Tối kơlo ki tâk 6,5% GDP hơnăm 2023 cho iâ tâng vâ pơchông ƀă kơlo 8,83% tung 9 khế dêi hơnăm kố. Laga, pôa Trần Đức Thuận, Khu kăn Kuô̆k hô̆i kong pơlê Nghệ An tối nhên: Kơlo ki tâk hơnăm 2022 cho hên la pôi tá tơngah luâ râ a kơlo ki tâk hơnăm 2023 hên tâ nếo. Xua hơnăm 2023 châ tối tơbleăng hdrối kô ai hên tơdroăng ôh tá mơhúa, kô pơloăng mơnúa drêng ai tơdroăng tơplâ pơla Rusi ƀă Ukraina nôkố hâi hlo kâi pơtê, hlối pro yă têa châu, on gas ƀă kế kâ to kơnâ, liăn ôh tá ai yă ƀă liăn rơkâ râk hên:

“Nôkố a tơmâng troh ‘na têa châu, têa kơxăng nôkố hlo ôh tá tơniăn, pin pôi tá tơngôu ôh pôi tá tơmiât ối châ rak tơdroăng ki xúa yă têa kơxăng môi tiah kố nah. Xua mê, tơdroăng pơkâ kơlo 6,5% a tơmiât pin thế nhoăm ƀă tơbleăng kơlo 6,5% môi tiah mê ga tơtro’’.

Pôa Vũ Tiến Lộc, Khu kăn pơlê kong kân Hà Nội tối tiah kố, tơdroăng cheăng kâ dêi tơnêi têa pin a kơlo ki têi, kơnôm hên a tơdroăng ‘no liăn cheăng, tê kế tơmeăm ăm kong têa ê, kơchơ tê mơdró lâp plâi tơnêi. Tung tơnêi têa, Khu mơdró trâm hên xơpá, ki mơ-eăm mơdêk cho tê ăm kong têa ê, ‘no liăn cheăng a kong têa ê.

“Tung pơla trâm xơpá môi tiah mê Kuô̆k hô̆i pơkâ môi tơdroăng mơdêk ai 6,5% cho môi tơdroăng pơkâ kơlo mơ-eăm hên tâ. Tâng ôh tá ai tơdroăng ki ôh tá tơniăn tơ’nôm dêi tơdroăng tung lâp plâi tơnêi, mê pin kô châ pêi pro tơdroăng pơkâ mê. Tâng kơchơ tê mơdró lâp plâi tơnêi pơ’lêh kân ôh tá  mơhúa, xơpá tâ, mê tơdroăng vâi pêi pro châ 6,5% mê cho tơdroăng ki pơloăng mơnúa kân kĭn khât’’.

Tối ‘na mâu troăng rơhlâ pêi tung la ngiâ, pôa Vũ Hồng Thanh, khu kăn kong pơlê Quảng Ninh tối, tâng tơleăng mơnhên tro mâu tơdroăng lot ki hâi pro klêi, mê tơdroăng mơdêk cheăng kâ ôh tá xê to hơnăm kố mê hơnăm kơ’nâi ah  mơni kô châ pêi rơhéa tâ:

“Pin thế tơleăng mơnhên tah mâu tơdroăng ki lot ôh tá tơƀrê nôkố ‘na tơdroăng cheăng kâ môi tiah ‘na xo liăn ngân mung ‘no mơjiâng tơmeăm khoăng tơnêi têa. Tâng châ xo liăn ngân vâ mơjâng pro mê kô tâk dêi hơnăm 2022 mê, mơni ăm hlo ối hên tâ 8%, mê tơdroăng hrá châ xo liăn ngân ‘no mơjiâng tơmeăm khoăng tung hơnăm 2023 thế tơkŭm xo liăn ngân ‘no mơjiâng tơmeăm khoăng.

Tơdrêng amê  kơxô̆ liăn 347 rơpâu rơtal dêi tơdroăng Pơkâ 43 tơdroăng luât pơkâ tŏng kum a tài khóa liăn ngân kơjo kum ‘mâi mơnhông cheăng kâ, rêh ối thế tơkŭm pro tơ’mô, ƀă châ xo liăn ngân  tro ki vâ  pêi cheăng’’.

