Tung “Hngêi tơtô kong đoân’’ nếo pro klêi, ngoh Trần Đình Thu, khối 1, bêng Khánh Xuân, pơlê kong kơdrâm Ƀuôn Ma Thuột (Dak Lak) ôh tá kơtôa klâi tơdroăng phiu ro, rơrêk tung hiâm mơno. Tơdroăng rêh ối rơpŏng hngêi ngoh Thu xơpá, ngoh pêi cheăng rak ngăn hngêi trung râ má péa Trần Hưng Đạo, pơlê kong kơdrâm Ƀuôn Ma Thuột, kơxô̆ liăn khế kâ bú iâ, kơdrâi ngoh ôh tá ai cheăng pêi, péa ngế kuăn ối kŭn cho hơnăm ki dế vâ kâ hên.

16 hơnăm hdrối mê hía nah, rơpŏng ngoh ối tung a hngêi pơtân ki pro ăm mâu khu pú hên ối dêi hngêi trung. Klêi ‘măn kơdĭng iâ kơxô̆ liăn, hlối mung liăn nhŏng o, mê ngoh hiăng châ rôe tơnêi, ngoh hiăng châ Khu ngăn Pêi cheăng pơlê kong kơdrâm Ƀuôn Ma Thuột veăng kum 50 rơtuh liăn, ing liăn ‘măn kơdĭng vâ pro “Hngêi tơtô Kŏng đoân”. Ngế pơkuâ hngêi trung ƀă mâu thái cô tung hngêi trung hiăng veăng kum ăm mung liăn ôh tá xo rơkâ vâ ngoh ai tơ’nôm liăn châ mơjiâng pro hngêi ối krá tơniăn. Ngoh Trần Đình Thu tối:

“Á teăng mâ rơpŏng hngêi mơnê hnoăng Khu ngăn mơngế Pêi cheăng, khu thái cô tung hngêi trung hiăng veăng kum ăm á mung ƀă veăng kum a châ pro hngêi ối tơniăn, rơpŏng hngêi tá ‘nâi tối to lâi ki sôk ro tung hiâm mơno. Ing kố a vâ Khu ngăn mơngế Pêi cheăng tơmâng khât tâ nếo mâu ngế ki pá puât môi tiah á”.

Rơnó Hơngui Giáp Thìn hơnăm 2024 cho hơnăm ki apoăng nôu prế kuăn Trần Mai Hương Giang, bêng Ea Tam, pơlê kong kơdrâm Ƀuôn Ma Thuột châ tơdah Têt tung hngêi ối nếo tuăn pâ. Nâ Giang tối, ƀă kơxô̆ liăn kâ rêm khế dêi ngế cô hnê râ má môi, bú bê vâ xúa kâ tung rơpŏng hngêi ƀă ăm dêi péa ngế kuăn hriâm. Hên hơnăm hdrối mê hía nah, 3 ngế nôu kuăn rêh ối kơnôm tung hngêi hiăng ton dêi nôu pâ nâ.

Apoăng hơnăm 2023, nâ châ nôu pâ xing xoăng tơnêi ƀă Khu ngăn mâu ngế Pêi cheăng pơlê kong kơdrâm Ƀuôn Ma Thuột veăng kum iâ  kơxô̆ liăn vâ pro hngêi. Kơnôm ing mê, nôu kuăn nâ Giang  hiăng ai hngêi ối lĕm  ƀă hiăng hmiân tuăn pêi cheăng:

“Á pơtroh rơkong mơnê tâi tâng mâu ngế tung kong đoân hiăng veăng  tơlo  liăn, hnoăng ki veăng kum ngin kuăn nôu ai hngêi ối hmiân tuăn pêi cheăng’’.

Nếo xo 50 rơtuh liăn kơjo kum mơjiâng pro “Hngêi tơtô Kŏng đoân”  xua Khu xiâm ngăn mơngế Pêi cheăng kong pơlê Dak Lak diâp ăm, nâ H’Ngăm Niê, cô hnê hngêi trung mauh yăo Hoa Thủy  Tiên, cheăm Dliê Ya, tơring Krông Năng ôh tá kơtôa klâi ki sôk ro, rơrêk tung hiâm mơno. Nâ H’Ngăm ăm ‘nâi, hên hơnăm hdrối nah, rơpŏng hngêi nâ rêh ối tung môi toăng hngêi pro ƀă tâl, hâ ho hiăng tơ’nhiê há, ôh tá tơniăn tung rêh ối.

