Rôh hôp séa ngăn, tơpui tơno, ăm rơkong tơpui tối ‘na 4 tơdroăng ki kal mê cho: Tối tơbleăng klêi kơ’nâi pêi pro tơdroăng cheăng hơnăm 2022 ƀă tiô tối hdrối hnoăng cheăng hơnăm 2023 dêi Vi ƀan; Tối tơbleăng veăng séa ngăn mơnhên tối klêi kơ’nâi pêi pro túa pơkâ mơnhông mơdêk cheăng kâ, rêh ối hơnăm 2022; Tối tơbleăng klêi kơ’nâi séa ngăn tơdroăng ki pêi pro troăng hơlâ, luât ‘na mâu tơdroăng ki kal: Hnê hriâm mầm non a mâu kơpong tíu pêi cheăng ƀă kơmăi kơmok, kơpong mơjiâng pro kế tơmeăm; Hnê hriâm đăi hok; Hnê hriâm tơdroăng cheăng ƀă Tối tơbleăng klêi kơ’nâi séa ngăn tơdroăng pêi pro troăng hơlâ, luât ‘na Hbrâ, mơdât klâk têa a vai hdrêng.

Pôa Trần Thanh Mẫn, Kăn xiâm phŏ hnê ngăn Kuô̆k hô̆i tơpui a rôh po hneăng hôp

Tơpui hnê mơhno a rôh hôp, pôa Trần Thanh Mẫn, ngế cheăng tung tíu xiâm kal kí, kăn xiâm phŏ hnê ngăn Kuô̆k hô̆i pơkâ thế Vi ƀan kal pơtối mơ-eăm, tơkŭm pêi pro tro má môi mâu hnoăng cheăng hiăng pơkâ mơ’no a hơnăm 2022, malối cho pơkuâ, tơrŭm tơkŭm po ƀlêi chiâng Rôh hôp mơhno túa lĕm tro lâp tơnêi têa hơnăm 2022.