A rôh hôp má 4, Kuô̆k hô̆i hiăng mơdoh hên chôu tơpui tơno mâu tơdroăng ƀă tơdroăng pêi pro tiô pơkâ mơnhông cheăng  kâ - rêh ối, liăn ngân tơnêi têa. Tối tơbleăng mơgêi a rôh hôp, pôa Vương Đình Huệ, kăn xiâm hnê ngăn Kuô̆k hô̆i sôk ro, khĕn kơdeăn mâu hnoăng hiăng châ pêi pro, tơƀrê mơnhông cheăng kâ rêh ối pơlê pơla; tơniăn cheăng lêng, kring vế tơniăn rêh ối, rak ngăn mâu ai hnoăng tơnêi têa. 

Séa ngăn vâ ‘nâi tơdroăng dêi roh hôp ing mâu tơdroăng nếo ai, pôa K’Tân (kuăn ngo K’Ho) ối acheăm Dà  Dờn, tơring Lâm Hà, kong pơlê Lâm Đồng tối:

“Nếo achê kố kuăn pơlê Lâm Hà tí tăng ngăn vâ ‘nâi Kuô̆k hô̆i hôp rôh má 4,  Kuô̆k hô̆i hneăng 15. Ai hên ngế púi vâ dêi kuăn pơlê châ Kuô̆k hô̆i tơpui, tơmâng. Ing mê, kô kum kuăn pơlê  hdroâng kuăn ngo mơnhông cheăng kâ, râk vế luât pơkâ liăn khế ăm kăn ƀô̆ kŏng chưk kuăn pơlê hdroâng kuăn ngo. Kuô̆k hô̆i hôp roh kố tơpui hên tơdroăng tơtro ƀă hiâm mơno kuăn pơlê, kuăn pơlê phiu ro púi vâ pro ti lâi vâ châ tơmâng kum kuăn pơlê hdroâng kuăn ngo hên tâ nếo tung tơdroăng hnê hriâm, po lâm hnê ‘na kih thuât pêt kơphế, tiu, loăng plâi hôt, loăng mắc ca, păn chu, păn kơpôu, ro ...’’.  

Mơgêi rôh hôp mơ’nui hơnăm 2022, Kuô̆k hô̆i pâ thế Vi ƀan Pơkuâ cheăng Kuô̆k hô̆i, Chin phuh, Ngế pro xiâm hnê ngăn Chin phuh, Hô̆i đong ngăn Kuăn ngo, mâu Vi ƀan dêi Kuô̆k hô̆i, rêm râ, kơvâ cheăng thâ tơkŭm pêi tơdroăng Pơkâ hiăng châ Kuô̆k hô̆i tơbleăng. Mâu kăn Kuô̆k hô̆i, rĕng trâm mâ kuăn pơlê vâ tối tơbleăng tơdroăng hiăng klêi dêi rôh hôp, rak tơrŭm krá, tơmâng, tối tro khât tơdroăng hnê tối ƀă púi vâ dêi kuăn pơlê. Rêm râ, mâu kơvâ cheăng pêi tro tơbrê mâu luât pơkâ tơniăn tung rêh ối pơlê pơla, tơmâng khât troh tơdroăng rêh ối tơmeăm khoăng, tuăn ngôa dêi kuăn pơlê; hbrâ khât mâu tơdroăng vâ kum kuăn pơlê tơdah hơnăm nếo 2023 ƀă Têt lo hơnăm nếo Qúy Mão.

A rôh trâm mâ  kuăn pơlê klêi rôh hôp má 4, Kuô̆k hô̆i hneăng 15, pôa Pang Ting Brăng (kuăn ngo K’Ho) ối a tôh kơphô̆ 1, pơlê kân Lạc Dương, tơring Lạc Dương, kong pơlê Lâm Đồng tối tiah kố, mâu rôh hôp dêi Kuô̆k hô̆i tơpui ‘na luât pơkâ tŏng kum, mê kuăn pơlê châ xúa tŭm. Klêi mâu rôh trâm mâ kuăn pơlê, kuăn pơlê tối, châ mâu kăn Kuô̆k hô̆i tơbleăng tơpui. Mâu luât pơkâ tŏng kum mê dế xúa tung rêh ối.

