VOV4.Xơ Đăng - Khu xiâm ngăn pơkeăng pơlât tối, troh nôkố tơdroăng pơreăng COVID-19 hiăng kâi châ mơdât tung lâp tơnêi têa. La kơxô̆ mơngế tâ tú tung kuăn pơlê pơtối tâk hên xua tơdroăng rêh ôi pơlê pơla môi tiah hmâ. Ƀă mâu ngế ki tâ COVID-19, mâu kăn kong pơlê rơtế ƀă mâu ƀok thái pơkeăng ƀă mâu ngế cheăng khăm pơlât đi đo lăm kơ-êng, pơlât ngăn vâ ‘nâi tung châ dêi ngế tâ pơreăng xuân môi tiah kum pơtroh kế kâ, tơmeăm xúa… tơniăn ăm rêm ngế ki tâ pơreăng COVID-19 xuân châ tơmâng tŏng kum.

Nếo achê kố, ngêi pơkeăng kân pơlê kong kân Cần Thơ hiăng tơkŭm po leh tơdah 45 tâ̆n oxy ai têa kơƀêl ing mâu khu tŏng kum ăm mâu tơdroăng pơlât mâu ngế tro tâ COVID-19 ki râ. A roh leh tơdah, Ƀok thái pơkeăng Chuyên khoa II Trần Quốc Luận, Kăn pơkuâ Hngêi pơkeăng kân pơlê kong kân Cần Thơ tối, tơdroăng tơdjuôm ivá tŏng kum dêi mâu kơ koan, khu tê mơdró, khu mơngế ai hiâm tŏng kum cho tơdroăng ki kơnâ vâ mâu ngế tro tâ COVID-19 hmiân tuăn pơlât:

‘’Ƀă kơxô̆ oxy xing xoăng ăm kố, tiô á nôkố cho kơnâ ‘nâng, ki rơhêng vâ tối cho ƀă lối 300 ngế tro tâ COVID a râ má 2 châi râ ó ƀă râ má 3 dế ối pơlât akố. Ngin kô mơ-eăm xúa kơxô̆ oxy kố châ tơƀrê, kơdĭng má môi ăm mâu ngế tro tâ COVID-19’’.

Nôkố, mâu kong pơlê, pơlê kong kơdrâm hiăng mơjiâng mâu hngêi pơkeăng cheăm ki troh lâp lu a mâu cheăm, bêng, pơlê kong krâm vâ tŏng kum, rak ngăn pơlât F0 a hngêi. Rơtế ƀă hngêi pơkeăng, Khu pơkuâ Đoân droh rơtăm pơlê kong kơdrâm mâu kong pơlê hiăng mơhnhôk mâu kơxuô pơkeăng kum rêh ối pơlê pơla vâ diâp ăm mơngế tro tâ COVID-19 pơlât a hngêi. Ngoh Dương Hiệp Hưng, Kăn pơkuâ hnê ngăn cheăng Đoân droh rơtăm pơlê kong kơdrâm Quy Nhơn, kong pơlê Bình Định tối ăm ‘nâi:

‘’Ngin tơbleăng ăm kơxô̆ phôn ki krếo ai mâ đi đo vâ F0 ai vâ ‘nâi ki klâi mê krếo troh Hngêi pơkeăng ki troh lâp lu xuân môi tiah Khu pơkuâ Đoân droh rơtăm pơlê kong kơdrâm vâ tŏng kum. Nôkố, ngin hiăng djâ 136 ngế pleăng hnoăng cheăng vâ tŏng kum cheăm ti tăng mâu ngế tro tâ pơreăng, test tâi tâng’’.

Pakĭng mê, vâ kơdroh kơxô̆ mơngế ki châi râ mê pơkâ ki xiâm cho tơniăn kuăn pơlê châ troh hngêi pơkeăng rĕng, ing hơngế; tơdrêng amê mơdêk ivá khăm pơlât hngêi pơkeăng, đi đo hbrâ tơmeăm khoăng pơlât, mơngế pêi cheăng, pơkeăng pơlât, oxy ƀă hía hé, tơniăn trếo piê kơhiâm ƀă rak ngăn, mơhnhôk hiâm mơno ăm mơngế châi tamo, tơrŭm ƀă pơlât pơkeăng rêi nhâ hlá loăng ƀă pơlât tiô troăng rơxông nếo.

