VOV4.Xơ Đăng - Klêi kơ’nâi mơgêi Hneăng hôp ôh tá tiah hmâ rôh má môi, pôa Vương Đình Huệ, Kăn xiâm hnê ngăn Kuô̆k hô̆i hiăng pơkâ thế, Chin phuh, Ngế pro xiâm hnê ngăn Chin phuh ƀă mâu kơ koan ki ai tơdjâk troh rĕng tơkŭm tơbleăng pêi pro rĕng, teăm tơdrêng mâu tơdroăng pơkâ ki nếo châ tơbleăng, ‘mâi rơnêu tơdroăng “apoăng hơnăm ki tơngôu, mơ’nui hơnăm pêi tơbréa”.

Ƀă tơdroăng ai hnoăng cheăng pêi khât a ngiâ tơnêi têa, kuăn pơlê, hneăng hôp ôh tá xê tiah hmâ rôh má môi, Kuô̆k hô̆i hneăng 15 hiăng tơbleăng 1 luât ƀă 4 tơdroăng pơkâ vâ môi tuăn ƀă dêi rơpó. Tơdroăng pơkâ ‘na luât tŏng kum tơdroăng rak liăn, liăn ngân vâ tŏng kum tơbleăng tơdroăng ‘mâi mơnhông cheăng kâ - rêh ối cho  môi tung mâu tơdroăng ki kal dêi rôh hôp mê.

Pôa Vương Đình Huệ, Kăn xiâm hnê ngăn Kuô̆k hô̆i tối tiah kố, vâ teăm tơbleăng tơdrêng, châ tơ-ƀrê mâu luât pơkâ tŏng kum rak liăn ngân, ‘na liăn ngân, Kuô̆k hô̆i pơkâ thế Chin phuh, rêm râ, mâu kơvâ cheăng, séa ngăn troăng rơhlâ dêi Đảng, luât tơnêi têa, mâu pơkâ dêi Kuô̆k hô̆i, pơtối rak vế tơniăn tơdroăng cheăng kâ kân, mơdêk tơ-ƀrê ki tơbriât, ‘nâi hriăn pêi dêi, ai ivá kâi trâng, hmâ ƀă tơdroăng cheăng kâ, teăm ai tiô púi vâ  a ngiâ ƀă ton ta ah, tơrŭm krá kak ƀă mâu pơkâ 5 hơnăm pơla hơnăm 2021-2025 hiăng châ Kuô̆k hô̆i tơbleăng ƀă Tơdroăng ‘na hbrâ mơdât pơreăng COVID-19.

Pôa Vương Đình Huệ, Kăn xiâm hnê ngăn Kuô̆k hô̆i

Pôa Vương Đình Huệ, Kăn xiâm hnê ngăn Kuô̆k hô̆i  tối:

“Tơdroăng pơkâ dêi Kuô̆k hô̆i  xuân pơcháu ăm Chin phuh, mâu kơvâ cheăng xiâm ƀă mâu kong pơlê tiô tơdroăng cheăng,  hnoăng cheăng pêi ƀă tơbleăng pơkâ mê; mơdêk hnoăng cheăng dêi ngế ối a ko tung pơkuâ hnê mơhno tơkŭm cheăng, tơbleăng pêi tơdroăng cheăng tơniăn tro tiô troăng rơhlâ, tơdroăng pơkâ, tơbleăng tơdrăng, tơbrê ƀă hlối pêi pro; tơmâng khât séa ngăn, hnê mơhno ing apoăng pôi tá ăm ai tơdroăng xía vâ, ki tăng pro pơxúa xêh ing luât pơkâ tŏng kum, kâ kơluâ, mơ’nhiê liăn  ƀă tơleăng pơxâu phak kơtăng mâu ngế pro xôi, malối tung pơla xing xoăng mơngế cheăng tung pơla iâ khế’’.

Pơkâ hneăng hôp ôh tá xê to tiah hmâ roh má môi, Kuô̆k hô̆i hneăng 15 hiăng pơ’lêh tơ ê Tối mơgêi dêi Khu xiâm kal kí ‘na tơdroăng hbrâ mơdât pơreăng COVID-19 pơla hơnăm 2022-2023 ƀă tơdroăng ‘mâi mơnhông cheăng kâ - rêh ối. Ƀă tơdroăng pơkâ mê, poâ Vương Đình Huệ ăm ‘nâi, Kuô̆k hô̆i pơkâ thế Chin phuh, Ngế pro xiâm hnê ngăn Chin phuh hnê mơhno mâu khu xiâm, kơvâ cheăng, kong pơlê tơbleăng rĕng, pơkâ ƀă mơdêk ki pâk lâp vaccine ƀă pâk trum tơ’nôm ăm mâu ngế hiăng kân, tí tăng ‘nâi plĕng nhên ƀă pơkâ tơtro, khoa hok vâ pâk vaccine ăm mâu ngế pá xôp 18 hơnăm, malối cho mâu vâi ‘nĕng.

