Rôh hôp kơ-êng ki hâk vâ ƀă mâu rơkong kơ-êng tơdrăng ‘na tơdroăng ki mơ’no on tơhrik ăm tơdroăng mơjiâng bro kế tơmeăm ƀă tơdroăng on tơhrik rêm hâi. Pôa Phạm Văn Hòa, kăn ki lo ing kong pơlê Đồng Tháp tối tiah kố, tơdroăng ki riân yă on tơhrik môi tiah nôkố tá hâi tơtro ƀă tơdroăng ki kal vâ xúa dêi kuăn pơlê, malối cho kơlo nâp hnoăng liăn mơhá 10% VAT. Pôa pơkâ thế Khu xiâm ngăn kơmăi kơmok ƀă tê mơdró tối leăng tơdroăng kố? Pôa Nguyễn Hồng Diên, ngế xiâm ngăn kơmăi kơmok ƀă tê mơdró ăm ‘nâi:

“Khu xiâm ngăn kơmăi kơmok ƀă tê mơdró hiăng pơkuâ ‘mâi rơnêu, ‘mot tơ’nôm Pơkâ 28. Tiah mê, tung kơxop hlá mơéa ki pơtroh ăm Chin phuh kơxo hâi kố mê kơdroh ing 6 râ ối 5 râ. Râ apoăng mơdêk ing 0 troh 50kwh troh 0 troh 100 km chôu. Tiah mê tơdroăng pâ thế dêi pôa Phạm Văn Hòa hiăng châ tơmâng xo ƀă hiăng châ pơtroh ăm Chin phuh, tro môi tiah tơdroăng ki pôa púi vâ”.

Tiâ rơkong kơ-êng dêi pôa Dương Khắc Mai, ngế ki lo ing Dak Nông ‘na tơniăn on tơhrik ƀă troăng pơhlêh on tơhrik vêh pro, pôa Nguyễn Hồng Diên tối:

"Việt Nam ai hlâ ‘na on tơhrik ki vêh pro, on tơhrik ƀă tôu mâ hâi. Xua ai mâu kơpong kong mê iâ, tôu hên. Laga, tung tơdroăng cheăng kâ kih thuât môi tiah nôkố dêi Việt Nam ôh tá chiâng vâ mơdêk ki hngăm dêi on tơhrik ki vêh pro luâ tâ ivá pơkâ kih thuât ƀă cheăng kâ dêi Việt Nam. Xua on tơhrik vêh pro gá hên mê chiâng ôh tá tơniăn ăm tâi tâng on tơhrik. Kih thuât pin chiâng vâ mơdêk on tơhrik vêh pro tâng ‘no liăn pro tíu ‘măn rak on tơhrik;‘no liăn tung tơdroăng ki mơ’no on tơhrik, malối cho on tơhrik ki rơkê”.

Kơ-êng pôa Lê Minh Hoan, Ngế xiâm ngăn chiâk deăng ƀă Mơnhông thôn pơlê ‘na tơdroăng ki a kong pơlê Lâm Đồng klêi pâk vaccine hbrâ mơdât êi kéa lo po pom ai 6.631 to ro păn xo têa tôu tro châi klêa ƀă 457 to hlâ, pôa Trịnh Tú Anh, ngế ki lo ing Lâm Đồng pơkâ thế:

"Ngế xiâm pơkuâ tối tơbleăng nhên ‘na túa pơkâ mơjiâng bro vaccine êi kéa lo po pom ƀă tơdroăng ki séa ngăn ki dâi lĕm dêi túa vaccine kố ƀă ro păn xo têa tôu. Tơdrêng ƀă mâu tơdroăng ki tro lup hiăng trâm pâ thế rĕng mơnhên nhên hnoăng cheăng ƀă mơ’no tối túa pơkâ tŏng kum ăm kuăn pơlê ki tro lup, vâ rak vế tơniăn tơdroăng rêh ối kuăn pơlê”.

Tiô pôa Lê Minh Hoan, ngế xiâm pơkuâ tối Khu xiâm kô tơkŭm mơhnhôk tâi tâng mâu khu cheăng pơlât mơnăn ing péa Chi cục peăng Hdroh ƀă mâu khu ki rơkê plĕng rêm hâi ối a tíu ki ai ro châi klêa vâ séa ngăn, pơlât ăm mâu ro ki tro châi klêa.

