Mơdoh hên chôu phut tí tăng ‘nâi mâu tơdroăng ki kal dêi Hneăng hôp má 4, Kuô̆k hô̆i hneăng 15, pôa Võ Tấn Tài, Kăn phŏ hnê ngăn Khu tơrŭm cheăng dêi kong pơlê Dak Lak, cho Ngế ki ngăn ‘na hdroâng kuăn ngo - ngăn ‘na tơdroăng khôp cheăng tung Khu hnê mơhno Tây Nguyên hneăng hdrối nah phiu ro ƀă tơdroăng ki ai 94,38% mâu kăn Kuô̆k hô̆i vâ môi tuăn tơdroăng pơkâ ki mơjiâng pro mâu troăng hơlâ, túa tơdjâ ki xiâm vâ mơnhông pơlê kong kơdrâm Ƀuôn Ma Thuột, kong pơlê Dak Lak châ mơhno tơbleăng nhên.

Pôa Võ Tấn Tài ăm ‘nâi:

“Cho môi ngế kuăn pơlê dêi pơlê kơdrâm Ƀuôn Ma Thuột ngin hlo phiu ro ‘nâng tơdroăng tŏng kum dêi Đảng ƀă Tơnêi têa ƀă tơdroăng mơnhông pơlê kong kơdrâm Ƀuôn Ma Thuột. Ngin ai tơmiât tiah kố, Ƀuôn Ma Thuột tối krê ƀă Dak Lak tối tơdjuôm klêi kơ’nâi châ Kuô̆k hô̆i tối tơbleăng tơdroăng cheăng kal athế tơ-uân hâi khế vâ tŏng kum tơ’lêi hlâu ƀă mơnhông ki kodo mơ-eăm dêi tơná tung pơkâ mâu troăng hơlâ, troăng prôk vâ tơtro tung tơdroăng mơdêk rêm kơvâ cheăng ki ai ivá tơdjuôm mơjiâng pơlê kong kơdrâm Ƀuôn Ma Thuôt păng ‘nâng cho tíu xiâm”.

Tiô pôa Thái Hồng Hà, Kăn pơkuâ ngăn ‘na mơhno túa lĕm tro, ivá ƀă ôm hyô kong pơlê Dak Lak tối: Tơdroăng pơkâ mê châ tơbleăng mơhno hiăng ai tơdjâk troh mâu tơdroăng pơkâ ki xiâm tiô kơ tơdroăng pơkâ, troăng tơdjâ ki xiâm ƀă pơlê kong kơdrâm Ƀuôn Ma Thuột, kong pơlê Dak Lak ‘na pơkuâ rak ngăn liăn ngân dêi tơnêi têa; xing xoăng hnoăng pơkuâ ngăn tơnêi têa tung kơvâ pơkâ hdró; kơjo tơ’mot tơdroăng mơ’no liăn cheăng ăm mâu khu ki hriăn plĕng, mâu ngế hriăn ‘na khoa hok ƀă mơngế ki rơkê păng ‘nâng.

Xua mê, pôa Thái Hồng Hà pói tơngah:

“Kuô̆k hô̆i hiăng tốí tơbleăng hnoăng cheăng xiâm, tơdroăng túa cheăng mê cho ‘ló phiu ro păng ‘nâng. Mê xuân cho tơdroăng ki hơniâp ro, cho ki xiâm, cho tơdroăng ki mơnhên vâ ing mê, kơdo mơ-eăm mơjiâng tro tiô tơdroăng mơgêi hôp kơxô̆ 67 dêi Khu xiâm ngăn cheăng kal kí ƀă tơdroăng pơkâ kơxô̆ 103 chôa mơnhông pơlê kong kơdrâm Ƀuôn Ma Thuột chiâng tíu xiâm dêi kơpong tiô tơdroăng pơkâ 23 nếo achê pơla kố”.

            A hneăng hôp tiah hmâ rêm khế a khế 10 dêi Vi ƀan hnê ngăn kong pơlê Dak Lak pôa Phạm Ngọc Nghị, Kăn hnê ngăn Vi ƀan kong pơlê hiăng pâ thế mâu khu râ, kơvâ cheăng, rêm râ tí tăng plĕng mơnhên hlối tơdroăng cheăng xiâm ki nếo châ Kuô̆k hô̆i tối tơbleăng vâ pơlê kong kơdrâm châ pêi pro tro tiô hnoăng cheăng tung pơkuâ ngăn dêi tơnêi têa ƀă tơdroăng ki mơjiâng kơphô̆, kum ăm kuăn pơlê tơ’lêi hlâu tâ.

Pôa Phạm Ngọc Nghị tối nhên:

“Pakĭng mâu tơdroăng ki tối tơbleăng mê pâ thế pó athế ‘nâi nhên tŏng kum vâ ăm tơdroăng pơkâ ki mơnhông pơlê kong kơdrâm Ƀuôn Ma Thuột châ tối tơbleăng klêi mê, pin athế tí tăng mơnhên ngăn tơdrêng tơdroăng ki pơkâ hơnăm 2023 ăm troăng mơnhông Ƀuôn Ma Thuột ƀă hên mâu tơdroăng pơkâ dêi Chin phuh, dêi Khu xiâm Đảng ƀă Vi ƀan hnê ngăn athế rĕng pêi pro klêi tơniăn dêi hnoăng cheăng tơná”.