VOV4.Xơ Đăng -  Pơtối rôh hôp má 14, kơxê lơ 11/8, Vi ƀan pơkuâ Kuô̆k hô̆i tơbleăng tơdroăng pơkâ ‘na pơtối ‘no mơdrếo kơxô̆ liăn tŏng kum ƀă mâu ngế pêi cheăng ki tro tơdjâk xua ing pơreăng Covid-19. Tiah mê, Vi ƀan pơkuâ Kuô̆k hô̆i môi tuăn xúa dâng 1 rơpâu 155 rơtal liăn sap ing tíu râng liăn baoh hiâm ôh tá ai cheăng pêi troh tâi hơnăm 2021 vâ pơtối ‘no mơhá tŏng kum ăm mâu ngế pêi cheăng ối tung cho mâu ngế ki châ kâ liăn tiô Pơkâ. Tung pơla pêi pro tơdroăng ki ‘no mơhá tŏng kum mâu ngế pêi cheăng pêi klêi hrá má môi cho a hâi lơ 10/9/2022.

Pơkâ kố pơcháu Chin phuh tơbleăng pêi pro tơdroăng ki 'no mơhá tro hâi khế pơkâ ƀă tơbleăng ăm Vi ƀanpơkuâ Kuô̆k hô̆i klêi kơ’nâi pêi pro tơdroăng Pơkâ a Rôh hôp má 9 la ngiâ. Tơpui mơgêi rôh hôp má 14, pôa Vương Đình Huệ, kăn xiâm hnê ngăn Kuô̆k hô̆i tối nhên, klêi kơ’nâi 2 hâi tơdế pêi cheăng, Vi ƀan pơkuâ Kuô̆k hô̆i hiăng pêi klêi 7 tơdroăng cheăng ki kân ƀă péa khu tơdroăng ki kal. Pơkâ thế, ngế xiâm chêh tơm xo rơkong, kăn pơkuâ Ƀơrô cheăng Kuô̆k hô̆i, séa ngăn mâu tơdroăng ki tối mơgêi vâ pơkâ tơbleăng mơgêi, rĕng pêi klêi vâ pơtroh ăm kăn xiâm hnê ngăn Kuô̆k hô̆i kĭ 4 tơdroăng pơkâ.

Katarina Nga tơplôu ƀă tơbleăng