Kơxo lơ 12/12, Vi ƀan hnê ngăn kong pơlê Gia Lai tơkŭm po Rôh hôp tơpui tơno tơdrêng ƀă hlối mơ’no ing troăng hyôh internet pơla kăn pơkuâ ngăn Vi ƀan kong pơlê ƀă mâu hô̆i viên kuăn pơlê ki pêi chiâk deăng kong pơlê. Veăng hôp a rôh hôp tơpui tơno a 17 tíu ki mơ’no râ tơring, ƀă tơdroăng ki veăng hôp dêi lối 400 ngế kăn cho hô̆i viên kuăn pơlê ki pêi chiâk deăng. Ƀă hiâm mơno tơpui tối tơdrăng, teăng mâ mâu tíu ki pêt mơjiâng kế tơmeăm, khu pêi cheăng tơrŭm, hô̆i viên kuăn pơlê hiăng mơ’no tối hên rơkong kơ-êng ƀă kăn pơkuâ kong pơlê Gia Lai ƀă mâu khu râ, kơvâ cheăng ki ai tơdjâk troh.

Tung mê tơkŭm tung 5 tơdroăng ki xiâm mê cho: hdrê pêt, kuăn mơnăn păn; tŏng kum liăn kơjo; troăng hơlâ yŏng kum mâu tơdroăng ki xơpá ăm tơdroăng ki pêi chiâk deăng; tơnêi; tŏng kum mơjiâng bro hngêi trăng troăng klông thôn pơlê, kong prâi tơnêi tơníu. Mâu rơkong kơ-êng a rôh tơpui tơno hiăng châ kăn pơkuâ mâu kơ koan ki ai tơdjâk tiâ mơnhên tơdrêng. Ai mâu rơkong ki pâ thế kal séa ngăn pêi pro nhên, mâu kơ koan ki ai tơdjâk troh tơmâng xo, hriăn ngăn, tŏng um.