Lối 1 khế kố, riân sap hâi veh rêh ối tung hngêi tuăn pâ xua kơvâ cheăng kŏng an pro ăm jâ H’Wăn Ƀyă 56 hơnăm, ối a thôn 2, cheăm Ea Siên, pơlê krâm Ƀuôn Hồ xuân ối tâ tơdroăng ki hơniâp. Jâ tối, tơdroăng rêh ối dêi prế kuăn nôu ki hdrốu, kuăn ôh tá ai pâ, hên hơnăm kơnôm lăm ối hngêi vâi, 2 sào tơnêi bú bê pêi kâ, tơdroăng ai hngêi ối lĕm cho môi tiah pốu kơmăng.       

“Peăng kŏng an pro ăm hngêi ối a phiu ro ‘nâng. Sap ing lăm ối akố tâ dêi ivá mo há, tuăn ngoâ hơniâp, ôh tá tôu tuăn ‘na hngêi ối. Á hiăng krâ, ôh pá ai ivá pêi cheăng, ôh tá kâi pêi lo liăn vâ mơjiâng pro hngêi ối. Kơnôm môi pâ, ối to a hngêi puk pâk  tá chiâng ôh há. Mơnê mâu kŏng an ƀă rêm râ kơvâ cheăng’’.

Xuân ai tơdjuôm tơdroăng phiu ro drêng châ ối tung hngêi nếo mê, pôa Trần Anh Dũng, 58 hơnăm, ối a thôn 3, cheăm tơkăng kong Ea Bung, tơring Ea Sup, kong pơlê Dak Lak tối:

“Hơnăm 1980 rơpŏng hngêi a lo ing Đà Nẵng lăm rêh ối pêi cheăng kâ a Ea Sup. Xua xơpá thế ối tung hngêi pro ƀă loăng tâl hiăng tơ’nhiê ki rơdâ hâi troh 20m2, kong mêi kơchoh, kong tô to kơtâk tơnêi. Châ Kŏng an tơring Ea Sup ƀă rêm râ kơvâ cheăng pro ăm hngêi lĕm, nôkố ai hngêi ối tơdroăng rêh ối ôh tá tô tuăn xâu hngêi kơchoh drêng kong mêi, kơtâk tuih mot drêng kong tô, rơpŏng hngêi tâ phiu ro’’.

Ea Súp cho tơring ki apoăng a Dak Lak pê klêi tơdroăng pơkâ pơcháu mơjiâng pro 80 toăng hngêi ăm mâu rơpŏng kơtiê hdrối vâ troh kong mêi têa lân lu. Đăi ŭi Hoàng Thế Quang, Đô̆i trương đô̆i tăng ‘nâi plĕng, Kŏng an tơring Ea Súp tối tơdroăng hmâ pêi cheăng:

“Kŏng an tơring hiăng pơkâ thế mâu tíu pêi cheăng ăm tơmeăm xuân môi tiah khu ‘no liăn mơjiâng pro mung hdrối mâu tơmeăm vâ mơjiâng pro hngêi ƀă kum liăn mơhá hnoăng pêi hdrối, vâ teăm tiô tơdroăng pơkâ mơjiâng pro hngêi ƀă kum mâu rơpŏng hngêi’’.

Dak Lak cho kong pơlê ai pơ’leăng mâ mơngế hên má môi Tây Nguyên ai 1,95 rơtuh ngế, 49 hdroâng kuăn ngo nhŏng o rơtế rêh ối ƀă. Kơxô̆ rơpŏng kơtiê dêi kong pơlê nôkố vâ chê 8%. Gum mâu rơpŏng hngêi kơdroh ki xơpá, ing tơdé măng tĭng khế 3/2024, Khu xiâm kŏng an tơbleăng tơdroăng tơkêa bro 1.200 toăng hngêi tuăn pâ a Dak Lak. Rêm toăng hngêi kơnâ 80 rơtuh liăn, tung mê khu xiâm kŏng an veăng kum 50 rơtuh liăn, mâu kăn kong pơlê veăng kum ki u ối; Khu xiâm kŏng an mâu tơring, pơlê pơla veăng kum.

