A cheăm Snay Anhchit, tơring ChumKiri, kong pơlê Kampot, kong têa Kul, kuăn pơlê rêh ối kơnôm to pêi chiâk deăng, kơtăn hơngế tíu xiâm xua mê tơdroăng rêh ối ‘na kế tơmeăm khoăng, hiâm mơno ƀă tơdroăng rak ngăn ivá tá hâi ai tŭm ƀă trâm hên pá puât, ôh tá ai tŭm tơmeăm. Jâ Chanol hlo mô đô̆i Việt Nam troh khăm pơlât, xing xoăng pơkeăng tê kơtê ăm jâ ƀă kuăn pơlê a tíu kố, jâ rơrêk tung hiêm mơno:

‘’Á ai tơdroăng châi hên laga ôh tá ai liăn ngân vâ pơlât, nôkố drêng tâng ai khu ƀok thái pơkeăng dêi Khu pơkuâ mô đô̆i kong pơlê Kiên Giang troh khăm pơlât ƀă xing xoăng pơkeăng, xing xoăng kơxuô tơmeăm ăm kuăn pơlê a kố, á phiu ro ‘nâng. Á pâ mơnê hên ‘nâng’’.

Tơdroăng pêi pro hnoăng cheăng, khu pêi cheăng trâm hên pá puât ‘na kong prâi, rơxế to vâ prôk lăm, nâl tơpui, laga ƀă tơdroăng pá puât dêi vâi krâ kuăn pơlê tơnêi têa pú hmâ, rêm ngế tung khu mơhnhôk dêi pó ôh tá bê tơmâng pá puât vâ pêi kêi đeăng hnoăng cheăng. Rơkong tơpui tối dêi ƀok thái pơkeăng Trần Thu Quỳnh, pêi cheăng a Hngêi pơkeăng kân Kiên Giang:

‘’Á tâ tô tuăn, ôh tá ‘nâi ti lâi xua roh apoăng á lăm pêi cheăng khăm pơlât a kong têa pú hmâ. Mơhé ối hên pá puât tung tơdroăng prôk lăm, pơkeăng xuân môi tiah tơmeăm vâ khăm pơlât, laga lăm a kố á hlo tơdroăng khăm pơlât dêi vâi krâ kuăn pơlê a kố ối trâm hên pá puât, á cho ƀok thái pơkeăng rơtế ƀă mâu ngoh nâ pêi cheăng khăm pơlât tung khu xuân mơ-eăm tâi ivá tơná vâ kum khăm pơlât ăm vâi krâ kuăn pơlê a kố, xuân môi tiah kum kơdroh pá puâ ăm kơvâ khăm pơlât a kố’’.

Thiê̆u tă Hoàng Trọng Thiên, kăn pơkuâ hngêi pơkeăng cheăm khu pơkuâ mô đô̆i kong pơlê Kiên Giang tối ăm ‘nâi:

‘’Tối tơdjuôm hâi khế hbrâ xuân ối tơvâ tơvân, tá hâi tơniăn laga nhŏng o xuân mơ-eăm ƀă troh a tíu mê châ tơmâng tŏng kum dêi đông lêng pú hmâ xuân môi tiah kuăn pơlê kơpong đông pú hmâ pro đông, roh lăm khăm pơlât châ tơƀrê lĕm’’.

A kố, khu thái pơkeăng, ƀok thái pơkeăng Khu xiâm pơkuâ mô đô̆i kong pơlê Kiên Giang hiăng khăm ƀă xing xoăng 300 hnoăng pơkeăng tê kơtê ăm kăn ƀô̆ ƀă kuăn pơlê a tíu kố, rêm kơxuô pơkeăng kơnâ 100 rơpâu liăn. Tơdrêng amê a rêm tíu troh khăm pơlât ƀă xing xoăng pơkeăng, khu xuân hiăng diâp 60 kơxuô tơmeăm ăm mâu rơpŏng ai tơdroăng rêh ối pá puât, rêm kơxuô tơmeăm kơnâ 500 rơpâu liăn.

Tơdroăng pêi kơpêng mê hiăng lôi ăm hên tuăn pâ lĕm ƀă khu râ kăn pơkuâ pơlê ƀă vâi krâ kuăn pơlê kong têa pú hmâ ‘na um méa mơngế mô đô̆i Việt Nam tung rơxông hơniâp lĕm. Jâ Sui Kết, kuăn pơlê tơring Chumkiri, kong pơlê Kam Pốt tối:

“Á  phiu ro ‘nâng châ khu thái pơkeăng, ƀok thái pơkeăng troh diâp kơxuô tơmeăm ƀă khăm pơlât, xing xoăng pơkeăng tê kơtê, ôh tá ai ki lâi kâi pơchông ƀă, tâng ai roh kơ’nâi ah pơtối troh kum ngin môi xôh nếo, xua tung pơla kố, ngin dế trâm hên pá puât, mơhé kơxuô tơmeăm iâ laga hiăng kum ngin ai tơmeăm vâ kâ drêng pá puât kố’’.