Tiô Khu xiâm ngăn pơkeăng ƀă khăm pơlât, nôkố, tung kơxô̆ lối 200 rơpâu ngế tro tâ pơreăng COVID-19 dế séa ngăn pơlât a tơnêi têa pin, ai lối 100 rơpâu ngế F0 dế séa ngăn, pơlât a hngêi, châ 47%; vâ chê 15 rơpâu roh ngế dế séa ngăn pơlât a mâu kơpong klâ kơtăn tơkŭm, châ 7%; Kơxô̆ ki ê vâ chê 100 rơpâu ngế dế pơlât a mâu hngêi pơkeăng. Tung pơla achê kố, kơxô̆ mơngế hlâ xua COVID-19 xuân a kơlo ki hên a Pơlê kong kân Hồ Chí Minh ƀă hlo thăm rế tâk hên a kong pơlê Bình Dương, Đồng Nai, thăm nếo tá a pơlê kong xiâm Hà Nội.

Vâ tơniăn rêm ngế kuăn pơlê tro tâ COVID-19 pơrá châ tơmâng pơlât, Khu xiâm pơkuâ ngăn pơkeăng ƀă khăm pơlât hiăng tơniăn tŭm tơdroăng kal vâ ƀă mâu pơkeăng hbrâ mơdât pơreăng, ki rơhêng vâ tối cho ƀă 46 pơkeăng pơkâ a Pơkâ kơxô̆ 2626 dêi Khu xiâm pơkuâ ngăn pơkeăng ƀă khăm pơlât. Tiô pôa Vũ Đức Đam, Ngế pro xiâm phŏ hnê ngăn tơnêi têa, tung pơkâ pêi, Khu xiâm pơkuâ ngăn pơkeăng ƀă khăm pơlât kô rôe 400 rơpâu kong kếo Molnupiravir, laga troh nôkố nếo vêh 250 rơpâu kong kếo. Laga, ối ai pơkeăng mơdât virus ki ê cho Favipiravir, nôkố xuân u ối 2 rơtuh pŭm. Tâi tâng pơrá hbrâ vâ ăm xúa, pơlât mâu ngế tro tâ COVID-19. Pôa Vũ Đức Đam, Ngế pro xiâm phŏ hnê ngăn tơnêi têa pơkâ.

‘’Favipiravir xing xoăng ăm tơdrêng u ối 2 rơtuh pŭm ăm mâu kong pơlê, kơbố tro tâ mê kô xing xoăng ăm tơdrêng. La ngiâ kô ai pơkeăng dêi Pfizer ƀă hên hĭn mâu hngêi kơmăi dế hbrâ rơnáu mơjiâng pơkeăng Molnupiravir tung tơnêi têa. Nôkố mơ-eăm pêi kêi đeăng tơdroăng pơlât a hngêi. Vâ kơdroh hlâ mơngế, thế ai troăng séa ngăn dêi khu ƀok thái pơkeăng troh rêm ngế tro tâ pơreăng. Ƀă 2 râ, râ má môi cho troh khăm ing hơngế, khŏm pêi kơtăng kơbố xuân châ troh khăm ngăn ing hơngế, râ má 2 cho troh tíu khăm pơlât’’.

Pôa Vũ Đức Đam xuân pơkâ, Khu xiâm pơkuâ ngăn pơkeăng ƀă khăm pơlât tơniăn tŭm pơkeăng pơlât, ôh tá ăm ôh tá tŭm pơkeăng; pơkâ pêi, hnê mơhno mâu kong pơlê, mâu hngêi pơkeăng hbrâ rôe pơkeăng pơlât; pôu râng hnoăng cheăng séa mơnhên, pơkuâ ki dâi lĕm pơkeăng châ djâ ăm xúa; tơkŭm po rôe tơkŭm mâu pơkeăng pơlât ki kal xúa rêm hâi; xing xoăng,  tŏng kum teăm tơdrêng pơkeăng pơlât ăm mâu kong pơlê; ƀă mâu pơkeăng ki kal xúa rêm hâi, thế ai ai hbrâ ‘măn ăm tơtro drêng ai pơreăng xông tâ tú ƀă hía hé. Tơdrêng amê, hnê mơhno, pro tơ’lêi hlâu ăm mâu khu cheăng, tíu cheăng thâ rôe ing kong têa ê, mơjiâng pơkeăng pơlât COVID-19; thăm mơnúa, pơcháu kơmăi kơmok, mơjiâng vaccine, pơkeăng pơlât COVID-19 tung tơnêi têa vâ hbrâ kơxô̆ pơkeăng ƀă kơdĭng liăn.

VOV4 chêh

A Sa Ly tơplôu ƀă tơbleăng