Kot mâ ƀă xông kân a pơlê xiâm ai khôi túa cheăng kăch măng Nghệ An, ngế rơtăm Hoàng Ngọc Linh kot mâ 1982, klêi kơ’nâi mơgêi râ má pái phôh thông, hiăng chêh đơn pâ lăm pro mô đô̆i. Mơgêi péa hơnăm pro mô đô̆i, ngoh pơtối tiô hriâm a hngêi trung Cao đẳng Quân y 2 pơlê kong kân Hồ Chí Minh. Mơgêi lo hngêi trung châ ƀâng rơkê, ngoh châ pơtroh pêi cheăng pêi cheăng a Mô đô̆i gâk tơkăng kong kong pơlê Gia Lai.

Hơnăm 2018, Hoàng Ngọc Linh châ pơtroh pêi cheăng a Đông mô đô̆i gâk tơkăng kong Ia R’vê, tơring Ea Súp, kong pơlê Dak pơkuâ kơƀong khăm pơlât khu lêng kuăn pơlê tơrŭm, pêi pro tơdroăng khăm pơlât ivá ăm mâu kăn ƀô̆ mô đô̆i dêi đông ƀă kuăn pơlê tung cheăm.

Thươ̆ng ŭy Hoàng Ngọc Linh tối:

‘’Ki phá tơ-ê a kơpong tơkăng kong ‘na rơnó mêi mê hmâ ai pơreăng tơngê lo mơheăm; ƀă rơnó tô mê châi klêa, êi troăng hiâm...ƀă rêm hâi ai sap ing 10 – 15 ngế troh khăm pơlât ƀă pơrá châ ngin khăm pơlât prêi. Rêm hơnăm vêh tơ’nôm mê thế lối 4.000 ngế tro tâ pơreăng châ pơlât teăm tơdrêng. Mơhé rơnó hngíu laga tŏng kum ivá ăm kuăn pơlê mâ tâi tâng nhŏng o ngin pơrá phiu ro đi đo mơ-eăm.

Rơtế ƀă tơdroăng tá hiâm mơno khăm pơlât mê nhŏng o ối pơtâng tối kuăn pơlê pêi pro tơdroăng mơgrúa hngêi trăng, pêi pro tơdroăng kâ tô ôu chên ƀă hiá hé vâ tơniăn ivá’’.

Pôa Vi Văn Ngút, 67 hơnăm, ối a thôn 5, cheăm Ia R’vê, tơring Ea Súp tối ăm ‘nâi, thôn kơtăn tíu xiâm tơring Ea Súp troh lối 60 km, troăng prôk lăm pá puât, ki má lối cho rơnó mêi. Sap ing ai ƀơrô khăm pơlât khu lêng kuăn pơlê Đông mô đô̆i gâk tơkăng kong Ia R’vê, kuăn pơlê ôh tá prôk hơngế vâ khăm pơlât. Ôh tá xê to tiah mê, kăn ƀô̆ ƀok thái pơkeăng pơlât khu lêng ối prôk troh a hngêi kuăn pơlê vâ khăm pơlât ăm mơngế krâ hơnăm hiăng hên, châi râ ƀă hía hé.

Xuân kơnôm ai kơbong khăm pơlât kố ƀă thái pơkeăng Hoàng Ngọc Linh mê mâu ngế tro tâ pơreăng ki râ môi tiah kơdrâi pôa hiăng chiâng vâ prôk lăm. Pôa Vi Văn Ngút hơ’muăn tối.

‘’Kơdrâi á tro hŭn kơxêng rŏng hiăng râ, hngêi pơkeăng vâi tối tâng ôh tá pơlât prêi lĕm tâi, kơdrâi á ôh tá chiâng prôk lăm. Á tâng tối a kơbong khăm pơlât khu lêng kuăn pơlê ai ƀok thái pơkeăng Linh kô chiâng pâk trum pơlât prêi xua mê djâ kơdrâi troh khăm pơlât. Klêi kơ’nâi pơlât pâk trum pơlât dâng 18 hâi mê kơdrâi á hiăng chía tâ iâ châi, hiăng chiâng prôk lăm. Rơpŏng hngêi phiu ro ‘nâng’’.

Ia R’vê cho cheăm tơkăng kong hơngế má môi tơring Ea Súp, ƀă 6.800 ngế ối tung 28 hdroâng kuăn ngo nhŏng o rơtế rêh ối. Tơdroăng cheăng cheăng kâ pá puât pro tơdroăng rak ngăn ivá dêi kuăn pơlê ối pá puât. Tiô pôa Lê Văn Hoàng Lâm – Kăn hnê ngăn Vi ƀan cheăm Ia R’vê, mâu hơnăm hiăng hluâ, ƀơrô khăm pơlât khu lêng kuăn pơlê tơdjêp dêi đông mô đô̆i gâk tơkăng kong Ia R’vê hiăng pêi pro tro hnoăng cheăng khăm pơlât ăm kuăn pơlê tung tíu tơkăng kong.

Krê Thươ̆ng ŭy Hoàng Ngọc Linh hiăng tơdah châ hên tơdroăng tuăn pâ dêi vâi krâ kuăn pơlê mâu hdroâng kuăn ngo.

‘’Rơtăm Hoàng Ngọc Linh cho môi ngế ƀok thái pơkeăng tá hiâm mơno ƀă tơdroăng khăm pơlât ăm kuăn pơlê. Rêm roh châ vâi krâ kuăn pơlê pơkâ thế mê ôh tá pơtê pêi cheăng tá kơmăng mơhé troăng hơngế xuân prôk troh kum kuăn pơlê. Rơtế ƀă khăm pơlât, ngoh ối pơtâng tối kuăn pơlê mơgrúa châ chăn, hngêi trăng, pêi pro tơdroăng kâ tô ôu chên, pơtâng tối tơdroăng hbrâ mơdât pơreăng COVID-19 mơjiâng tơdroăng ki loi tơngah tung kuăn pơlê ƀă hía hé’’.

Ƀă tơdroăng mơ-eăm tung tơdroăng pêi cheăng, Thươ̆ng ŭi ngế lêng ƀok thái pơkeăng Hoàng Ngọc Linh hiăng châ hên râ, kơvâ cheăng diâp mâu kơxuô tơmeăm ki kơnía. Laga ƀă ngoh, tơdroăng ki phiu ro kân má môi cho châ khu pú, vâi krâ kuăn pơlê mâu hdroâng kuăn ngo nhuô̆m pâ loi tơngah, rơtế mơjiâng kơpong tơkăng kong kố rế hía rế thăm kro mơdrŏng.