Pôa Păng Ting Brăng  tối:

“Nôkố Tơnêi têa đi đo rơtế ƀă kuăn pơlê, đi đo pơkâ luât tŏng kum kuăn pơlê. Mê cho a kong pơlê hiăng po hên lâm hnê ‘na khoa hok kih thuât, vâ kuăn pơlê hlê tơdroăng ki xúa mâu khoa hok kih thuât nếo tung tơdroăng pêt loăng plâi, păn mơnăn. La kuăn pơlê kơhnâ veăng lâm hriâm mê cho vâ xúa mâu tơdroăng ki hlê plĕng tung pêi chiâk, mê mơni pin kô ai túa cheăng ƀă kô pêi tơƀrê.  Rế ton a rế pêi tro tâ, tơƀrê tâ mâu tơmeăm pêi lo thăm rế lĕm tâ tơbleăng tê a kơchơ xuân tơ’lêi hlâu tâ’’.

Kơ’nâi rôh hôp má 4, Kuô̆k hô̆i hneăng 15, mơ’nui khế 11/2022 kố nah, Vi ƀan pơkuâ cheăng Kuô̆k hô̆i hiăng tơkŭm hôp roh má 17, tơbleăng têk kŏng vâ môi tuăn xing xoăng liăn ‘no mơnhông cheăng kâ dêi tơnêi têa pơla hơnăm 2021-2025 ăm 3 tơdroăng pơkâ dêi tơnêi têa. Tung mê, Tơdroăng pơkâ dêi tơnêi têa mơnhông cheăng kâ - rêh ối kơpong hdroâng kuăn ngo ƀă kong ngo vâ chê 2.500 rơtal liăn; Tơdroăng pơkâ dêi tơnêi têa xăm kơtiê krá tơniăn ton ai 2.000 rơtal liăn; Tơdroăng pơkâ dêi tơnêi têa mơjâng thôn pơlê nếo ai 3.000 rơtal liăn. Kố cho luât pơkâ châ hên kuăn pơlê a kơpong Tây Nguyên rơhêng vâ ‘nâi plĕng.

Pôa Khét Atô, Kăn phŏ hnê ngăn Kuăn ngo kong pơlê Dak Nông tối:

“ ‘Na tơdroăng pơkâ dêi tơnêi têa rôh má 3 mê cho môi tung tơdroăng ki kân. Nôkố a Dak Nông dế pêi tro tiô troăng rơhlâ dêi Kuô̆k hô̆i ƀă Chin phuh hiăng pơkâ, pin thê pêi kơtăng. Kố cho môi tung mâu tơdroăng châ kuăn pơlê púi vâ, xua mê, cho luât pơkâ ki tro dêi Đảng hiâm mơno kuăn pơlê. Nôkố hiăng ai 10 tơdroăng tơkêa bro hiăng châ ngế pro xiâm hnê ngăn Chin phuh kĭ. 

Pơtih Khu ngăn mơhno túa lĕm tro tơ’noăng ivá ƀă ôm hyô ai môi tơdroăng pro ăm kuăn pơlê a mâu pơlê - pơlê mơnhông ôm hyô tung kuăn pơlê ối rak khôi túa lĕm tro dêi kong pơlê tơná’’.

Vâ pêi 3 tơdroăng mê, kong pơlê Dak Nông tiô tối hdrối kô xoăng lối 1.000 rơtal liăn tơbleăng mâu tơdroăng: Mơjiâng thôn pơlê nếo, mơnhông cheăng kâ - rêh ối kơpong hdroâng kuăn ngo ƀă kong ngo ƀă xăm kơtiê krá tơniăn.

Ƀă mâu tơdroăng pơkâ tro dêi Kuô̆k hô̆i, Chin phuh, mâu kong pơlê kơpong Tây Nguyên tơngah hơnăm 2023 ƀă mâu hơnăm pơtối kô mơnhông mơdêk rơdêk rơdêi, vâ Tây Nguyên mơ-eăm mơnhông rơtế ƀă lâp tơnêi têa.