Thiê̆u tă Vũ Hồng Hiến phân đô̆i trương Đô̆i K51 tối ăm ‘nâi, tíu ki lăm ti tăng chiâ xo tơkŭm kơxêng kiâ mô đô̆i a tơnêi kong têa Kul cho ngo ngối prôk lăm pá puât, ki hên cho prôk chêng, ai tíu bu prôk ƀă troăng têa kroăng. Pakĭng mâu tơmeăm râng kŏng, rêm ngế lêng tung khu djâ tơmeăm kâ ăm 7 – 10 hâi. Tung troăng prôk rơpâu km ti tăng kơxêng kiâ mô đô̆i, ai hên roh prôk ôh tá châ tơƀrê ki klâi, laga xuân ai mâu roh prôk mơhúa, rế ti tăng châ tơnâp khu mô đô̆i, rế ti tăng châ hên tơmeăm tơbâ mâu mô đô̆i hlâ tung tơplâ xâ nah.

“Prôk krê, môi tiah mê 2,3 ngế nhŏng o. Drêng á chiâ kui, hlo kế luô̆m dêi mâu mêh mê hâk ‘nâng. Kố, kố meh kố! Drêng hlo tâ rơrêk tung châ laga vâ tơpui tối ƀă rơkong cho pá. Châ khât drêng chiâ tơnâp dêi mâu meh, ai mâu mêh u ối iâ kơxêng, tơmeăm vế tung châ, ki ê ôh tá ai ki klâi xếo, bu ối iâ tung mê cho mâu tơmeăm ton nah. Mê cho tơdroăng ki châi hiâm’’.

Rơtế ƀă tơdroăng ti tăng, chiâ xo, tơkŭm kơxêng kiâ mô đô̆i, kăn ƀô̆, mâu lêng Đô̆i K51 Dak Lak ối pêi lĕm tro tơdroăng pơtâng tối mơhnhôk tung tíu pro đông ƀă tơdroăng tơpui ƀă kong têa ê ‘na tơdroăng cheăng lêng, tơpui ƀă khu râ kăn pơkuâ, pêi pro lĕm tro tơrŭm ƀă kuăn pơlê kong têa pú hmâ. Mâu ngoh đi đo tŏng gum, kuăn pơlê kong têa pú hmâ hiăng tơdroăng lăm pôu, diâp kơxuô tơmeăm, khăm pơlât ƀă xing xoăng pơkeăng ăm kuăn pơlê. Ing mê, hên kuăn pơlê hiăng tối ăm Khu mô đô̆i hên tơdroăng ki kơnâ. Thiê̆u tă Nguyễn Văn Duẩn, đô̆i viên Đô̆i K51 tối:

“Kuăn pơlê vâi rŭm ƀă pin vâ tối ăm pin, tŏng kum, hên roh vâi ối mơhnhôk nhŏng o rơtế veăng ti tăng ƀă tŏng kum Khu mô đô̆i vâ ti tăng châ kơxêng kiâ mô đô̆i ki hlâ a tơnêi têa pú hmâ Kul. Hên kuăn pơlê drêng ngin ti tăng kơxêng kiâ mô đô̆i mê vâi tâ rơrêk, ƀă drêng vêh vâi ối pâ. Drêng ngin troh vâi tâ môi tiah nhŏng o, môi tiah nah cho mô đô̆i Pôa Hồ troh kum kuăn pơlê Khmer hluăn ing hlâ long mơngế Polpot’’.

Đô̆i K51 ai hnoăng ti tăng tơkŭm kơxêng kiâ mô đô̆i a kơpong 4 tơring Batchanda, Conhet, Keosama, Orang ƀă pơlê kong kân Senmonorum ối tung kong pơlê Mundulkiri, kong têa Kul. Kố cho kong pơlê kong ngo, tơnêi kân rơdâ, troăng prôk lăm pá puât, kong prâi ôh tá tơniăn. Thươ̆ng tă Trịnh Ngọc Kiệm, Đô̆i trương Đô̆i K51 tối ăm ‘nâi, bu kal ‘nâi iâ tơdroăng, mehé ối a hơngế hrĭng km, Khu mô đô̆i kô lo prôk hlối.

“U lâi ai tơdroăng mê a mê ai mâ kăn ƀô̆ mô đô̆i, hmâ vâ tiah lâi mơ-eăm tơkâ hluâ pá puât, vâ mơnhên, ti tăng plĕng, tơkŭm ƀă ‘nâi mâu tơdroăng. Drêng tâ, chiâ hlo, tăng hlo kơxêng dêi kăn ƀô̆ mô đô̆i hlâ tung tơplâ xâ mê tŭm tơdroăng tơƀrê, mâu tơdroăng pá puât châ tơbêng ăm’’.

Tung pơla 23 hơnăm mơ-eăm ti tăng khu pú a kong têa pú hmâ Kul dêi Đô̆i K51 hiăng djâ châ 746 kơxêng kiâ mô đô̆i djâ vêh a tơnêi nôu Việt Nam. Jâ H’Yim Kdoh, Kăn phŏ hnê ngăn Vi ƀan kong pơlê Dak Lak mơnhên, mâu tơdroăng mơ-eăm ƀă tơdroăng châ tơƀrê ti tăng tung pơla kố nah dêi Đô̆i K51 hiăng kum hên pro kơdroh mâu tơdroăng châi hía ƀă nhŏng o mâu rơpŏng mô đô̆i hlâ tung tơplâ xâ nah; mơhno hiâm mơno ‘’Pâ hnoăng dêi mơngế ki ai hnoăng’’, ‘’Pâ hnoăng mơngế ki hiăng pêt mơjiâng tơmeăm’’ dêi hdroâng kuăn ngo pin, djâ ki pơxúa kơnâ rơkê trâu hơngế.

“Hâk tơngăm ƀă nhuô̆m mâu tơdroăng mơ-eăm dêi nhŏng o. Á loi tơngah khât ƀă tơdroăng tơmâng kân má môi ing Khu pơkuâ hnê ngăn cheăng Đảng kong pơlê, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n Tơnêi têa Việt Nam kong pơlê ƀă ki rơhêng vâ tối cho mâu tơdroăng tuăn pâ trâu hơngế dêi mâu hdroâng kuăn ngo tung kong pơlê ăm kăn ƀô̆ mâu lêng Đô̆i K51 ôh tá xê to tơdroăng tuăn pâ, tơdroăng hâk pâ, loi tơngah mê thăm nếo cho tơdroăng pói tơngah vâ vâi pêi pro hnoăng cheăng krih tơviah a tơnêi pú hmâ’’.

Ƀă hnoăng cheăng krih tơviah kân, mâu ngế lêng dêi Đô̆i K51 Dak Lak hluâ to lâi rơxông đi đo tơkâ hluâ pá puât. Mâu tơdroăng pêi ki ôh tá pơ’lok, hên tơdroăng pá puât, laga hâk tơngăm dêi kăn ƀô̆, mâu lêng Đô̆i K51 ai tá mâu têa kơxôu tá mâu têa mâ hơniâp ro drêng tăng châ kơxêng kiâ dêi mâu meh, mâu ngoh vâ djâ vâi vêh ƀă tơnêi nôu.