Tơdroăng tơkêa pro troăng prôk tơdrăng ing peăng Kơnhŏng troh peăng Hdroh peăng mâ hâi lâ troăng tơkâ luâ Gia Nghĩa (Dak Nông) – Chơn Thành (Bình Phước) cho troăng prôk ki kal, tơdjêp kơpong Tây Nguyên ƀă kơpong Đông Nam Bộ, kơpong Tây Nam Bộ ƀă Pơlê kong kân Hồ Chí Minh. Ƀă ki xŏn 128 km, ‘no liăn bro klâ hneăng má 1 cho ăm 4 toăng rơxế kơtâu. Tâi tâng kơlo liăn ‘no cho 25 rơpâu 540 rơtal liăn. Mâu kăn pâ thế Chin phuh tơkŭm po tơbleăng pêi pro tơdroăng tơkêa rak vế tro tơdroăng, dâi lĕm kâk, tơƀrê ‘no liăn bro tiô tro pơkâ dêi luât.

Pakĭng mê, tơdroăng ki ‘no liăn bro troăng prôk tiô túa pơkâ tơnêi têa tơrŭm cheăng tơdjuôm ƀă krê kal tơmiât nhên tơdroăng ki tơ’mot mâu khu ‘no liăn cheăng, khu tơrŭm ăm mung liăn veăng ‘no liăn bro. Pôa Trình Lam Sinh, Ngế ki lo ing An Giang tối nhên:

“Drêng krếo thế mâu khu ki ‘no liăn veăng pro tơdroăng tơkêa kố tiô túa pơkâ cho khu tơrŭm cheăng tơdjuôm ƀă krê, pin xuân athế tơmiât troh tơdroăng ki tơniăn lĕm pơxúa xuân môi tiah cho tơdroăng ki veăng gum mâu tơdroăng ôh tá mơhúa drêng trâm tơtro ăm péa pâ, tung mê Tơnêi têa kal pro tơ’lêi hlâu ăm khu ki ‘no liăn bro ai túa pơkâ xo tơvêh kơxô̆ liăn tơƀrê. Tơdroăng kố kal khât xua tơdroăng tơkêa kố ôh tá bê tŭm tơdroăng ki hâk vâ tơ’mot khu ki ‘no liăn cheăng ai drêng ‘nâ pin athế hơ’lêh tơdroăng tơkêa kố chiâng túa pơkâ ‘no liăn tơdjuôm mê chiâng bro hrá tơdroăng ki pro, tơdjâk troh liăn ngân Tơnêi têa, tơdroăng mơhnhôk pơlê pơla veăng tơlo liăn vâ bro mâu hngêi trăng, troăng klông”.

Ƀă tơdroăng ki chiâ xo kế tơmeăm hmốu prêi bro kế ki vâ bro tiah hmâ ăm tơdroăng tơkêa, pôa Nguyễn Trường Giang, ngế ki lo ing Dak Nông pâ thế Kuô̆k hô̆i ăm phêp xúa mâu troăng hơlâ tŏng ki kal:

"Ƀă kơpong ki tá hâi ai mơ-éa phêp tí tăng ‘nâi kế tơmeăm, mơ-éa phêp chiâ xo kế tơmeăm mê khu ki xo bro tơdroăng tơkêa kố châ rah xo vâ chiâ xo kế tơmeăm. Khu ki xo bro mê athế nâp hlá mơ-éa chêh inâi túa pơkâ chiâ xo mâu tơdroăng ki kal rak vế kong prâi tơnêi tơníu ƀă pơcháu ăm Vi ƀan hnê ngăn kong pơlê Bình Phước ƀă Vi ƀan hnê ngăn kong pơlê Dak Nông ai hnoăng cheăng mơnhên túa pơkâ chiâ xo tơdroăng ki kal rak vế kong prâi tơnêi tơníu ƀă mâu tơdroăng cheăng chiâ xo kế tơmeăm, hmốu prêi mơjiâng bro tiah hmâ”.

Ƀă kơxô̆ liăn tơnêi têa lối 10 rơpâu rơtal, mâu kăn pâ thế Chin phuh tơpui tối leăng pêi pro nhên tơdroăng ki xoăng liăn vâ bro tơdroăng tơkêa tung hơnăm 2026. Ƀă kơxô̆ liăn kong pơlê lối 2 rơpâu rơtal liăn, pâ thế mâu kong pơlê tơhrâ chiu pôu râng hnoăng cheăng a ngiâ Chin phuh, Chin phuh chiu pôu râng a ngiâ Kuô̆k hô̆i ‘na tơdroăng ki xing xoăng liăn ngân kong pơlê a tơdroăng tơkêa pêi pro tro tơdroăng pơkâ. Ƀă mâu kơxô̆ liăn ing mâu khu ki ‘no liăn cheăng dâng 12 rơpâu rơtal liăn, châ 50% tung tâi tâng kơlo liăn ‘no ăm tơdroăng tơkêa, pâ thế Chin phuh môi tuăn ƀă khu ki ‘no liăn cheăng, pôi tá rơnêu troăng hơlâ ‘no liăn bro tơdroăng tơkêa.

Tơpui tối leăng a rôh hôp, pôa Nguyễn Văn Thắng, ngế xiâm ngăn troăng prôk rơxế kơtâu tối nhên, tung pơla tơbleăng bro tơdroăng tơkêa, mâu kong pơlê pơrá tối nhên kô xoăng tơ’mô, xoăng tŭm kơxô̆ liăn vâ tơbleăng bro tơdroăng tơkêa tro tơdroăng kô bro klêi a mơ’nui hơnăm 2026:

"Malối dêi tơdroăng tơkêa kố gá tơ’lêi hlâu khât ‘na mâu kế tơmeăm vâ pro. Nôkố tiô mơnhên tối dêi hlá mơ-éa pơkâ dêi 2 to kong pơlê mê péa to kong pơlê hiăng xing xoăng tŭm mâu tíu pêi ki ai hmốu prêi. Bu ai to tơdroăng nôkố pin ai troăng hơlâ tŏng gum ki Kuô̆k hô̆i dế tơmiât pơkâ mê xuân tơ’lêi hlâu, ai mâu troăng hơlâ ki kal tơdjâk tro tơdroăng ki xo tơnêi, hnê mơhno ngế ki xo pro mê vâ pro mâu kơpong kuăn pơlê ối. Kố cho mâu tơdroăng dế bro. Ƀă tơdroăng ki ai tơdjâk troh xing xoăng mâu tíu ki ai hmốu prêi ƀă hên ki ê tâi tâng mâu tơdroăng kố gá tơ’lêi hlâu”.

Kăn Kuô̆k hô̆i ƀă kuăn pơlê loi tiah kố, tơdroăng ki ‘no liăn bro tơdroăng tơkêa troăng kân Gia Nghĩa (Dak Nông) -  Chơn Thành (Bình Phước) kô rế hía rế chiâng troăng prôk ki kal, po ăm kong prâi, tơnêi tơníu mơnhông nếo ăm kơpong Tây Nguyên.