VOV4.Xơ Đăng - Kơxo lơ 25/7, a pơlê kong kơdrâm Kon Tum po Tơdroăng tơpui tơno tơdrêng pơla Hô̆i đong vâi hdrêng ƀă Hô̆i đong hnê ngăn kong pơlê Kon Tum rôh má2 hơnăm 2022. Kố cho tíu tơdjâp ki kal vâ vâi hdrêng dêi kong pơlê châ tối mâu tơdroăng ki rơhêng vâ ƀă cho rôh vâ Hô̆i đong hnê ngăn kong pơlê xuân môi tiah rêm râ pơkuâ mơhno tối tơdroăng ki tơmâng, rak ngăn, hmâng rơkong tơpui dêi vâi hdrêng.

Jâ Nghe Minh Hồng,kăn phŏ hnê ngăn Hô̆i đong kong pơlêKon Tum tiâ mâu tơdroaqng ki mâu vâi o rơhêng vâ ‘nâi plĕng

A rôh tơpui tơno, 55 ngế o phô̆m vâ xông kân cho khu ki ối tung Hô̆i đong vâi hdrêng kong pơlê ƀă tơring hiăng pơtroh ăm Khu pơkuâ Hô̆i đong hnê ngăn kong pơlê Kon Tum 19 tơdroăng kơ-êng ki hên tơdroăng vâ mâu vâi o tơmâng ngăn, môi tiah xúa măng internet tiô túa ki tơniăn; tơdroăng ki pro pơlăm pơlôi a vâi hdrêng; rơhêng vâ châ ‘nâi mâu tơdroăng rêh ối; roê kế tơmeăm xúa tung hnê hriâm, hriâm tâp a mâu tíu ki hnê hriâm; mơdêk ki hlê plĕng dêi mâu nôu, pâ tung tơdroăng ki loi nhuô̆m hnoăng krê dêi vâi hdrêng ƀă hên ki ê. Hô̆i đong hnê ngăn, Vi ƀan hnê ngăn kong pơlê Kon Tum, teăng mâ mâu khu râ, kơvâ cheăng ki ai tơdjâk hiăng tơmâng, tiâ mơnhên, tơdrêng a mê xuân tơpui leăng, hnê mơhno hbrâ rơnáu tơ’nôm ăm mâu vâi o mâu tơdroăng ki rơkê ‘na kơvâ cheăng dêi tơná tơmâng ngăn ƀă tơdroăng ki pơkâ tơleăng tung tơdroăng rêh ối rêm hâi.

Katarina Nga tơplôu ƀă tơbleăng