâ hdrối nah tá hâi pơ’lêh troh pin, xua pin cho ngế ki nếo. Pơkâ dêi Khu xiâm kal kí xúa tung tơdroăng nôkố, chiâng troh tung tơdroăng rêh ối, troh mâu khu tê mơdró, gá cho môi troăng prôk xŏn’’.

Tơdroăng ki u ối ‘na tơnêi tơníu cho tơdroăng ki pá má môi dêi tơdroăng rah ăm tơtro, pơ’lêh nếo, tơlo liăn pêi cheăng

Séa ngăn tơdroăng rah pêi pro ăm tơtro, pơ’lêh nếo, tơlo liăn pêi chiâk deăng, mơnhông cheăng kâ ing kong a mâu kong pơlê Tây Nguyên, pôa Nguyễn Lâm Thành, Kăn phŏ hnê ngăn Hô̆i đong hdroâng mơngế dêi Kuô̆k hô̆i, mơnhên, pơkuâ, xúa tơnêi tơníu nôkố ối hên tơdroăng ki tá hâi tơtro. Tiô pôa Thành, pơtối pêi pro Pơkâ 30 dêi Khu xiâm kal kí mê rơtế ƀă ‘mâi rơnêu, tơ’nôm mâu troăng pơkâ pêi, troăng hơlâtiô troăng kơjo ăm khu tê mơdró mơnhông mơdêk, xuân kal tah lôi mâu troăng pơkâ pêi, troăng hơlâ kơjo lối hên, tá hâi tơtro.

“Ƀă pơkâ tiô luât nôkố, pin pơcháu tơnêi hên, ăm kuăn pơlê tơdah pêi hên klêi mê ăm mung ƀă yă iâ. Xua pơhôi tung troăng pơkuâ tơnêi tơníu troh tơdroăng pơkuâ ôh tá châ tơƀrê. Ƀă ki rơhêng vâ tối, gá chiâng tơdroăng ki hdi xo xêh, tơbriât hdi tơnêi.‘Na tơdroăng thăm pơkuâ châ tơƀrê xúa tơnêi pêi chiâk deăng, pêt mơjiâng, gak ngăn kong, ki rơhêng vâ tối cho troăng pơkuâ liăn ngân ‘na tơnêi tơníu mê á pơkâ Chin phuh tơkŭm hriăn plĕng, tơleăng tơdroăng kố’’.

Tung mâu tơdroăng dêi rah xo ăm tơtro, pơ’lêh nếo, tơlo liăn pêi cheăng dêi kŏng ti pêi chiâk deăng, pêt mơjiâng, gak ngăn kong, pôa Vương Đình Huệ, Kăn xiâm hnê ngăn Kuô̆k hô̆i tối, tơdroăng ki u ối ‘na tơnêi tơníu cho tơdroăng ki pá má môi ƀă kal thế tơleăng troh tá tui lui. Kăn xiâm hnê ngăn Kuô̆k hô̆i pơchân tơdroăng pơcháu tơnêi dêi mâu kŏng ti pơkuâ pêi chiâk deăng, pêt mơjiâng, gak ngăn kong ăm kong pơlê nôkố xuân ối hên tơdroăng ki ối pá, tá hâi rơkê tơtro ƀă pơkâ Hô̆i đong kuăn pơlê mâu kong pơlê ai pơkâ séa ngăn.

La ngiâ, Kuô̆k hô̆i kô vêh séa ngăn tơdroăng kố:

“Tơdroăng xiâm pơ’lêh nếo troăng ‘na pơkuâ, tá ‘na liăn ngân, tá ‘na pêt mơjiâng tơmeăm tối tơdjuôm ối hên tơdroăng thế pêi. Pơkâ xiâm vâ mơdêk châ tơƀrê má mơ’nui dêi mâu kŏng ti pơkuâ pêi chiâk deăng, pêt mơjiâng, gak ngăn kong, veăng kum tơ’nôm tung tơdroăng tơtêk ƀă liăn ngân tơnêi têa mê ối ai kơtăn. Kơxô̆ tơnêi mâu kŏng ti pơkuâ pêi chiâk deăng, pêt mơjiâng, gak ngăn kong pơtroh ăm kong pơlê mê cho iâ.

Má péa nếo, tơnêi pơtroh ăm kong pơlê ai pơkâ xo tơvêh tơnêi ƀă ai troăng xúa tơnêi mê cho ối iâ. Tơdrêng amê kuăn pơlê dêi pin, ki má lối cho kuăn pơlê hdroâng kuăn ngo kơpong kong ngo, kuăn pơlê hdroâng kuăn ngo ôh tá bê tơnêi ối, tơnêi pêi kâ. Kố cho tơdroăng ki pin thế tơmâng, kal thế ai mâu troăng pêi ki tơtro’’.

Kô hlo nhên, mâu tơdroăng dêi rah xo pro tơtro, pơ’lêh nếo, tơlo liăn pêi cheăng mâu kŏng ti pơkuâ ‘na pêi chiâk deăng, pêt mơjiâng, gak ngăn kong lâp tơnêi têa tối tơdjuôm, Tây Nguyên tối krê, hiăng châ khu râ kăn pơkuâ Đảng, Tơnêi têa hlê plĕng nhên ƀă tơmâng pơkuâ, hnê mơhno vâ rĕng tah lôi mâu tơdroăng ối ai, ối pá puât, tá hâi rơkê tơtro.

VOV Tây Nguyên rah chêh

A Sa Ly tơplôu ƀă tơbleăng