“Hngêi tơtô Kŏng đoân’’ pro ăm rơpŏng hngêi cho  tơmeăm ki kơnía ai pơxúa kân, kum rơpŏng hngêi vâ nâ ai tuăn tơmiât vâ mơ-eăm tâ nếo mơnhông dêi tơdroăng rêh ối:

“Mơnê mâu kăn râ kơpêng hiăng pro tơ’lêi hlâu ăm a châ xo liăn hâi kố.  A mơnê hên ‘nâng, vâ tối sap ing nah troh nôkố hâi hlo ai kơxô̆ liăn ki lâi kân môi tiah kố vâ kum pro hngêi. A tơmiât pro hngêi kơnâ dâng 90 rơtuh liăn tê. Pakĭng kơxô̆ liăn veăng kum, tung hngêi a ai dâng 15 rơtuh liăn tê klêi mê mung dêi vâi nâ o dâng 20 rơtuh liăn nếo’’.

Tơdroăng “Hngêi tơtô Kŏng đoân” cho môi tơdroăng pêi pro ai pơxúa khât ƀă tơdroăng rêh ối dêi mơngế pêi cheăng, mâu hơnăm hdrối, Khu ngăn mơngế Pêi cheăng kong pơlê hiăng hnê mơhno ƀă hnê ăm rêm râ Kŏng đoân lăm hnê, mơhnhôk veăng tơlo liăn ‘măn kơdĭng vâ pro  “Hngêi tơtô Kŏng đoân”. Riân sap hơnăm 2023 troh nôkố, Khu ngăn mơngế pêi cheăng  kong pơlê hiăng kum mơjiâng pro nếo ƀă ‘mâi rơnêu 129 toăng “Hngêi tơtô Kŏng đoân” ƀă kơxô̆ liăn 5 rơtal liăn. Jâ Nguyễn Thị Lý, kăn phŏ Khu ngăn mơngế pêi cheăng kong pơlê Dak Lak ăm ‘nâi, ing apoăng hơnăm troh nôkố, lâp tung kong pơlê hiăng pro nếo 27 toăng “Hngêi tơtô Kŏng đoân” vâ ăm mơngế tung Kŏng đoân, mơngế pêi cheăng ki kơtiê xơpá ‘na hngêi ối.

“Tung la ngiâ, Khu ngăn mơngế pêi cheăng kong pơlê kô pơtối hnê mơhno tơbleăng pêi mâu tơdroăng ki kal tung tơdroăng veăng tơmâng tŏng kum tơdroăng rêh ối, ki pơxúa tro luât tơxâng kum mơngế pêi cheăng ƀă mơdêk tăng kơxô̆ liăn veăng kum ing mơngế pêi cheăng vâ veăng kum mâu ngế pêi cheăng ki kơtiê. Má péa, cho pơtối pơhlêh nếo mâu tơdroăng veăng tŏng kum vâ tơtro ƀă tơdroăng púi vâ, tơdroăng kal vâ dêi mâu ngế pêi cheăng a pơlê cheăm, mâu tíu pêi cheăng, tung mê pơtối tơbleăng mơjiâng kơxô̆ liăn ‘măn kơdĭng vâ kum mâu ngế tung kŏng đoân, kŏng nhân mơngế ki pêi cheăng ăm tơnêi têa a Dak Lak vâ pêi tro tơdroăng mơjiâng  pro hngêi tơtô kŏng đoân’’.

Mâu hngêi châ mơjiâng pro tiô tơdroăng veăng kum “Hngêi tơtô Kŏng đoân’’ a Dak Lak hiăng kum hên mâu ngế pêi cheăng ki ối kơtiê xơpá châ rêh ối tơniăn, vâ vâi ai tuăn mơ-eăm tâ nếo tung tơdroăng rêh ối.