VOV4.Xơ Đăng - Rơtế ƀă hnoăng cheăng rak vế krá tơniăn kơpong tíu tơkăng dêi tơnêi têa, hên hơnăm hdrối mê hía nah, mâu ngế lêng krâ kơlŏng ngiât pêi cheăng a mâu tơring kong ngo kong pơlê Quảng Nam ối kum kuăn pơlê hdroâng kuăn ngo mơnhông cheăng kâ, xut tah hrâ mơnguâ kơtiê xơpá. Ƀă vâi krâ nhŏng o a tíu kố, kăn ƀô̆, lêng Mố đô̆i gâk tơkăng kong sap ing ton nah chiâng mâu ngế kuăn dêi pơlê, hiâm mơno hơ-ui ơla khu lêng ƀă kuăn pơlê rế hía rế trâu. Ngế chêh hlá tơbeăng cheăng tung Rơ’jiu Việt Nam ai ƀai chêh ‘na tơdroăng mê.

To lâi khế kố, kăn ƀô̆, mâu lêng Khu mơhnhôk kuăn pơlê, Đông mô đô̆i gâk tơkăng kong La Êê, tơring Nam Giang pơhlêh dêi pó troh hngêi nâ Blúp Út, ối a thôn Đắc Ngol, cheăm La Êê hnê mơhno rơpŏng nâ pro kơdroăng păn, păn chu prăng pơlê. Nâ Blúp Út tối ăm ‘nâi, hdrối nah rơpŏng ối tung rơpŏng pá puât dêi cheăm, tơdroăng rêh ối kơnôm to pêi chiâk deăng. Ôh tá hêng kơklêa kơtiê, nâ khên tơnôu mung liăn ing Hngêi arak liăn kum rêh ối pơlê pơla rôe tơpéa to chu hdrê păn, tơdrêng amê pế drôu pông hdrôu chê̆m chu. Kơdĭng kơxô̆ liăn, nâ po rơdâ tơdroăng păn chu tâk 15 to klêi mê 20 to. Laga, tá hâi plĕng hên túa ki rơkê tơtro tung păn mơnăn mơnôa xua mê khu chu drêng tro tâ pơreăng, hrá kân. Hlê plĕng tơdroăng mơ-eăm hlŭn ing kơtiê dêi nâ Blúp Út, Đông mô đô̆i gâk tơkăng kong La Êê hiăng pơtroh kăn ƀô̆, mâu lêng troh a hngêi, hnê mơhno nâ mơjiâng  troăng păn chu prăng pơlê.

Kăn ƀô̆, mô đô̆i Gâk tơkăng kong kong pơlê Quảng Nam rơtế kum kuăn pơlê mơnhông mơdêk cheăng kâ, xăm kơklêa kơdroh kơtiê krá tơniăn

Mâu ngoh mô đô̆i rơtế rơpŏng nâ mơjiâng kơdroăng păn krúa lĕm, hbrâ tơmeăm chê̆m ăm khu chu ƀă hía hé. Nâ Blúp Út tối:

            ‘’Vâi xuân tối á thế mơgrúa krúa lĕm, drêng chiê chu priêt ăm chu kâ thế tâm chu priêt ƀă po iốt ƀă kơxuô pló ăm chu kâ vâ chu ôh tá châi klêa. Đông mô đô̆i gâk tơkăng kong La Êê xuân troh a hngêi tŏng kum ƀă pơchân tối á.

            Đông mô đô̆i gâk tơkăng kong La Êê pôu râng hnoăng pơkuâ lối 35 km troăng tơkăng kong ối tung 2 cheăm La Êê ƀă Chơ Chun, tơring Nam Giang, kong pơlê Quảng Nam. Kố cho péa cheăm hơhngế má môi, pá puât má môi dêi tơring Nam Giang, kuăn pơlê ki hên cho vâi krâ kuăn pơlê Cơ Tu, Ve – Tà Riềng, tơdroăng rêh ối kơnôm ti pêi chiâk deăng. Pêi pro hnê mơhno dêi Mô đô̆i gâk tơkăng kong kong pơlê Quảng Nam, rêm hơnăm, Đảng ŭy Đông mô đô̆i gâk tơkăng kong La Êê mơjiâng pơkâ pêi, xing xoăng kăn ƀô̆, mô đô̆i pơkuâ kơpong, kum rơpŏng pá puât hlŭn ing kơtiê. Tung  mê, rêm đảng viên ối tung Khu mơhnhôk kuăn pơlê tơdah tŏng kum sap ing 5 troh 7 rơpŏng, kăn ƀô̆, kăn pơkuâ đông kum sap ing 3 troh 5 rơpŏng. Mâu troăng pêi kum kuăn pơlê mơnhông mơdêk cheăng kâ châ Đảng ŭy Đông mô đô̆i gâk tơkăng kong La Êê tơrŭm ƀă khu râ kăn pơkuâ thôn pơlê, cheăm mơjiâng tơtro ƀă tơdroăng nôkố ƀă tơdroăng rêh ối dêi kuăn pơlê a kố môi tiah: pêt báu klâng, păn chu prăng pơlê, í, peâp, pêt mâu loăng plâi kâ môi tiah krui ngeăm, krui ƀŏng ƀă hía hé.