Tâ tá hneăng hôp

Pôa Vương Đình Huệ, Kăn xiâm hnê ngăn Kuô̆k hô̆i  pơkâ thế:

“Tơmâng tơdroăng hnê mơhno, séa ngăn tí tăng ngăn, tơmâng khât hnê khĕn, hnê rak luât, mơdêk mâu ki ai tuăn lĕm, tung tơdroăng cheăng pêi, malối cho hnoăng cheăng dêi ngế pơkuâ xiâm tơdjâk troh khu tơrŭm cheăng pêi pro luât pơkâ, tuât tŏng kum tung ‘mâi mơnhông cheăng kâ - rêh ối ƀă hbrâ mơdât pơreăng, teăm châ ‘nâi, pơxâu phak mâu ngế pro xôi kâ kơluâ, mơ’nhiê liăn tê kơtê, tuăn ‘mêi.

Tơkŭm mâu ngế, thâ pêi cheăng, pêi kơtăng, po rơdâ séa ngăn mơnhên tơdroăng cheăng pơcháu, tí tăng ‘nâi plĕng, tơmâng ngăn, pơcháu ăm, ăm hlá mơ-eá chiâng phêp xúa, hôp tơpui ‘na yă, tơdroăng hnê tối, khĕn kơdeăn, tơkŭm pêi chiâk, pêi lo tơmeăm khoăng ƀă tơdroăng tê rôe KIT khăm ngăn COVID-19 dêi kŏng ti  Việt Á; hnoăng cheăng  dêi khu tơrŭm, mâu ngế tơdjâk troh mơnhên tơdroăng tơkêa pro’’ .

Vâ mâu tơdroăng pơkâ dêi hneăng hôp ôh tá xê tiah hmâ rôh má môi, Kuô̆k hô̆i hneăng 15 châ xúa tung rêh ối, pôa Vương Đình Huệ, Kăn xiâm hnê ngăn Kuô̆k hô̆i pơkâ thế, Chin phuh, Ngế pro xiâm hnê ngăn Chin phuh, Vi ƀan pơkuâ cheăng Kuô̆k hô̆i, Hô̆i đong ngăn kuăn ngo, mâu Vi ƀan Kuô̆k hô̆i, rêm râ, mâu kơvâ cheăng, mâu kơ koan tung khu xiâm tơnêi têa thâ tơbleăng pêi rĕng teăm tơdrêng mâu Luât, Pơkâ nếo tơbleăng rĕng pơtối pêi tơ-ƀrê ƀă hlối xúa tung rêh ối, Tơkâ luâ tơdroăng “Apoăng hơnăm tơngôu, mơ’nui hơnăm tơbréa”.

Pôa Vương Đình Huệ, kăn xiâm hnê ngăn Kuô̆k hô̆i tối tiah kố, ƀă tơdroăng tơkŭm po klêi hneăng hôp rôh má môi, pin ai ƀai hriâm ki kơnía vâ mâu rôh hôp “ oh tá xê tiah hmâ ” chiâng tơdroăng cheăng ki “ hmâ’’ dêi Kuô̆k hô̆i  vâ ai tiô púi vâ teăm tơdrêng.

Ing tơdroăng dêi rôh hôp ôh tá xê tiah hmâ roh má môi, Kuô̆k hô̆i  hneăng 15 hiăng pro mâu tơdroăng ki nếo, rôh tơ’lêi, tơdrêng ƀă mâu luât pơkâ ki nếo châ pơkâ, tơdroăng pêi kơtăng dêi Chin phuh, ƀă tơdroăng veăng tơmâng dêi rêm tâ, mâu kơvâ cheăng ƀă tá khu cheăng kal kí, veăng kum, môi tuăn dêi kuăn pơlê, khu mơdró, pin loi khât kô pê klêi tơdroăng cheăng mơnhông cheăng kâ-rêh ối hơnăm 2022 ƀă plâ hơnăm 2021-2025, tơnêi têa pơtối mơnhông mơdêk krá tơniăn, tơdroăng rêh ối dêi kuăn pơlê kô châ mơdêk, tuăn loi dêi kuăn pơlê kô rế châ ‘mâi mơnhông krá kâk.

Quốc Học rah chêh

Gương tơplôu ƀă tơbleăng