Sap hơnăm 2015 troh nôkố, Khu xiâm pơkuâ Mô đô̆i kong pơlê Kiên Giang hiăng tơkŭm po 6 khu khăm pơlât ƀă xing xoăng lối 3.500 kơxuô pơkeăng ăm kuăn pơlê a hên cheăm, tơring ối trâm hên pá puât a kong têa Kul ƀă  kơxô̆ liăn lối 400 rơtuh liăn. Rêm rơkong kơ-êng tá hiâm mơno, rêm kơxuô pơkeăng châ diâp cho mâu tơdroăng tuăn pâ thăm pro rŭm môi tuăn pơla khu lêng ƀă kuăn pơlê péa tơnêi têa. Đăi tă Tếp Âm, Kăn pơkuâ phŏ tiêuh khu Khu lêng Kampot tối ăm ‘nâi:

‘’Châ tơdroăng xing xoăng hnoăng cheăng dêi khu râ kăn kơpêng ăm á tơrŭm ƀă khu ƀok thái pơkeăng ki pleăng hnoăng cheăng Kiên Giang troh khăm pơlât, xing xoăng pơkeăng ƀă diâp kơxuô tơmeăm. Ing tơdroăng tơrŭm ƀă khu râ kăn pêi cheăng dêi kong pơlê, Đô̆i pêi cheăng K92, khu pêi cheăng hiăng troh xing xoăng pơkeăng tung cheăm Snay Anh Chít. Á sôk suâ, phiu ro ƀă mơnê khu thái pơkeăng, ƀok thái pơkeăng dêi kong pơlê Kiên Giang hên’’.

Tơdroăng tơkŭm po khu thái pơkeăng, ƀok thái pơkeăng troh khăm pơlât ƀă xing xoăng pơkeăng tê kơtê ăm vâi krâ kuăn pơlê cheăm Snay Anhchit cho tơdroăng pêi ki kơnâ dêi khu lêng kong pơlê Kiên Giang, kum rơtế khu râ kăn pơkuâ, pơlê dêi kong têa pú hmâ rak ngăn tơdroăng rêh ối kuăn pơlê. Ing mê xuân pro tơ’lêi hlâu ăm vâ đô̆i K92 nôkố dế ti tăng chiâ xo kơxêng kiâ mô đô̆i ki pleăng hnoăng cheăng ƀă mơngế ki rơkê Việt Nam hlâ a tíu tơplâ a kong têa Kul kêi đeăng lĕm hnoăng cheăng châ pơcháu, djâ mâu pú, khu mô đô̆i hiăng hlâ vêh ƀă tơnêi xiâm. Kố xuân cho roh vâ thăm krá tơniăn tơdroăng rŭm môi tuăn, rak krá tơniăn ƀă thăm tơrŭm tâ mê nếo tơrŭm cheăng pơla 2 kong pơlê Kiên Giang ƀă Kam Pot tối krê, pơla tơnêi têa ƀă kuăn pơlê Việt Nam – Kul tối tơdjuôm. Đăi tă Cao Minh Tâm, Kăn phŏ pơkuâ cheăng Đảng Khu xiâm pơkuâ mô đô̆i kong pơlê Kiên Giang tối ăm ‘nâi tơ’nôm:

‘’Tơdroăng tơkŭm po xing xoăng pơkeăng ƀă diâp kơxuô tơmeăm ăm kuăn pơlê a kong pơlê Kampot dêi Khu xiâm pơkuâ lêng kong pơlê ƀă Hngêi pơkeăng kân kong pơlê Kiên Giang ƀă pơkâ xiâm pro tơ’lêi hlâu má môi vâ rak ngăn ăm tơdroăng rêh ối kuăn pơlê tung kong pơlê Kampot tối tơdjuôm ƀă tơring Chumkiri tối krê vâ thăm tơrŭm tâ mê nếo tơrŭm cheăng pơla péa hdroâng mơngế Việt Nam ƀă Kul xuân môi tiah pơla kong pơlê Kiên Giang ƀă kong pơlê Kampot’’.