"Hiăng hlâ xua pâk vaccine mê athế ai troăng tŏng kum. Ngin kô rơtế ƀă Lâm Đồng vâ tơpui tối leăng, hbrâ rơnáu túa pơkâ vâ tơxâng ăm kuăn pơlê pin. Ngin hiăng hnê mhno tiô péa tơdroăng môi tiah a kơ’nâi kố: Môi cho, dế séa ngăn, pơchông ngăn tâi tâng rôh ki mơjiâng bro, chêh inâi tê, pâk lô vaccine kố. Vâ mơnhên má mơ’nui xiâm kối gá ối a lâi, pin hlo tơdroăng tơdjuôm ăm mâu khu mơdró kâ ƀae tá mâu kơ koan pơkuâ ngăn tơnêi têa ing Tơnêi têa troh kong pơlê, pôi tá ăm ai mâu rôh ki pơtối trâm nếo tung la ngiâ”.

Troăng hơlâ mơdêk ki kơnía dêi kế tơmeăm pêi lo ing chiak deăng, veăng kum pro tơniăn tơdroăng ki vâ tê ngi kong têa ê, mơdêk pêi lo liăn ăm kuăn pơlê châ hên ngế kăn kal vâ ‘nâi khât. Pôa Lê Minh, Ngế xiâm ngăn chiâk deăng ƀă Mơnhông thôn pơlê tối tiah kố, vâ mơjiâng inâi kal tơdroăng Pơkâ dêi Kuôưk hô̆i vâ pơcháu ăm Chin phuh pơkâ tơdroăng Pơkâ ‘na inâi ƀă kal mâu kơpong ki pêt hên pêt tơkŭm ai mâu kế tơmeăm pêi lo ing chiâk deăng tơniăn dâi lĕm má môi dêi kế tơmeăm:

"Rơhêng vâ tiah mê, pin athế ai mâu kơpong pêt ki tơkŭm, tro pơkâ tâi tâng mâu kế tơmeăm pêi lo ing chiâk deăng ki xiâm châ môi tơdroăng pơkâ tro inâi tơnêi têa. Má 3 cho rơtế ƀă mâu khu tơrŭm ngăn kơvâ kế tơmeăm mơjiâng mâu tơdroăng ki vâ rak vế xua um méa kế tơmeăm pêi lo ing chiâk deăng Việt Nam pin a mâu kơchô tê mơdró tung kong têa ê. Khu xiâm ngăn chiâk deăng ƀă Mơnhông thôn pơlê rơtế ƀă Khu xiâm ngăn kơmăi kơmok ƀă tê mơdró dế pơkâ mơ’no ăm Ngế pro xiâm hne ngăn Chin phuh mơjiâng hô̆i đong báu phái tơnêi têa. Klêi kơ’nâi ngin xuân pơtối hriăn ngăn mâu kế tơmeăm pêi lo ing chiâk deăng ki xiâm môi tiah sầu riêng, kơphế, tiu ƀă hên ki ê.

Mơgêi rôh kơ-êng ƀă tiâ mơnhên ƀă 3 kơvâ cheăng: kơmăi kơmok ƀă tê mơdró; túa lĕm tro, tơ’noăng ƀă ôm hyô, pôa Nguyễn Đức Hải, Kăn xiâm phŏ hnê ngăn Kuô̆k hô̆i tối rơdêi: rôh hôp kơ-êng xuân dế hlo hâk vâ kơ-êng, pôu râng dêi hnoăng cheăng, tơdrăng. Vi ƀan pơkuâ Kuô̆k hô̆i mơnhên tối khât mâungế xiâm pơkuâ, ngế xiâm pơkuâ kơva cheăng hiăng hbrâ rơnáu tro tơdroăng, tơkŭm tiâ mơnhên tung mâu tơdroăng ki kăn Kuô̆k hô̆i kal vâ ‘nâi; tơpui tối leăng chía tŭm ‘na mâu tơdroăng ki u ối, tá hâi pêi pro klêi. Tơdrêng amê hlối tơmâng xo ivá mơeăm dêi mâu Khu xiâm  pơkuâ tung tơdroăng tối tơbleăng peie pro mâu tơdroăng pơkâ dêi Vi ƀan pơkuâ Kuô̆k hô̆i ƀă pơkâ mơ’no mâu troăng hơlâ ‘mâi mơnhông mâu tơdroăng ki ôh tá tơniăn tung tơdroăng pơkuâ.