Hngêi pro tiô túa 36B (Khu xiâm kŏng an), rơdâ 36m2, ƀă mơnât prik, a ‘ngêi lêm tôl, bo hngêi pro ƀă meăm a ‘nâi lêk gât men cho gât chí. Tiô Thiếu tướng Lê Vinh Quy - Ngế pơkuâ Kŏng an kong pơlê Dak Lak, troh nôkố, lâp tung kong pơlê hiăng pro klêi vâ chê 500 toăng hngêi pơcháu ăm kuăn pơlê ối.

Nôkố Kŏng an mâu tơring, pơlê kong krâm, pơlê kong kơdrâm dế thâ mơjiâng pro vâ rĕng hngêi tâi tâng mâu hngêi tiô pơkâ hdrối hâi lơ 30.10/2024:

“Ngin tơrŭm ƀă mâu tíu pêi cheăng, kơvâ cheăng, mâu kăn dêi mâu cheăm, tơring ƀă hnê tăng hên mơngế a pơlê cheăm veăng pêi, ƀă mâu tơmeăm pro hngêi  ăm kuăn pơlê. Pakĭng hngêi pro krá lĕm, kŏng an kong pơlê xuân pơkâ thế kŏng an mâu cheăm tơring thế rĕng mơjiâng pro klêi vâ rĕng châ pơcháu hngêi ăm mâu rơpŏng hngêi, pro tơ’lêi hlâu vâ kuăn pơlê hmiân tuăn pêi cheăng kâ”.

Vâ mơjiâng pro 10 toăng hngêi tuăn pâ ăm mâu rơpŏng ai hnoăng mơhno ki tơmâng khât dêi khu xiâm kŏng an ƀă kuăn pơlê kong pơlê Dak Lak. Tơdroăng pro mê hiăng veăng kum ai pơxúa tơniăn tơdroăng rêh ối, mơjiâng thôn pơlê nếo, mơhnhôk tâi “Tâng kuăn pơlê kring tơniăn Tơnêi têa’’: pêi pro tơdroăng cheăng vâ troh  leh tơbâ 120 hơnăm Hâi mơjiâng kong pơlê Dak Lak.

Hdrối mê, Kŏng an kong pơlê Dak Lak ƀă Kŏng an tơring Čư̆ Kuiñ  xuân hiăng tơrŭm ƀă mâu kăn kong pơlê hiăng po leh pơxiâm pro “Hngêi tuăn pâ” ăm on veăng ngoh Trần Quốc Thắng Kŏng an kuăn pơlê ki ai hnoăng, cho kăn ƀô̆ cheăm Ea Tiêu hiăng hlâ tung rôh khu ‘mêi pro ôh tá tơniăn hâi lơ 11/6.

Pêi pro tiô troăng dêi Đảng, Tơnêi têa ƀă Khu xiâm Kŏng an ‘na tơdroăng rak ngăn mâu ngế tro rong, rơpŏng ai ngế hlâ ai hnoăng, mâu ngế ai hnoăng ƀă kăch măng, tung mâu hơnăm hdrối mê hía nah, Liăn ‘măn kơdĭng kum vâi pú Khu xiâm Kŏng an; Liăn ‘măn kơdĭng kum vâi pú dêi Kŏng an kong pơlê Dak Lak ƀă liăn veăng to, liăn veăng kơjo kum dêi mâu lêng Kŏng an tung lâp tơnêi têa hiăng veăng tơlo kum, veăng kơjo kum iâ 500 rơtuh liăn vâ pro “Hngêi tuăn pâ” ăm on veăng nôu pâ Thiếu tă Trần Quốc Thắng ngế ki hlâ ai hnoăng tơnêi têa.