Xuân tung măng tĭng hdrối, drêng tơpui ‘na tơdroăng ‘mâi mơnhông cheăng kâ - rêh ối, mâu kăn Kuô̆k hô̆i tơmâng khât troh tơdroăng “Hyôh ƀă kơmăi tĭnh ăm o”. Pơkâ dêi tơdroăng mê cho ăm 1 rơtuh toăng kơmăi tĭnh ăm hok tro mâu rơpŏng kơtiê. Laga, nôkố ối 400 rơpâu toăng kơmăi tĭnh hâi châ ăm. Pakĭng mê, tơdroăng kô xuân hâi pro tơniăn ‘na ai hyôh, ai Internet troh tâi tâng mâu rơpŏng. Mâu kăn hiăng tối nhên ƀă tối troăng rơhlâ vâ pêi tung la ngiâ. 

Jâ Thị Sửu, khu kăn Kuô̆k hô̆i kong pơlê Thừa Thiên Huế pâ thế tung la ngiâ tơkŭm mơjiâng tơmeăm khoăng ‘na Kŏng ngê̆ thong tin. Púi vâ Khu xiâm ngăn tơdroăng nếo ai hyôh rơ ‘jíu tí tăng ‘nâi plĕng teăm tơdrêng tối ăm Chin phuh vâ kum mâu ngế ki tơxâng châ tŏng kum’’.

“Teăng tơdroăng hơ’muăn cho tơbleăng kô pêi tơdjuôm a râ cheăm lơ a râ tơring ƀă tung môi kơlo tíu pêi cheăng pro hlá mơ-éa cho ai môi toăng kơmăi ai phần mềm tơdjuôm tung lâp tơnêi têa. A hlo tơƀrê tâ tung pêi cheăng ƀă tơdroăng kố kô veăng kum hên ăm mâu tơdroăng hơ ‘muăn kơxô̆ hoă, kơxô̆ nếo cho ki kal cho kơxô̆ hoă tung kơvâ cheăng hnê hriâm klêi tơdroăng cheăng kâ kơ’nâi mơhno túa lĕm tro tung tơdroăng hnê hriâm’’.

Pôa Nguyễn Lâm Thành, Khu kăn Thái Nguyên tối: ối hên ‘’kơpong klong’’ a mâu thôn, pơlê, tíu kuăn pơlê ối ôh tá ai troăng hyôh ki ‘nâ ai la ôh tá têi, malối a mâu kơpong kong ngo, tíu tơkăng kong, chuăn rơlốu. Tung pơla mê, tơdroăng ‘’ Hyôh ƀă kơmăi tĭnh ăm o” hrá troh:

“Ki xiâm gá xua tơdroăng tí tăng rĕng ‘nâi mâu tơdroăng mê ƀă tơleăng mơnhên mâu tơdroăng tiô púi vâ dêi pơlê pơla, kuăn pơlê tơdroăng hyôh ƀă hâi pro ăm tơdâng tơ ‘mô. Tơdroăng ‘na “ Hyôh ƀă kơmăi tính ăm o” hrá, tơdroăng pêi pro ôh tá ai môi tiah púi vâ. Tá Hyôh ƀă tá kơmăi tĭnh. Tơdroăng ‘na hnê tối tung hlá tơbeăng tung tơdroăng pơkâ dêi tơnêi têa cho tơdroăng hrá pêi hâi châ pơkâ hlá mơ-éa hnê mơhno. Tơdroăng mê, chiâng hrá tung pêi pro’’.

Tiâ khu chêh hlá tơbeăng a ngiâ Kuô̆k hô̆i, pôa Nguyễn Mạnh Hùng, Ngế xiâm tối ăm ‘nâi mâu tơdroăng ƀă Hyôh rơ’jíu ăm ‘nâi: Nôkố 400 rơpâu toăng kơmăi dế ‘mâi pro ăm tơdâng tơ’mô tơdrêng tâi tâng ‘na tơdroăng hriâm tung mơ’no tơdrêng tiô troăng hyôh Internet klêi kơ’nâi ai pơreăng COVID-19 dêi Khu xiâm ngăn hnê hriâm ƀă hnê mơjiâng tuăn ngôa rơkê. Klêi tơdroăng mê, kô pơtroh ‘na tơdroăng “Hyôh ƀă kơmăi tính ăm o”.