Mô đô̆i gâk tơkăng kong tơrŭm ƀă Khu râ kănpơkuâ mơjiâng tơtro ƀă tơdroăng rêh ối dêi kuăn pơlê kơpong tơkăng kong

Thiê̆u tă Tôn Ui, Kăn phŏ cheăng kal kí Đông mô đô̆i gâk tơkăng kong La Êê, tơring Nam Giang, kong pơlê Quảng Nam tối ăm ‘nâi, tung mâu hơnăm hiăng hluâ, a 2 cheăm La Êê ƀă Chơ Chun hiăng ai 16 rơpŏng hlŭn ing kơtiê ing mâu troăng pêt mơjiâng tơmeăm khoăng, păn mơnăn mơnôa xua Đông hnê mơhno pêi pro:

            ‘’Ngin mơnhên pêi krá tơniăn chôa ‘lâng, ôh tá pêi kân rơdâ. Ngin troh rêm rơpŏng, hnê mơhno troăng mơnhông mơdêk cheăng kâ, tơkŭm nôkố cho păn chu prăng, í, peâp, pêt mâu loăng plâi kâ ton hơnăm, plâi kâ’’.

            Ing tơdroăng tŏng kum dêi kăn ƀô̆, mâu mô đô̆i, hơnăm hiăng hluâ, a 2 cheăm La Êê, Chơ Chun ai 22 rơpŏng hlŭn ing kơtiê, kơxô̆ rơpŏng kơtiê cheăm La Êê kơdroh ối lối 31%, cheăm Chơ Chun ối vâ chê 38%. Pôa Zơ Râm Huấn, Kăn pơkuâ hnê ngăn cheăng Đảng cheăm La Êê mơnhên, ôh tá xê to pêi pro tơtro hnoăng cheăng gâk kring tơkăng kong tơnêi têa, kăn ƀô̆, mô đô̆i Đông gâk tơkăng kong La Êê ối cho tíu hguôn krá tơniăn ăm vâi krâ kuăn pơlê mâu hdroâng kuăn ngo kơpong kong ngo, tíu tơkăng kong Nam Giang:

            ‘’Đảng ŭy Đông mô đô̆i gâk tơkăng kong La Êê pêi pro tơdroăng đảng viên ‘na tơkŭm hôp a mâu chi ƀô̆ thôn ƀă xing xoăng hnoăng cheăng tŏng kum ăm mâu rơpŏng, ki rơhêng vâ tối tŏng kum tung tơdroăng xăm kơklêa kơdroh kơtiê krá tơniăn. Hnê mơhno kuăn pơlê xúa khoa hok kih thuât tung păn mơnăn mơnôa. Ki rơhêng vâ tối cho tung păn mơnăn mơnôa, mơdêk pêt mơjiâng tơmeăm khoăng, pêt báu klâng’’.

            Pêi pro tơdroăng ‘’Đông cho hngêi, tơkăng kong cho pơlê xiâm, kuăn pơlê mâu hdroâng kuăn ngo cho nhŏng o xiâm’’, kăn ƀô̆, mô đô̆i gâk tơkăng kong kong pơlê Quảng Nam đi đo ối achê kuăn pơlê, ối tung pơlê, rơtế kum kuăn pơlê mơnhông mơdêk cheăng kâ, xăm kơklêa kơdroh kơtiê krá tơniăn. Mô đô̆i gâk tơkăng kong pơlê Quảng Nam xuân mơhnhôk kơxô̆ liăn mơjiâng vâ chê 300 toăng hngêi Rŭm môi tuăn, Hngêi hơtôu ăm mơngế kơtiê tíu tơkăng kong, rơlốu rơtế hrĭng tơmeăm kum kuăn pơlê, tŏng kum rơpâu to kơpôu, ro, chu, í, peâp ƀă kơxô̆ liăn chât rơtal liăn./.

VOV peăng tơdế tơnêi têa chêh